Muitsu No.3

Mi nihtsip Zohsuam thei te tonak ah to deve ngawl te.
              Me Mi nitsip Zohsuam thei te nundan heh Proverb 1:22; 3:34; 9:12;19:29 te ah mu thei sising. Me mi nihtsip zohsuam thei te heh Pathian thei ngawl, misual, lawki te tinak thaw bang ve pah si.

              Tusan Khriatian te kei pan asikhaw Kawhran tinak, a tse-a konak te kei si nak heh heisiarngawl in, Pathian theingawl sakhaw dangte thaw nuamngai in pawldun dang sising. WCC tinak World Council of Churches tinak kheh thei sising, amah ni tumtah heh Leivum om pawl tinak taakhem munkhat in dingdang tu tiheh si.
 
                Timi bek siargnawl Yoga tinak Hindu te pannak Leivum sakhawhem , Chirstian, Hindu, Islam, Buddhist vek sen munkhat ah sawngen dang in Benak puah dang nak te muthei sising. Lungrual tu, Bible zirhnak keitheingawl asi le khaw lungrualnak ti phangai bang si. Amahzong, 2 Korin 6:14-7:1 tian kei siar le khaw
1) Umngawl tu tethaw abangve ngawl kolhaak phul dang mah na un!(14)
2) Amahni lakpin tson suak ula(17)
3) Khek un! (17)
4) Athiangngawl hihim tong mah na un!
5) Tisa le raula ningtsir nunghem pin thiang tiar tawm ta un! (7:1)
Me hen kunnak singawl si, thupe nak si.
          
                Mathai 10:34: Leilung vumah thinnuamnak phurh tuin a leng ka ring mah na un. Remnak phurh tuin leng singawl in, vangsang phurh tuin leng si sawn sing.
 
                  Matthai 10:34 pin a tawp tian siar la tsiang ngai in mutu sitsi. Tinuamnak a silekhaw, Umngawl tu, Pathian theingawl, lawki te thaw rualpi dun theih si a mahzong biaknak a hen rawidun kha po awl asing, a tse a konak te kei sinak heh thei dang ten asing.
 
                  Athupi in, Biaknak lam ah umngawl tute nen ah kei umnak khongai in (defense) kei kham tawm zo tu din mun a singawl nung sang pial men sawn in. thuthang pha phuangin, zirhtu na singawl nung sang, biaknak lam ah umngawl tu tawh rualremnak puah kha po awl asing. Mimuitsu hen Misual te tonak ah to deve ngawl si.

Ngantu: Mangpuh

Mimuitsu No.4

Saam 1:2
             Amahzong a thin ngetkimnak heh BAWIPA dan ah si. Tsin me dan kheh sun le zan in ruatin tsiing rereng si. (delight-kheh ngetkimnak ti sing).

                  Pathian awntsang asi, Bible, Dan ah ngetkimnak, thinkimnak nei in, sun le zan ruat in a tsing rereng te heh Mi muitsu si. Tuni ah na nun ah Pathian (Jesuh) it sing ti atsia a thu, a awntsang thei otnak, nget nak na nei ngawl le khaw na kannak tsek leh po in. Pathian thu athupi dan heh thei dang ten a sing.
 
                  ''Leilung le a sung a om tehem heh pan asing, a awntsang a huham te si, Piangpannak ah mu si sing, Pathian in vaarnak om sen, a ti tsang le a awn bang in kimsi.
Thuthang pha uk 4 sung-a thil khumnung Jesuh KHrih puahnak te pan asing khaw, a awntsang, “Kim tasen” a tinak in kim ruaruak si.
 
                  Khristian kei si nungsang kei kulber nak heh Pathian thu (Bible), Bible in ti mah a ti lekhaw, ti tungawl! Ti in a ti lekhaw, ti tu. Me zin panih tawh bek nei si sing, hei awl asing.  Tusan Pastor tampi te hen Bible zin in nung si ngawl in, kei nun nak kei tawknak, Experience kheh Bible tawh support, santeh tum tam sawn ongla si.
 
                   Thurel nak tam sawn khan, Bible tawn ngawl in, Bible thupi ber koih ngawl in. na pernak ah, khualvaak min a, tawknak experience te bek mi te zasah tuh in rel tseih atsia timi experience te relnak abawm tu tuh Bible tsang dawmlai siar men in thurel tawp tampi om ongla si. Pathain thu Bible a relnuamnak bang a rel ngawl in mi zasah nung tuh bek rel tam ongla si. Na ruatnak le na lungkimnak tah in Bible relnak thudik heh thupi sawn si. Naruatnak, na thupom te heh sualthei si tsi, Bible heh kontik ni khan thudik si rereng tu si.
 
                   Timita Saam laingan tu pan, Bawipa dan, ah sun le zan in ruat in tsiing rereng te si ti si. Pathian awn tang Bible heh sun le zan in kei ruat, tsing in kei lun a si lekhaw Saam 1:3 kheh na nunnakah a tak in mu thei tu si tsi. Tin Saam 37 kheh siar belh in.

Ngantu: Saya Mangpuh

Zirhnak (Doctrine)

I Timote 4:13: Ka leng ma hem Laithiangrim siar le so dunnak le zirhnak (Doctrine) te kheh thupi tsan in.
 
