Nu le Pa te'n Tsate nenah tangka kul ngawl RO a pe theih pa ( 3 )

1. Pathian thu
                    Nu pum sungpin a suak minung tutu nenah Pathian thu a rel, a zirh masa bertu heh a nu le pa te si. Pum sungpin Pathian thu a zirh theihlam te vang nganleh tu ngawlla sing. Nau thaw a ompi tamsawntu heh Nute si si. Ni khat sung rori nau thaw a khawnenber ah na om phang heiha na puah veng? Mileng te thaw midang senak bekbek te ha nau maiah nang awntawp veng? A pha le a se heimah thei lai ngawl tsate luak ah Pathian thu na thun ma mi relsenak le awn pha ngawl te na thun masa a si lekhaw na kawngngiah a pha ngawl kheh na tsate tsa ro sesuak na roh thaw bangdun si.
                   Pa rekkhat te'n tsate Pathian thu rel heh Nu te pervo ah a koihtu Pa khen om lai sising. Inn sungsang ta eih le in, tangka kei zeisak ongla nungsang tawk ala ti ruak kha popo ol a sing. Tsate thinlung ah Nu te thurelnak le Pa te thurelnak heh dangdun si. Tsate kiangah a om lai Pathian thu kei rel ngawl a silekhaw kei nenpin a khawla nak mun ah a leng phangin Pathian thu sungah a om lehngawl thu za phang thinna in sir leh kha tu sising. Inn sungsang pin Pathian thu thaw a khang naupang le Pathian thu sungah a om ngawl inn sungsang pin a khang nauphang heh a heihei lamah sikhen dangdun ver si. Tsimi a sita tsate taksa le thinsen sungah Pathian thu thaw a dim theihnak tuh Nu le Pa te pervo si. Tsate nenah leivum thil le ri ah le theihnung ngawl RO tsungnung a roh ngahtu Nu le Pa kei si theinak tuh Pathian in nu le pa nang veksen vumah muitsu kei burh tasen.

2. Unau itdun dan zirh
                   Tuni tian ka leng min khaw le ram ah ka musuak nak pakhat heh nau u itdun, sunsak dun a thiamtu le nau u dang heimah siar dun ngawltu te tiheh si. Nau u (nu khat pa khat pin a suak te) riang itdun thei ngawl tih unau pi (Nu sungkhat lam le Pa sungkhat lam), khaw le ram it thei tu heh limdiknak kohno khen om ngawl si. Nu le Pa te zamzawh ah haudun in ro tuhtu minung khen ka mitmuh rori ah ka mu nak tampi om si. Nau u pakhat le pakhat thinlung mun khat no ah a om in a itdun theinak tuh heh Nu le Pa te nenah pervo nei si sing. Tsate nenah nau u hawdun nak maw? itdun nak Ro ha na roh tuh?

3. Muitsu
                  Nu le Pa in lamvum ah muitsu a neituber ti a sin sual lem tu ngawl sing. Heitasim tiphang mi pakhat khat sumdawng nak ah a lawhding phang a ni menah a nu le pa muitsu ngah ta si ti veng si sing. Muitsu a nei bangpah in tamse nak khen nei sing. Muitsu pe dantuh thei ngawl khen om lehleu sising. Tsate nenah muitsu zong pe dan tuh thei ngawl in tsate nenpin tangka bekbek ngentu nu le pa si kha na sing maw? Ram dang om tsate'n inn lam phone a set lamtang phang sun le zan in nangma/nang inn sungsang ta sawn nang ngen sak veng sing khaw thanau popo mah na un tima lamsang ah tangka thu ah awnsol dun in phone card bo tiartu Nu le Pa khen om lai si. Tsate vumah limdiknak a neitu nu le pa kei si lawlaw nungsang ah tsate hem vum ah muitsu bangrep in pe in. Tsate vumah muitsu a pe dan thiamtu kei si theih nak tuh Pathian in muitsu kei pa tasen.

