Inn sungsang Muitsu ngah thei nak

 Inn sungsang Muitsu ngah thei nak                   By : No Nawn

A. Thudik in thazang pe nak     Innkhawpi te a dik no in naper thei nak tuh le a kam pin thudik a suak thei nak tuh in
tha pe veng in. Kei tsang thei a si le khaw Thudik a rel phang lehsawng penak thaw in tha pe in. Innsungsang ah pakhat le pakhat um dun ngawl ti um tu ngawl atsia thudik thaw a dim
innsungsang mawi si thei tu si.

B. Bulpak sinak thei tu zuam nak
     Innsungsang, bulpak sinak thei le khaw a mah ni tumtahnak thei in thurelnak, thazangpenak le a heizongza ah lawhdingnak ngah tu si ti. Na thei ngawl a si le khaw thazangpe dan le thureltheih tu ngawl si.

C. Tsimnak le theinak te mun khat no ah zem dun nak
     Na theinak te na innkhawpi te nen ah rel la a pha le a se a thei tsiang tian in rel thei tu tum in. Tsimnak ah a khangso thei nak tuh in a thupi dan te rel tu hei po po mah nen.Bulpak tumtahnakte dong la na hei men tuhngawl in laibu sungah ngan in.Tua na dinmun le na harsanak te vum ah thudongnak nei in. Mailam ah a leng tuh lai te tampi kam thei leh tu si.

D. Pakhat le pakhat pawlkom dun nak
     Innsungsang zahlam heh pakhat le pakhat awntawpnak nei ngawl si ti Social Society in rel si. Nitin mu dun men in om phang nel dun nak om thei ngawl si. Tuni na tawknak te a pha, a se te na innkhawpi te rel in " keimah ka si asin? " ti thudongnak nei in. Pakhat in thu rel ( awn ) tseih lai tum in phatak no ngai nak thaw upat pe dun in. Bulpak harsa nei a si le khaw im poh ngawl in rel in mailam a phaber in lairel leh thei tu si.

E. Innsungsang ah hun pe nak
     Midang mi tampi te sun le zan napernak man in innsungsang ah hun pe theingawl tampi om si. Inn leng sikhen dapden no in kulnak te per a tsia na zau a si le khaw poi ngai tu si. kei hun neilamtsang nak te heh innkhawpi te tsa sahnungnak in na mang phang bek in na innsungsang ah sahnungnak muitsu thaw dim tu si.

F. Pernak ah upat tsak in per nak
    A masaber in mi dang ten sisen na tsa te mai ah na zii/ na pasal tawh upatnak thaw na itnak lang tear in. Tibang in puah a si lekhaw midang ten le innkhawpi ten upatnak na pe tu si. Na zii tawh mi " na am " na thei lekhw na tsa ten sikhen mi dang ten sikhen upatnak pe tu ngawl si.Inn sungsang ah a masa ber in a phaber in per la na ninglun ten na ke-ngaih lun tu si.

G. Zalentak in uk nak le lamhuai nak
    Innsungsaang ah na thu bek in uk tu tum mahnen, na tsa te ta a ruatnak koh tu bek singawl a munak khen var tu ngaw si. A san thaw a kaih in uk la a phangawl te a om lekhaw phatak no in rel thiam in. Na tsa te kheh laiei lai tum in hau kha po po mah nen.

H. Pulam ah sahnungnak tuh suak nak
     Innsungsang in phulam ah sahnungnak puak sak veng in. Pulam suak tiphang tangka tampi bo tu kei lau veng.Pulam suak in sahnung puah phang thin sung harnak, thinpitnak, kei phurrit te zang tear si.

I. Inn ah munkhat no in sawngen nak
   A vum a thu te kei puah theipelh a si khen kei lai ah Pathian a ding ngawl, a om ngawl a si lekhaw a kim sahnung, a nuam innsungsang si thei lai ngawl si. Mi dang inn ah sawngen sak teih veng pelh mah ni inn ah a kim no sawngen nak puah si sing maw? Innsungsang ah remnak,nuamnak, sahnungnak le pakhat le pakhat sualzahdun thei nak tuh heh Pathian nen ah ngen in a mah deihzawng in nung kei si lekhaw a sahnung innsungsang si thei tu si sing