Zirhnak (Doctrine)
                     Me kei awn Bible ah letnak Zirnak tinak heh Mirang awn Doctrine tinak pin let nak si. Doctirne Bible kei pan a si lekhaw Thuzirhnak, teaching ti tawh a bang ve si (Job 11:4, Ps 4:2)

                     Paul mangnak Doctrine tinak heh Bible sunga om Pathian thuzirh nak te kheh ti nuam nak si. Leivum a umnak, thupom te si ngawl si. Bible zirhnak thudik te. E.g. Jesuh, Pathian, minung a tsang, lei sinak a lenak (John 1), Thumkom Pathian (1 John 5:7) te pawl Pathian thudik te kheh tinuam nak si.

Khristian um nak a hen Zirhnak (Doctrine) phun (2) om si.
(1) Milk (khul) Doctrine le
(2) Meat (laipual) Doctrine tin phun nih in khen si (I KOr 3:2, 9:7, Heb 5:12-13, IPet 2:2).          
                    Me te panih pin pakhatnak Khul doctrine heh si le khaw Kannak,Sannak Doctirne, Kannak thu ah Bible in kawtin a keimah ni a zirh ti thu si in, panih nak silekhaw Kannak kei ngah zawh Khristian nun, Pathian kei be dan, hun dawllam ah hei tsang tu ti te pawl zirh nak kheh si.

                     Pakhatnak Khul Doctrine, Kan/sannak doctrine ah kei tsiang ngawl, kei sual nungsang kei tselh si nom si, panihnak heh kannak kei si zawh in kei mudan, kei hawhdan, pomdan dang te heh poize ngawl si. Amahzong Sannak thuah kei sual nungsang kei tselh si nom si. Tsimi ta Bible Zirhnak (Doctrine) te thupi si. Christian pawlpi tamsawn heh Meat Doctrine, Pathian thagnphat dan, Tinimnak thu, Hun dawlber thu te lungkimdun ngawl, pom dan bang dunngawl man in khekdun tam si.

                   Amahzong Kannak doctrine man-a khek dun te heh: pin AD 1600 RC te nen pin khek pan , Reformation, Pentecostalism-AD 2015-Liberal. Kannak thu ah kei pomnak Zirhnak (doctrine) thei kul sising. Tuni hen Baptist, AG, RC, Liberal hei a kei pom nak? Hei zirhnak (Doctrine) a? Bible zirhnak heh Rom laikuat kei siar le khaw tsiang koh in thei theih nung si. Tusan ah Bible tlawng Philipine, Australia, India, Myanmar, Korea ram te ah zeila Bible Doctrine zirh heh tumah om leh ngawl la si. USA ah riang Sawm ah pakhat lun ngawl om ngawl si.

                   2 Tim 4:3:Heimansim tilekhaw amahni’n zirhnak (Doctrine) man taktak heh a za zongawl hun leng tu atsia, a beng a thak man in amahni otnak lun in amahni tsa zirhtu tampi ko tu si, amahnin thudik kheh ngai nuam tu ngawl in ….” Me thu heh tuhen a kim tseih ong la si. Na pomnak Zirhnak (Doctrine) hei a? Na leng min, na ding min, na thei ngawl le khaw? I Tim 4:16: “Nangmah ah na zirhnak (Doctrine) tsimkom la tsimi te kheh puah reng veng in. Tsimi bang in na puah asilekhaw nangmah le na thurelnak a zatu te san thei tu si tsi.”

Nang thei ot asi lekhaw mai lam in ng tar sak tu sing pakhat pakhat in.
Pathian in Van tsimnak ng pe ta sen!

Ngantu: Saya Mangpuh (tulai tak Singapore ah Bible zir in om si)

Nu le Pa te'n Tsate nenah tangka kul ngawl RO a pe theih pa ( 3 )

1. Pathian thu
                    Nu pum sungpin a suak minung tutu nenah Pathian thu a rel, a zirh masa bertu heh a nu le pa te si. Pum sungpin Pathian thu a zirh theihlam te vang nganleh tu ngawlla sing. Nau thaw a ompi tamsawntu heh Nute si si. Ni khat sung rori nau thaw a khawnenber ah na om phang heiha na puah veng? Mileng te thaw midang senak bekbek te ha nau maiah nang awntawp veng? A pha le a se heimah thei lai ngawl tsate luak ah Pathian thu na thun ma mi relsenak le awn pha ngawl te na thun masa a si lekhaw na kawngngiah a pha ngawl kheh na tsate tsa ro sesuak na roh thaw bangdun si.
                   Pa rekkhat te'n tsate Pathian thu rel heh Nu te pervo ah a koihtu Pa khen om lai sising. Inn sungsang ta eih le in, tangka kei zeisak ongla nungsang tawk ala ti ruak kha popo ol a sing. Tsate thinlung ah Nu te thurelnak le Pa te thurelnak heh dangdun si. Tsate kiangah a om lai Pathian thu kei rel ngawl a silekhaw kei nenpin a khawla nak mun ah a leng phangin Pathian thu sungah a om lehngawl thu za phang thinna in sir leh kha tu sising. Inn sungsang pin Pathian thu thaw a khang naupang le Pathian thu sungah a om ngawl inn sungsang pin a khang nauphang heh a heihei lamah sikhen dangdun ver si. Tsimi a sita tsate taksa le thinsen sungah Pathian thu thaw a dim theihnak tuh Nu le Pa te pervo si. Tsate nenah leivum thil le ri ah le theihnung ngawl RO tsungnung a roh ngahtu Nu le Pa kei si theinak tuh Pathian in nu le pa nang veksen vumah muitsu kei burh tasen.