Ngantu:
Nawn Thang

Mitkau le Laisiar thiam ngawl pa

                   Tuma lai'n khaw tenau pakhat ah laisiar, laingan thiam ngawl mi pakhat om si. Kawtin laingan, kawtin laisiar dan tuh ti khen thei pumpalak ngawl si. Mi lak a hawh phang a theidik ngah nak pakhat om si. Tsimi heh laingantu le laisiartu a tam sawn te heh Mitkau bun veng ti kheh si. A heita Mitkau a bun ti thu ruat pan nak nei si. Keimah khen mite bangin Mitkau ka bun asin lai siar thiam bek zo ngawl lai khen ngan thiam deve tu limdik nak thaw khawpi ah Mitkau lei tu in inn pin pok si.
                   Khawpi sung a leng phang lampi kiang dawr hem ah Mitkau lei tuh zei si. Bawngpha nak tuh ah Mitkau zuar nak dawrpi mu atsia a sungah lei tu'n lut si. Mitkau zuartu pa nenah Laisiar le laingan nak pha Mitkau pakhat ka pe in ti si. Dawr neitu pa khen a Mitkau a khawng ot thaw a sita Bizu sunga pakhat khul in pe si. Lai thiam ngawl pa khen a pe nak le vut in bun si. A leinak a Mitkau bun pelh napikhaw a limdik nak pittseih nak lai siar kheh thiam tsuang ngawl si.
                   Tsimi phangin Mitkau zuartu pa nenah a heita na Mitkau ka bun sipelh lai siar thei ngawl bang sing ee ti'n dong si. A zuartu pa khen aitsaan ngai in paan atsia laisiar thiam tsi maw? ti si. Kawtin laisiar tu ti thei ngawl si ngawl tsi maw? ti a dong phang HEE siar thiam ngawl si ti si. Midang te Mitkau bun in lai a siar ta amahni bangin siar thei deve ol ti'n ka lei nak si ti si. Mitkau zuartu pa kheh ni sup thei ngawlin ni pum si. Dawllam ah dawr neitu pa in phatak no ah reltsiangnak nei si.
                    Rualpa phatak no in ngai in, na ruatnak heh mang pha ngawl si. Mitkau in laisiar thiam thei nak tuh bawm ngawl si. Laisiar thiam te sawn kheh Mitkau in bawm sawn kheh si si. Mitkau bun in lai a siar te kheh laitsang tsiangkoh in a mu thei ngawl ta Mitkau power in a bawm phang laitsang tsiangsek in a mu thei ta a bun te si. Thu pakhat ka tsah ot nak heh nangmah le nangmah laisiar, laingan thiam tuh'n tsimnak zir masa in ti si.  

Thuanthu sunga zir tuh

1. Tsimnak nei ngawl heh mittaw thaw bangdun si. Tsimnak heh a pakhat nak ah zir tuh si. 

2. Tsimnak heh khawthim lak na vak a si khen vaarnak si. Tsimnak nei phangbek a pha le a se khen thiam tu si.

Napoleon Ral nehnak Thuthup

      Leivum pi thing tiar zotu Napuleon heh ni ni khat ah a raldo
tseih laitum ah a ral ralkap tampi ten a mai pin khak si. A nei
nak ralkap mipum 70 si atsia a ral te heh 300 lai kim si.
Ral te a thup no ah a tsul tu (spy) pakhat in Napoleon nenah
"Ralkap 300 lai in kei lampi hawh nak tuh phit sak si" ti'n thu len
si. Tsimi phangin Napoleon kheh a ralkap te nen lam ah her in
"Khawthu thek sie...... Thuthang pha ngah ongla si sing. Kei mai
ah ralkap 300 te lai ei tuh in tuh om si. Kei laiei tuh kei nei leh
ngawl la thaw tsimi lai le tii kheh le dang a sing. Nang raldo thiam
lam ka thei nak reipi ongla si. Kei eih le in tsa thuruat har kul leh
tu ngawl la si" ti si.

      Napoleon in a kut naia ralkap te tha tho tuhin a ziap dan heh;
Pakhat nak heh (nang raldo nang thiam) ti le pa 2 nak heh
A ral mipum 300 heh ral te ti ngawl in minung 300 tsa lai, raldo
tu ti tuh sipelh kei ei kei in tuh lai le tu si sing ti'n thupe si. A
thupe dan a thiam leita tsa a ralkap te kheh amahni tah tam sawn
raldo tu kheh lau malam sang tha tho sawn si. Thu a pe nak
bangin a ralkap te'n a ral mipum 300 lai kheh do/tawng atsia
neh in a ral te thilri hem le ngah si.

      A vum lama thu tsomno kei pan lekhaw mipi huaitu pakhat
in a huai nak te ziap thiam, zawl thiam a si lekhaw um ban nung
ngawlnehnak tso tu si. Sipelhatsia mi ziap thiam ngawl huaitu
te heh mipi a huai nak ah lawhding nak ngah tu ngawl si. Huai
nak te tha tho thei nak tuh awnkam suah thiam kei silekhaw
huaitu pha tinak situ si sing.

HARSA TUARNAK

                                         HARSA TUARNAK
                                    Ngantu: Saya Thian Za Uk

THUMAIHUAI

Khrih Umtu mitam sawn in heita keimah zong harsanak ka tuar tum, midang te zong keima bang in tuar deve ngawl ti kei mah ke kek poh harsa ka tuar tum ti’n thinglung sungah mah le mah thudong nak veitampi leng kha veng tu heh um sing. Tin mizahlam te hen ti bang hen thudong nak khen nei veng si timi heh “Hei ta a nung Pathian um ngawltu te zong Umtute bang in harsa nak a nunnak ah a tawk veng ngawl? Heita Pathian in a mah umtute bek harsa tuar a sing veng? Pathian in heizongza ti theih timi heita keimah zong harsanak tawk tsiar?” ti’n thudong nak kei thin sungah leng veng si. Timi manin me thuthaw pehzomdun in dawm lai ka ngan nuam deve nak heh Laithiamrim sungah harsa tuarnak thaw a pehzomdum ngan nak te mang in Umtute thinlung sungah a leng veng thudong nak le ai tsan nak te heh Laithiangrim mang in aphi dawm laino ngan deve ot sing.

Harsa Tuarnak A Man / San(Cause)

Harsak kei tuarnak heh Adam le Eve te Pathian thungai ngawl nak man in Pathian thin raw nak so sang pi kheh a puahnak levum a om thil hem vumah leng si. Tin keimah ni minungte khen heh sualnak thaw a dim leivum ah kei om man sawn si (Genesis 1:31; 3:17-19; 5:29; Romans 5:12,14,18; 8:20-22; 1 Corinthians 15:21-22; Revelation 21:3-4). Pathian thinraw nak keivum ah a lengnak man hen Pathian phangawl si ti nak si ngawl si. Pathian in a puah nak thil hem kheh it si. A puah nak thil hem sungpin minungte heh a tuang tung in it si amah zong Pathian heh sualnei ngawl a si manin, Pathian in sual haw si. Tin harsa kei tuarnak a san pakhat heh mite vumah kei puahsaul nak thilte man in Pathian thukhen nak le dantat nak keivum ah a leng sawn si (Galatians 6:7-10; Numbers 14:41-45;  Deuteronomy 28-30; 2 Samuel 11:1-5; 1 Kings 11:1-5; Acts 20:7-12).