2. Unau itdun dan zirh
                   Tuni tian ka leng min khaw le ram ah ka musuak nak pakhat heh nau u itdun, sunsak dun a thiamtu le nau u dang heimah siar dun ngawltu te tiheh si. Nau u (nu khat pa khat pin a suak te) riang itdun thei ngawl tih unau pi (Nu sungkhat lam le Pa sungkhat lam), khaw le ram it thei tu heh limdiknak kohno khen om ngawl si. Nu le Pa te zamzawh ah haudun in ro tuhtu minung khen ka mitmuh rori ah ka mu nak tampi om si. Nau u pakhat le pakhat thinlung mun khat no ah a om in a itdun theinak tuh heh Nu le Pa te nenah pervo nei si sing. Tsate nenah nau u hawdun nak maw? itdun nak Ro ha na roh tuh?

3. Muitsu
                  Nu le Pa in lamvum ah muitsu a neituber ti a sin sual lem tu ngawl sing. Heitasim tiphang mi pakhat khat sumdawng nak ah a lawhding phang a ni menah a nu le pa muitsu ngah ta si ti veng si sing. Muitsu a nei bangpah in tamse nak khen nei sing. Muitsu pe dantuh thei ngawl khen om lehleu sising. Tsate nenah muitsu zong pe dan tuh thei ngawl in tsate nenpin tangka bekbek ngentu nu le pa si kha na sing maw? Ram dang om tsate'n inn lam phone a set lamtang phang sun le zan in nangma/nang inn sungsang ta sawn nang ngen sak veng sing khaw thanau popo mah na un tima lamsang ah tangka thu ah awnsol dun in phone card bo tiartu Nu le Pa khen om lai si. Tsate vumah limdiknak a neitu nu le pa kei si lawlaw nungsang ah tsate hem vum ah muitsu bangrep in pe in. Tsate vumah muitsu a pe dan thiamtu kei si theih nak tuh Pathian in muitsu kei pa tasen.

Ngantu:
Nawn Thang

UMTU PO PAN HUN A UKNAK OM DAN

UMTU PO PAN HUN A UKNAK OM DAN

Ngantu: Saya Thian Za Uk (M.Div)

Umtu Christian po pan hun lai in Mediterranean zawlai lian ngai sung hemah sakhaw benak a lun e maw a ther e maw zai tsiar heh uar ngai si. Jesuh heh Kumpibawi Augustus san in suak si in, timi tselh zawh raldo hun san reipi sung hen me Mediterranean tipi le a kiang zawlai hem kheh Rome ten le atsia uk si. Augustus heh Rome uknakk pi sung ah ram uktu masaber si atsia, timin a si theinak tuh in a Papa Julius Caesar hampan saknak si. Julius Caesar heh silekhaw Rome rampi sung ah remnak (peace) leng tsiar tu le mipi thunei nak dan hem a botsiar tu si in kum zalom nih sung lun tsian in ral do nak om ngawl si. Me Mediterranean tipi zawl lai a te heh tima ong in uknak dan pakhat thunei nak  nuaiah veikhat khen om ong ngawl bek zongawl tibang hen sah nung no in khen om ong ngawl si.

Rome ram dapnak (Pax of Romana) hen ruat nak le sakhaw be nak te zai thei nak tuh in khen puah si. Bek zongawl in ram sung suk so vak beih thei nak tuh in lampi te khen puah atsia, sum dawng nak lamah khen nase ngai in khang so si. Tin me hun sung ah Greek awn le latin awn bek heh rampi in mang si. Latin awn tah in Greek awn heh khawpi mun tam sawn in mang si. Awn hin nih bek a mang nak hen a mah ni le amah ni sungah mi pawl nak a beih bek zongawl biak nak sa khaw lam khen a rang ngai in zai pi si. Tin Greek awn le lai a mang tu tam sawn heh Mediterranean Ni suak nak lamah om te pawl si. Egypt ram a Alexanderia khaw ah om te hen Greek phun nam dan heh tupi tsan sawn si. Tin Greek awn heh Rome khawpi sung, Sicily sung le langlam Italy ah mang bek zongawl Gaul langlam khawpi sungah le Mediterranean saklam ah khen mang si.