Pathian in Umtute Harsa Tuar A Singnak San le Tumtah

1.  Pathian  in a thilti theinak kei phawk reng thei nak tuh in harsanak mang in kei relveng si(Ps 68:19).
2. Harsanak mang in Pathian in keimah ni thazangpe bekzongawl sualroih nak sungah kei du thei ngawl nak tuh in amah muang ngam in umkho nak pe si (Ps 66:8-9; Heb 2:10).
3. Keitaksa harsanak a tuarnak hen Jesuh Khirh ming kheh thangphat in thang tsiar si (2 Cor 4:7-11).
4. Pathian in harsanak mang in  Amah kei mung ngam theinak tuh in thu zirh veng si (2 Cor 12:9).
5. Harsanak hen niam khiat dan tuh thu kei zirh si (2 Cor 12:7).
6. Jesuh Khrih ruatnak bang kei nei thei nak tuh in Pathian in harsanak mang in thu kei zirh si (Phil 2:1-11).
7. Harsa kei tuarnak hen keimah ni a zirh nak heh “Pathian in nuam ngai in kei om tah in a deih dan bang in kei om theinak tuh thu  a zirh lam lang tsiar si” (Rom 5:3-4; Heb 12:10-11).
8. Harsa turnak hen Khrih Umtu pha kei si theinak tuh in nun kei zrih si, Jesuh Khrih kei bang thei nak tuh in (2 Cor 4:8-10; Rom 8:28-29).
9. Harsa kei tuarnak heh Pathin kei dodal nak man in Pathian in keimah ni thurel in a vat nak hin khat si (Ps 107:17).
10. Thulun nak le keimah ni le mahni kelen tawm thei nak heh harsa kei tuar nak pin leng si (Heb 5:8; Ps 119:67; Rom 5:1-5; James 1:2-8; Phil 3:10).
11. Harsa kei tuarnak hen Pathian in keimah ni a it lam kei lang tsair nak si (2 Cor 8:1-2, 9).
12. Harsa kei tuarnak hen Sual kei do a silam lang tsiarnak phakat si (Heb 12:4-13; Ps 27:12; 37:14-15).
13. Tuarnak hen thu man  ngawl kei do a silam lang tsiar si (1 Pet 2:19).
14. Harsa kei tuarnak hen Jesush Khrih ming le Pathian it nak thuthangpha, le A san nak thuthang pha kei za thei nak tuh in lampi a muh tu pakhat si (Acts 5:41; 1 Pet 4:14).
15. Harsa kei tuarnak hen Jesush Khrih keimahni tsa a tuarnak kheh mite nenah keiphuang suak deve nak pakhat si (2 Cor 1:5; 1 Pet 4:12-13).
16. Harsanak  heh keinun nak tsa thu zirh tu tuh in Pathian penak lehsawh pakhat si (2 Cor 4:17; 2 Tim 2:12; Phil 4:12-15).
17. Pathian in umtute mun khat ah thural no in om theinak tuh in Harsanak mang in thu zirh veng si (Rev 1:9).
18. Harsa tuarnak hen a suahpi nak heh tsimnak, a dik le a maan no in thukhen thei nak. Tin Harsa nak hen Patian dan kei lunkullam le lun tuh  te kei zirh si (Ps 119:66-67, 71).
19. Harsanak mang in  Pathian in a deih dan bang si, senak nak pin a phannak lamah din ther leh in Raula Thiangrim thilti theinak kheh kei nen ah lang tsiar si (Ps 51:16-17).
20. Harsa kei tuarnak hen keimahni nundan mawi le ruatnak dik a zirh bekzongawl, Pathian in A tsapa Jesuh Khrih mang in kei nenah a penak ngeih harnak bek kheh lim dik in kei om theinak tuh in thu kei zirh si (1 Pet 1:6, 13).
21. Niam khiat nun kei nei theinak tuh in Pathian in Harsanak mang in thu kei zirh si (1 Pet 5:6-7).
22. Pathian in harsanak kei tuarnak  kheh mang in Ralapai tampi san suak si (2 Tim 2:8-10; 4:5-6).
23. Harsa kei tuarnak hen keimah ni thazang nei tsiar atsia, mite thinhar le harsanak tawk in a om phang, amahni kei nem theinak tuh in thu a zirnnak phakhat si (2 Cor 1:3-11).
24.  Harsanak hen Pathian nenah harsa kei tuarnak sungpin angnak kei rel theih nak tuh in nun kei zirh si (1 Thess 5:17; 2 Cor 1:11).
25. Harsa kei tuarnak hen Pathian kei umnak kho tsiar in khang tsiar si (Jer 29:11).
26. Harsa kei tuarnak hen Pathian in keimah ni a kelen nak kheh lang tsiar si (Ps 56:8).
27. Harsa kei tuar na hen lim dik nak kei pe si (Job 13:14-15).