KUM ZALOM MASA PATHUM SUNG A UMTU ZAIDAN

THE EXPANSION OF CHRISTIANITY IN FIRST THREE CENTURIES

Kum zalom masa pathum sung a umtu te zaidan heh me Rome uktu te thuneinak thaw umtu masa te reemnak hen theihdik in om si. Rome ram uktu Augustus in a rampi sungah remnak (dainak) le hausa nak thaw in a thih ni AD 14 kum tsain in uk si. Rome ram uktu Trajan in AD 116 kum in Rome ramri  heh kauh tsiar doh leh in timi ah a le nak khaw te heh Dacia, Arabia, Armenia le Mesopotamia e heh si. Tin me hun lai in Rome rami (citizen) te tsa in khual vak hawh suk hawh so heh baih ngai si.Hei ta baih ngai sim ti le khaw , me Rome te  san in awn pakhat bek (Greek awn) mang bek zo ngawl tangka mang nak te hem khen heh bang si. Tin lampi tinak tak hem khen heh Rome khawpi leng ngawl om ngawl si.

Jesuh khrih thing lamteh vumah a thi zawh, Paul le a rualpi Judah mi ninglun (Apostle / Follower) dang te lamhuai nak in Jesuh Khrih san ti le ninglun te san ti’n khen si. Tin Pthian thuthang pha heh Palestine ram leek tsian in leng si. Jesuh in a ninglun (Apostle) te Gentile te nenah thuthang pha phuang tu in thu apenak bang in Greece ram le Asia ram (Asia Minor) mun tampi ah ninglun ten Pathian thuthang phuang in vak si. AD 100 kum in Rome uknak ram Ni suak nak lamah pawlpi din in omtu a kham pelh khen, kum zalomthum dawl lamah Gentiles umtu te benak (religion) sakhawbang in zai theih tawp in saklam ram Roman Britain tsian in zai si.

A pan lai in thuthangpha heh Jerusalem ah om Judah mite nen ah leng masa atsia, Pentecost ni Peter thu thang pha phuang nak minung thawng thum ten san nak ngah si.

THUTHANGPHA ZAINAK SAN TE PAWL

(THE FACTORS CONTRIBUTION OF THE GOSPEL)

            

               Kum zalom masa pakhat nak hun til-lem no sungah Pathian thuthangpha rang ngai in le nase ngai in zai si. Timi thu thangpha rang ngai in a zainak san ber te heh me a nuailam a bang te heh si.

           

                 Alexander lian (Alexander the Great) in hun reipi sung leivum pi uk thei tu heh a otnak ber a si man in, a rampi sungah Greek awn le nam miphun dan te pawl lun tu in le mang tu in thu suah si. Tin a ralkap te nenah khen ram sung mi nupang te bek zi tuh in huai un ti’n so si. Timi bang hen a ti nak ah thil a shuak heh silekhaw awn hin khat (Greek awn) bek kheh mang dang atsia, me Greek awn heh mi hem mang nak (common language) awn in le zungah mangnak awn (official languge) in suak si.

           

                Rome uknak pi hen me Greek uk nak pi heh le in a luah phang in, me ram sung henah a om miphun le nam dan hin tampi peh si. Tin Ni suak nak lam pin sel tuh in len nak te hem khen heh amah ni phun le nam dan hem zam in me Greek phun le nam dan heh lun in Greek awn mang si. Timi man in Rome uk nak ramsung ah khen me Greek awn bek heh pakhat le pakhat awn pi dunnak in mang zom si. Tin Christian umtu masa te pawl khen heh me san sungah om te a si man in Greek awn, Greek phun nam dan thaw om si. Me man hen thuthang pha heh rang ngai in zai si.

            

               Thu thangpha rang ngai in zai nak san masa ber heh silekhaw thu lun nak si. Jesuh in a ninglun te nenah puah tuh in thu a zam nak bang in a ninglun ten niam khiat nak thaw Raula tinggrim kheh ngak dang a tsia, Pentecost ni in Ralau thiangrim a tso dang tsel phang in thu thang pha phuang in vak pan dang si. Me Raula thingrim bawmnak peh ngawl in Jesuh ninglun umtu ten thil ti theinak heimah nei ngawl si. Tin a dang pakhat leh heh si lekhaw Lai thiangrim (LTR) thu kham ther sungah ngan nak “Hun a kim phang in Pathian in a Tsapa kuat suk si. Thing lamteh vumah zatsak mual pho nak thaw leivum pi sual nak tsa thi si” ti hen mi thinsung ah tuar ngam deve thei nak tuh in thu ruat nak pe si. Bek zo ngawl in Jrerusalem a umtu masa te pawlin Judah danthiam upate penak reem nak kheh a lau man in Jrerusaalem khaw kiangkap khaw le ramah daan sep dang si. Timi a daan nak khaw le ramah om men ngawl in a sung ah a om  nung reng Pathian thu thangpha keh tawl ngawl in phaung si. Timin phuang le rel in a om nak thu thangpha kheh Rome uk nak ram pi sungah zai in om si.

             

                   Pakhat le pakhat upat dun nak, pe nak, tarah te le bawmtu nei ngawl te bawm nak, pakaht le pakhat it dun nak le Bawipa tsa ti in umtu masa ten nun nak tsian liam ngam in le tuar ngam in a om nak man in umngawl tu te thilung hip (le) in raula pai tam pi san suak si. Umtu masa te puah le pernak man in Pathian thu thangpha heh rang ngai in zai si. Rome uk nak pi in kum khaw a nung Pathian thu thangpha umtu te phuang nak kheh timit tum in umtu te vumah reemnak a phun pe in umtu te rek in a om pelh khen Pathian nen pin a leng thu thangpha kheh timit thei tsuang ngawl si. Umtu masa te thisen lungnak nak man in le tuar nak te man in leivum pi ah thu thang pha zai in om si.

AD 100 – 313 HUN SUNG CHRISTIAN REEMTU TE
(THE PERIOD OF PERSECUTION DURING 100 – 313 AD)

             Christian te reemnak heh Jew te kut sungpin pan masaber si. Tsimi zawh a rei ngawlin kumpibawi Nero in AD. 64 kum in Rome khawpi mun leinih ah meikang suaktiar in, Rome khawpi hal si. Me khawpi a halnak manin mipi thinraw sosang kheh a lau leita in a luat theinak tuh tiin Christian (umtu) te halnak si tiin nawn si. Tsimi manin umtu te rekberh tuin thupe si.

           Mepa reemnak manin Christian tampi te nunnak liam si . Mepa san sungin Apostle Peter heh amah rori in napertu ralkap te nenah a ngennak bangin Rome ralkap ten a lehlawk lu buksuk (lu lam nuai tak) in thinglamteh vumah  rek si. Tsin Apostel Paul asilekhaw a ngawng ten in rek si.

             AD. 16 kum in, Marcus Aureline kut sungpin Christian te reemnak suak lehleu si. Mepa hun sungin Apostle te Pa(Apostolic father:- i.e. Jesuh khrih’ ninglun apostles te luntu te pawl heh Apostolic Pa ti’n ko si.) Polycrap aheh a umnak manin mei thaw halnak tuar in thi si. Tsimi hun sung pahin France khawpi panih, Lynos le Vinne Christian ten khen reemnak tuar deve si. Vinne khawpi pin Santus, Maturus, Pergamos pin Attalus le nupang Blandina, mete hem hen nase ngai in remnak tuar in thi si. Marcus Aureline umtu te reemnak heh AD.161 pinpan AD. 180 tian rei si.

               Kumpibawi Severus san AD. 200 kum in, umtu te reemnak ah Perpetua khen thi si. Tsin AD. 235 kum in suangbawi Maximinus in umtu hem tsimit veng tu in thu suah atsia, tsimi a thu suahnak kheh Rome ralkap pakhat in eel in umtu a silam kheh phuang si. Tsimi phangin amah kheh thawnginn sungah khum in thi tu in thupe si. Pammachius in Rome te hluatdaw upa(senator) le umtu dang minung sawmli panih (42) te hem kheh nikhat sungin a ngawng ten berh si. Quritus, Rome te mipha,mi mingthang (nobleman) heh, a inn kawpi te le a sel te hem kheh nase ngai in reem in, thi tu in thupe si. Martina, nupang pha mingthang (noble young lady) heh a ngawng tensak si. Tsin Hippolitus, umtu upa ( bishop) heh ri thaw henpek in lei lakah a thi ma hem sipuh in nuktiar si.

              AD 249 kum in , suangbawi te theipinak peh ngawlin Alexadria khawpi sungah umtu te reemnak suak si. Mertrus, Alexandria khaw ah kum reipi umtu si ongla pa kheh vaatduk in, lungto thaw dengreih si. Quinta, umtu nupang pakhat heh lungto hiam ngai vumah a kawng pin ruantsum het no in nuk atsia, a dawl taber nak in lungto thaw dengreih in rek si. Apollonia le nupi terber kum sawmsarih tuzep hen umtu a silam kheh a phuang manin, ri thaw hen ngawl pelh napikhaw, me nupi nu hen tibang hen ruatnak nei si. Timi heh tungtu a ka phuangnak umtu ka tinak la si ngawl sing ti in ka tileh tuh sa-am ti a ruattseih laitum in meipi sungah lonnak ngah in thi nom si.

                      AD.249 kum in Decius Pagan temple sa atsia, timi kheh Empheus in khawpi sungah a om mihem nenah bawlnak le raithawinak pe in milim te be tu in thupe si. Tsimi thupenak kheh a kutnuai a ralkap sarih; Maximinanus, Martianus, Joanner, Malchus, Constantines le Sarion ten lun zuam ngawlin eel si.

                  Tsin Theodora, Antioch pin khangai mawi ngai pakhat in Rome te milim nenah bawlnak pe nuam ngawlin a eel manin thawnginn sungah khumnak tong si. Ama manin a thalawhpa vumah thupenak le a erhnak te a thei phangin, Theodora kheh om thei ngawl in thukhentu te maiah hawhper atsia amah si ngawl si, keimah sawn si a tuartu tuh ti in ngen si. Tsimi phangin thukhentu ten a panih a ngawng keh tensak in a ruang te kheh mei sungah hal si.