Harsanak Pin Limdiknak

            Minung kei nunnak ah harsanak a om ti heh tsiang no in thei te'n sising. Sinapikhaw a tak in a om thinnuam diriamnak le dapnak / remnak (peace) in kei nunah dim tsiar si. Kei thei tuh henah Jesuh in aninglun te nenah harsanak tawk in atuartuh laithu ah ralring in a om dang thei nak tuh in a phaungham phang in ralring in a om dang nak tuh ruak phuangham ngawl si. Harsanak tuar tselh phang a tsotuh diriam thinnuam nak le dap / rem (peace) nak a petuh thute khen phuang ham si. Harsa kei tuarphang in thinlung taksa tsawl in rimngai in om pelh si sing, timite hen kei nunnak siatsuah ngawl si. Lungsie in naom phang in thinhar in ommah nen, heimansim tilekhaw lungse thinhar in harsanak kei tuarnak sungpin nundan mawi danglam tak Pathian in kei petu si. Bekzongawl limdik nak khen pe kei si (Job 13:14-15). Timi man inn na maiah a lengtuh harsanak, thinharnak, le lungse khawngai nak tehem kheh nangah leh tuh thinnuam nak le limdiik nak thaw ralpha ngai in om in (John 16:33). Harsanak kei tuar tselphang keingah nak thinnuam nak heh sumpai in a lei theih nung ngawl Pathian lehsang pakhat si. Kei vumah harsanak, lungsenak te a leng phang in Pathian Amah pakhat bek kheh muang in,  heitasim tilekhaw  “Nitin kei harsa nak te a tuarpi bawm tu” (Psalm 68:19).  Labu sungah kei sa veng bang in “Kei harsa nak te Jesuh thei si, sawngen in a nen dong un, a nen aap un.”  Tin harsa nak le buai nak te a leng si khen in heimah lau in thinhar mah nen timitah sawn in Pathian nen ah angnak rel in Aming kheh thangphat in thang tsiar sawn a tuh si.

Hongkong milian pa awnkam theipha

1. Lampi pa 2
     Minung tinak hem in hawh tuh lampi pa 2 nei teen sising. Pa khat heh hawh kultsaam lampi si'n a pa 2 nak heh hawh khen ngah, hawh ngawl khen ngah lampi si. Hawh kultsaam nak lampi sawn phatak no in kei hawh thei phang a pa 2 nak lampi kheh kei deihnak bang hawh theitu sising.

2. Vei khat umnak
     Umnak tinak heh lainah bang si. Lainah kheh kohno in balsep la a masa bang sileh thei ngawlla si.

3. Sirnak
     Kum 20 na liampi zawh ah nangmah thinhar tiartu heh na puah awng nak thilte si ngawl si. Na puah ngah ngawl nak thil te sawn situ si.

4. Mun
     Ti thiang bu khat heh lampi kiangah 1 zuar atsia mingthang Hotel sungah 2.50 in zuar si. Minung pakhat ah man heh a om min mun vumah hambun si.

5. Ralringnak
     Awnkam khat na awn ma nangmah heh awnkam a bawipa si tsi. Na awn tselh ongla a si lekhaw nangmah heh awnkam selpa si ongla si tsi.

6. Dengnak
    Leivum ah launung minung phun 2 om si. Thinkho tu le naper zuamtu te si. Naper zuam pa in a nunnak danglam tiar si. Thinkho pa in a sinak tuh danglam tiar si.

7. Engnak le Muangnak
     Amahni tah dawmno na thiam sawn, na thei sawn, thil na ti thei sawn lekhaw nangmah eng tu si. Sipelhatsia amahni tah alet tampi na si sawn lekhaw nangmah muang tu si.

8. Dawltaber Nii
     Midang te thaw zuamdunnak ah na neh ngawl phang thanau mahnen. Mi zaraan na silam phawk reng in. Midang ten nangmah nautat in a nihtip phang leivum ah nangmah tuar bangin ruat kha mahnen. Nangmah a nihtiptu te kheh siber lawt ngawl si. Nangmah bawmtu nei ngawl thinpit mangbang vansang na tawk phang na kap ot lekhaw kap in. Sipelhatsia na kap diriam ongla si lekhaw na om minpin tha ther thaw tho lehtu lam phawk ngawl in om kha popo mahnen. Kawtizah na sung tapelh a si khen na dawltaber nii tawh sung thong tiar mahnen.

9. Lawhdingnak le khangsonak
     Lawhding thei si tsi sipelhatsia khangso theitu ngawl. Na lawhdingnak heh nangmah khamtu om tu pelh napikhaw na khangso tuh ngawl khamtu om tu ngawl si.