                AD. 257 kum, suangbawi Valerian san in Rome a upa Stephen(bishop of Rome) kheh a ngawng tensak si. Saturnus in milim nenah bawlnak a pe nuam ngawl manin a kawng pin ri thaw hen atsia kawlpaw mei ah khit in temple pin nuktsiar in a lu kehreih in a luak te leilak ah thehsep in thi si. Lawrance aheh asilekhaw vaatduk atsia ri thaw hen pek in a nungtsa in buhkang sungah kio (roaste) si. Mirang te sung pin martyr tuar masa bertu heh Alban ah si. Thukhentu ten amah heh Christian a si lam tsiangno in theinak a si ta, milim nenah bawlnak pe a tsi maw, tsi ngawl lekhaw, thi ot sawn ha tsi khaw? tiin thu dong atsia, Alban in milim nenah bawlnak pe tahin thi tu deng sawn sing ti si. Tsimi a deng tselh phangin thukhentu ten a ngawng ten nom si.

              AD.270 kum in Christian te reemnak heh suangbawi Aurelian kutsung pin pan lehleu si. Me hun henah Rome Bishop(Bishop of Rome) Filex aheh a ngawng ten in rek si. Tsin Rome khangno pakhat heh asilekhaw minei ngawl tsarah te nenah tangka dawmlaino pe in a bawm vengnak kheh Christian si tsi tiin nawn atsia, len in Rome khaw kiangah a om Preaneste khawpi ah huai in, tsimi munah a ngawng ten in rek si. Mehun sungah remnak a tuar te ming khumnak heh tihemno bek om si.

               Maxentius aheh lekhaw Rome uknak (Roman Empire) pi sungpin a dawltaber Christian te reemtu pa si in, kum zathum(300) zongawl Christian te zohsuam nautat nak, reemak le thihnak tian tuar tselh zawh AD.313 kum in Constine in Rome uknakpi sungpin Christian te suah zalennak pe si.

AD POPAN KUMZALOM PATHUM SUNG CHRISTIAN TE REEMNAK A MAAN

       (THE REASON FOR PERSECUTION OF CHRISTIANITY IN THE FIRST THREE CENTURIES AD)

                AD popan lam kumzalom pathum sung ah umtu(Christian) ten Rome uknakpi ah penak reemnak tuar si. Tsimi reemnak a tawknak a maan heh ;-

1. Sakhawlam pin reemnak a maan

                Sakhawlam thaw pan lekhaw Christian te reemnak a maan heh a heitaber ti phangin umtu Christian ten uktu te nenah siah a penuam ngawlnak manin le ,Suangbawi upa te upat a pe nuam ngawl bek zo ngawl, Rome uknak thuneinak thaw puahnak milim maiah kunin be nuam ngawlnak manin Christian ten reemnak nase ngai tawk si. Tsin Christian te hen milim benak sakhawlam thaw a pehzom dun puai ti bangte ah le ralkap lut tu in sawm in huainak khen naap ngawlin eel in puai ti bangte khen a peh nap ngawl ta si.

                Rome uknakpi a thuneinak thaw puahnak milim maiah kun in bawlnak a pe tehem heh Rome uknak thulun te si ti atsia, a kun nap ngawl bek zongawl bawlnak pe nuam ngawl te heh Rome uknak dotu te si ti’n ti si. Tsin Christian te hen kumpibawi Caesar kheh kumpibawi si ti in khen phuang nap ngawl si. Heitasim tilekhaw Jesuh Khrih pakhat bekheh kumpibawi si in be tuk tatak si tiin ti si.

2. Uknaklam pin reemnak a  maan

               AD 64 kum in, kumpibawi Nero in latsang tsom a sa sungin Rome khawpi sung mun leinih (12) ah meikang suaktiar in, tsimi a suaktiartu heh amah si ti a nawnnak pin a luat theinak tuhin Christian te nawn atsia, Christian te reemnak nase ngai in pe si. A panihnak silekhaw, Rome uknakpi hen Khrih uknak ram(Christ’s kingdom) heh tibang memen si tu ngawllai si ti Christian te phuangnak a theithiam ngawl bek zongawl mitampi te Chrstian umtu in a suak manin , Rome uktu ten Christian te thuneinak le huaidunnak nase ngai kheh Rome uktu ten Rome uktu te thuneinak te hem kheh bo kha tu ti a lau manin Christian te reem si.

               A pathumnak heh silekhaw Christian te heh minung taksa ei in, le thisen in, i.e. Jesuh Khrih turnak phawk rengnak tuhin mangnak Bawipa simlai, thei te si ti a ruatnak si. Tsin Christian te hen lungkaw sungah tawkdun dang vengin Pathian thangphat in itnak laikuang (love feasts) te kil dang atsia, itdun dang ngai in le remdun dang ngai in om dangin pakhat le pakhat upat pe dunnak le itnak langtiarnak in ka U/Nau/Ternu tiin a kodun dangnak kheh midang ten theithiam ngawlin me Christian te heh nu le pa sinak mang veng (Sexual perversion) te pawl si ti in nawn lehleu lai si.

3.Mihem nen pin reemnak a maan

                  Christian te reemnak san tampi om siin, tua a vumlam a ngannak sakhawlam pin remnak san le uktu lam pin reemnak maan te bek zongawl in mihem nen pin reemnak san te khen om si. Tsimi mipi/mihem lam pin Christian te reemnak maanber heh hei zongza Rome khaw ah thil a leng te le thil a tsang te hem;- Rikam dungnak, natse phangawl te, lianthing te, le nikhaw phangawl te pawl a lengnak heh me Christian ten Rome thuneinak thaw puahnak milim maiah kunin a be nuam ngawlta si tiin Christian umtu te pawl nawn dang si.