10. Arti thula
      Arti pum khat khen a pulam pin na tha thaw na keh tiar a si lekhaw bar khat in bar theitu si tsi. Sipelh atsia a sung tha thaw a keh lekhaw nunnak nei ar pakhat ah suak si. Tsimi bangpah in minung te khen pulam pin a leng harsanak man in kei kek a si lekhaw heimah mang theihnung tu ngawl si. Ma sunglam tha rori in kei kek tiar a si lekhaw minung te tsa nempi ah tang tu si.

Ref: Career Hope Apportunity

Tiphur pa Tibing pem

              Khaw pakhat ah milian te tikai/titawi sak in pumtawm tu dangval pa pakhat om si. Ni tin in zing lam vei khat, sim lam veikhat ti'n ni khat ah vei 2 ti phurh veng si. A rei phang a taklam ah kai veng nak a tibing sawn kheh a dop pem si. Ti a purh min tuh inn heh khawla po a si ta a leng phang a zahlam bek tang veng si.
              Khum 2 a rei phangin a kehlama tibing in a mun len tian a dim a pur thei ta amah le amah diriam tawm ngai si. Sipelhatsia a taklama tibing pem lekhaw a mun ah zahlam bek a len thei ta thanau inle thinnuam ngawl ngai in om si.
              Zing khawma no in ti purhtu pa titawi tu in a pok phang taklam tibing in thinnuam ngawl in," Ka bawipa ka thinnuam ngawl ngai sing, tibang phang la si heh" ti'n rel si. A bawipa in," heita na thin a nuam ngawl?" ti'n dong si. " Ti na tawi pan phang dimpek in na thun nak sipelh ka heingawl leita ta a mun na leng phang a zahlam bek tang veng, a zahlam bek a si phang tibing pakhat man ngah ngawl in a zahlam bek man na ngah ka mu phang ka thinna tuar thei ngawl sing" ti'n O si. Tibing pem ah awn nak a za phang O leh nak nei ngawl in nihsan men si.
              A mun ah ti a purh tselh a hong thahlam in Ti purhtu pa'n," tibing pem pa! lampi kianga papar te par tawh a mawi dan pan in" ti si. Tibing pem in khen lampi kianga papar par te pan in thiannuam si. A pan tseih laitum ah ti zahlam bek amun ah a len lam phawk lehleu in a thinnuam ngawl ngai in om si. A thanau in a om lam a bawipa in a mu phang," Tibing pem pa ti ka purh veng nak lampi ah lamdang nak mu ti maw? na om min lam pan po in papar mawi ngaingai tampi om si. Na kehlam tawh panla papar heimah om ngawl si. Na dop pem lam thei reng sing na sual si ngawl si. Na om min lamah papar tsii ka theh nak si. Ti ka purh phang nangman ti burh sak nom si tsi. Me papar te zuar angkhaw tangka tampi ngah lehtu sing.  Na pem ngawl asin zuar tuh papar nei tu ngawl sing" ti si.
              Minung hem in dasamnak pakhat nei teen si sing. A thupiber heh na thanaunak te kawtin ha na ruat ti kheh si.

Thanau mahnen

A. Keimahni a iksik heh kei lawhding ta si.
     ( Kei lawhding ta keimahni iksik si )

B. Keimahni a el heh keimahni a bang ngawl ta si.
     ( Keimahni a bang ngawl ta keimahni el si )

C. Keimahni ming a se tiar ot heh kei mingthang ta si.
     ( Kei mingthang ta kei ming se tiar ot si )

D. Keimahni a nautat heh vum lam pi ah a paanso nak kei si ta si.
     ( Paanso nak kei si ta keimahni nautat si )

E. Keimahni a erh heh keimahni a lau ta si.
    ( Keimahni a lau ta keimahni erh si )

F. Keimahni a haw heh deihtu tam kei nei ta si.
     ( Deihtu tam kei nei ta keimah ni haw si )

Zii pa 4 nei

Vei khat lai'n mi pakhat in zii pa 4 nei si.

Zii pa 4 sungpin pakhat nak ah a itber nak nu heh pa 4 nak nu si. Heita tiphang pa 4 nak a zii in amah pahtak no in kalen atsia a kiangah a om rengreng veng ta si ti si.