                 Me thu te manin AD popan kumzalam pathum a Christian masa te pawl hem heh nase ngai in Rome uknakpi hen remnak pe si. Tsimi bek zongawlin Rome uknak nuaiah a om minungpi te hem in khen ral bangin nam a tsia reemnak nase ngai penak kheh lungkimpi dang ngai si. Tsin mipi ten Christian sakhaw a mudan heh silekhaw a umnak manngawl thaw zirh dunnak sakhaw pakhat in um ten dang si.

                              CHRISTIAN TE REEMNAK MANAH THILTSANG TE
                                                   (THE EFFECTS OF PERSECUTION)

                 Christian te reemnak man hen thil panih suak in, a phalam le a selam om veve si. Tsimi a phanak lam le a senak lam te heh me a nuailam a tsomtsiangno in ngannak bang te heh si.

1. A phanak lam

            Christian te reemnak heh pawlpi vumah meiburhnak bang si. Reemnak nase ngai umtu te vumah a leng ma dapnak thaw a dimlai in, mitampi te thinthengnak khen ngah lem ngawlin, le Pathian nenah aaptsawmnak le pumpenak khen nei lem ngawlin Christian sakhaw sungah lut ten si. Sipelhatsia tsimibang hem kheh me reemnak nase ngaipi hen thiangtiar(purify) leh si. Me reemnak man hen Christian te munkhat bek om theihnung leh ngawlin a daan min khaw le ram hemah Pathian thuthangpha phuang in,a ram kau tiar si (Matt.28:19-20). Tertullian in, “Martyr te thisen heh pawlpi a laitsi si,” ti’n ti si. Mi ralpha te tuarnak le midang te tsa nunliamnak hen Christian te umnak a manhar dan langtiar si. Me miralpha te tuarnak le nunliamnak manin mitampi ten Christian sakhaw sungah lut si.

2. A senak lam

               Christian te nenah nase ngai in remnak a leng phangin, mi zahlam tampi ten a umnak pin ningtolh si. Tsin Christian reemnak om leh ngawlla in a dap phangin pawlpi sungah lut leh ot in, umnak pin ningtolh ngawl te hen thunei sawn ot in, tsimi ah hun reipi sung buainak suak lai si. Tsimi hun lai a umnak pin ningtolh dan te heh hinthum in khen theih si;-

1. Sacrificat – Milim sakhaw benak ah bawlnak a petu te.

2. Thurificati – Rome uktu te thuneinak thaw puahnak milim maiah meihal bawlnak a petu te.

3. Libellatici – Milim sakhaw benak ah bawlnak le Rome uktu te thuneinak thaw puahnak milim nenah meihal bawlnak pe ngawl pelh napikhaw, reemnak pin luat theinak tuh ti in uktu thuneitu te nenah theipinak lai tangka thaw a lei te ti’n khen thum in khen theih si.

Meeting Puahdaan

1. Parliamentary Procedure tinak heh?

            Parliamentary tsi awntsang heh "Parler" ti si atsia France awn pin aleng si. A ti nuam nak heh "Awn (talk), thureel dang (Discussion)" ti si si. Procedure heh "thil tidaan/puahdaan" singawl lekhaw "thureel daan" tinak si. Tsimitsa Parliamentary Procedure heh Meeting huaidun daan singawl lekaw Thureel daan ti'n suak si. Parliamentary Procedure heh meeting huaidun daan bek zo ngawl Pawlkom huaitu, tangka kiltu pinpan committee tianah napertu te pervo le thil titheinak tutu in khen nei veng si.

2. Meeting: a muril le tidaan te

              Meeting puahnak man heh pawlkom pakhat ah tumtahnak puahsuak theinak tuh si. Meeting ah a muril le tidaan te heh mipi lungkimnak ( democracy system ) vumah hambun in puah nak si. Meeting puah phang in

A. Zalen ngai in awn thei

              Meeting ah a pehtu in a ruatnak le a mudaan te zalen ngai in reltsiangnak le phuangnak khuan nei si. Tulai Pawlpi tam sawn heh mipi lungkimnak vumah koih in naper te si sing.

B. Khat le khat upat dun tuh si
             Huaitu in a huai nak ( member ) te sisen huai nak ten khen huaitu te upat dun no in thu reelkhawm kul si.

C. Dingnak le bangrep no in pan dun thiam kul
            Meeting kaitu lehnak ten thusuah theinak le lungkim ngawl nak te rel theinak, mee laak theinak tite pawl bangrep in nei si. Chairman in khen meeting kaitu hem me ( vote ) a bangrep thil titheinak nei lam thei rengreng kul si. Khat lam kan/bawm deuh ti om ngawl in thumaan/dik nak thaw meeting huai kul si. Meeting kaitu pakhat ah nainok thei awnkam awn ngah tuh ngawl in, deih daan bangdun ngawl manin khat lam te awnkam ringpi in awn/au, muniamnak le thil a ti theinak kham sak tuh si ngawl si. Dik ngai in meeting huai, awnkam neemno thaw mang thei tu heh a thupi ngai le a ralring tuh si.