A pa 2 nak a itber nak nu heh a zii pa 3 nak nu si. Zii pa 3 nak nu heh a mel le mawi, a ruangrai le a han ta mipi mai, puai tibang, a rualpi te nenah keimah huai nomnom veng si ti si.

A zii pa 2 nak nu heh a masa te bang a it ngawl pelhta a si khen a muang ngai nak a zii si deve si. Thubuai pakhat khat om le khaw thuronnpi, a pasel khen bawm ngaingai veng tu si ti si.

A masaber a zii heh heimah itnak thinlung kohno khen nei ngawl si. Aman a it ngawl tapelh a si khen a kiangah om in a kul le sam nak te puahsak veng si. A pasel vumah thinna nak nei ngawl in tuamlawm si, pha si.

Limdik ngawl pi in patang pa nase ngai in na atsia a nung tu lam a um leh ngawlla phang a zii pa 4 te tihen thudong si....

A itber nak a zii pa 4 nak nu ko atsia,' ka thi lekhaw ka nenah thi deve thei ol tsim?' ti in dong si. A zii pa 4 ni in el si, nangmah thi thei tu ngawl sing ti si.

A itber nak a pa 2 nak a zii pa 3 nak nu khen amasa bangpah in dong lehleu si. A masa tah roh sawn in,"na thi lekhaw midang mipa nei leh tu sing" ti si.

A zii pa 2 nak nu khen a masa te bangpah in thudong lehleu si. Anih in lekhaw,"na thi lekhaw na thaan ah papar koih tu sing, tselh phang nangma tsa saw na ngen sak tu sing" ti si.

A dawtaber a si a zii masaber nu dong lehleu si. A zii masaber si lekhaw dangse ngai in O tum si. Nangmah thaw kumkhaw na ompi tu sing. Kawnai kawnai na hawh a si si khen na nenah lun tu sing ti si.

Minung kei nunnak khen a vum lama thuanthu tsomno bang si sing.

A zii pa 4 nak heh kei ruangpi, kei taksa bang si. Kei ruangpi kawtizah kei it ta pelh a si khen ni ni khat ni ah keimahni zam leh thotho si.

A zii pa 3 nak heh nei nak thilri (hausanak,lianna) bang si. Kawtizah milian, thilri tampi ka nei pelh a si khen kei thi phang kei nei nak hem heh midang kut sungah leng si.

A zii pa 2 nak heh kei nu le pa, innkaw pi, sungkhat unau te bang si. Kei thi phang keimahni ngai in kap, thaan sial sak bek ngawl heimah tithei ngawl si.

A masaber a zii pakhat nak heh Bawi Jesuh bang si. Minung ten kawtizah in kei haw, kei it ngawl tapelh a si khen keimahni it in kei kiangah a om reng tu pa si. A nung lai le a thi zawh keimahni a it dan kiam lawt ngawl si. Kei nung lai kei kiangah ah a om bangpah in kei thi zawh ah khen vanram ah amah thaw kumkhaw om tu lai te si sing. Kawtizah kei bawngpha........

Tsimita Leivum kei nun sungah heiber ha kei it ber nak, No. 1 kei koih nak heiha? ti ruang dang leh tu in sawmdun dang si sing.

KA HEI THEINGAWL EPA THUTSAH NAK (8)

1. Khaw nainai ah na leng ta na si khen nangmah a puahtu Pathian kihzahngawl in om popo mah nala maw.

2. Nitin na puah le napernak ah diknak le thumaan thaw per in maw.
 

3. Nitin nunnak,damnak le ei tuh,in tuh a penak te heh Pathian nenah angnak relngawl in om kha mah nala maw.

4. Mi te relse teteih tu singawl in mite it thei tu le ngeihhar thei situ zuam sawn in maw.

5. Umngawltu te thaw na naper phangin Pathian zahpi tu singawl in umngawl tu te tungtaak in nung sawn in maw.

6. Na mailam tsa thu saangpi ruat la thazawng in om mah nen maw.

7. Harsa vansang na om phang nangmah a bawmtu te a kelen tu te kheh heimah nen. Na si thei leh phang a mahni nenah na angnak lang leh tiar in maw.

8. Sualnak puahtu singawl in phatnak puahtu si thei tu zuam sawn in maw.

Ngantu : Thian Za Muang