D. Pakhat tselh pakhat hawh tu             
             Thu pakhat tselh ma in a dang kaan, thu dangdang relkhawm tuh si ngawl si. A sangsang ( step by step ) in hawh pi tuh si.

E. Mi tamsawn deihnak lun tu
              Keimah ni deih nak thaw a bangdun ngawl a si khen mi tamsawn OR a zahlam tah tamsawn aa deihnak thaw reeltselhnak vumah lungkim no in lun kul sising. Mah deihnak bang a singawl tsa per napngawl puah napngawl ti heh huaitu pha si ngawl si. American President Thomas Jefferson in "me pakhat no in a neh a si si khen mannei ngai in upat tuh si" ti si.

F. Mi dawmsawn thil titheinak
            Mi tamsawn deihnak lun tu ti phang a veksen vumah thunei nak ngah veng tinak si ngawl si. Mi dawmsawn ah deihnak zam/muniam men pongawl in ngaihsak kul si. Mi tam mi dawm ruat komkhawm in hawh thei tu heh Democracy ah muril a si tsa a dam Pawlpi hawhpi daan phun khat si.

G. Pawlkom pakhat sinak diktak thei theinak khuan nei
           Member pakhat ah a rel nak Agenda bek singawl Agenda thaw pehdun thula a thei ot lekaw Chaiman singawl lekhaw huaitu pakhat dong tu atsia thup nak heimah om ngawl in rel tuh si. Thudik thei phang bek thu laireelnak puah theihnung a si tsa thunok, thu tsiang ngawl nak te Chaiman nenah dong theih nung si.

3. Meeting phang lun tuh te pawl
 
A. Baible thaw hawhkawm tu
           Christian ten Baible thaw a kalhdun thureelnak puah tuh si ngawl si. Thu pakhat khat ah Baible thaw a kalhdun om kha a si lekhaw Baible sawn lun tuh si. (I Tim 3:2-3)

B. Constitution le By-Law
          Pawlpi le Pawlkom dik ngai ten Constitution le By-Law nei si. Me daan te pawl bal in thureel tsiangnak puah theihnung ngawl si. Pawlpi ah nei nak Constitution le By-Law bangin na kei per thei ngawl a si lekhaw kei Constitution le By-Law te panlehnak nei atsia a rem kul te remleh sawn tuh si.

4. Meeting huaitu le member te pervo
 
A. Chaiman
1. Meeting hong le huai
            Constitution le By-Law, meeting puahdaan bangin meeting huai kul si. Meeting kaitu te ruat daan le mu daan te zalen ngai in reel theinak hun hong sak tu.
 

2. Kan/Bawm sawn nak nei tu ngawl
             Khat lam kap theinak hun pe tsuang, kham tsuang nak mitmai thaw sisen om daan thaw sisen puah himhim tuh si ngawl si. Thubur pakhat ah a mah rori in a reelpi ot a si lekhaw a naper heh Vice Chairman nenah a ap tselh zawh phangbek mipi bangin reel theihnung si. Chairman awn tam tu ngawl tinak si.
 
3. Kilkhawitu
           A tsantsan ah thurel nak tumtahnak thaw a pial, thudang rel le thureel ot nak mipi a theitsiang ngawl a om phang tsiang ngai in rel atsia lampi man ah leng theinak tuh in huai tu tuh si.
 
4. Hun man no in mang tu
           Hun tsek nak ah meeting tselh thei tu'n thu nepnawi reel tam tuh ngawl in kilkhawitu si.
 
5. Me bangdun a om phang thu laireel tu si
           Thu pakhat reel nak ah me le kul phang me le in a bangrep a si lekhaw a deihnak lamah Chairman in me pe nak thaw thukhen tu si.

B. Meeting kaitu te pervo le titheinak
1. A deihnak porhsuak thei
          Hun tsek nak sungah a deih daan le a mu daan zalen ngai in reel theih nung si.
 
2. Ngai tuh pervo nei deve
          Meeting sungah thureel nak te phatak no in ngai kul si. Tsimi phangbek ama reel ot nak thu le midang thu thaw bangdun thei tu si.
 
3. Meeting tselh tian om tengteng tu
         A hun man no in leng tu atsia a tselh tian om kul si.
 
4. Meeting nainok tu ngawl
          Mi thureel laiah midang thaw awnpi, pulam ah suak lut in meeting thinlung nainok tuh tianin puah tu ngawl.
 
5. Me pe tu pervo nei
          Thureelnak pakhat khat ah me pe kul a si lekaw a deih nak lam ah me pe tu. Khat lam khat lam me pe ngawl in a lai ah om tu ngawl.
 
6. Bawm tu pervo nei
          Meeting ah mi tamsawn lungkimnak vumah lungkim ngawl a si sikhen bawm tu pervo nei.
 
7. Awnkam ralring tu
          Meeting puah laitum in mi pakhat sinak muniam in le awnkam mawi ngawl mang in thu reel tu ngawl.
 
8. Khuan ngen tu
          Awn ot nak a nei lekaw Chairman lam pan in " Chairman " ti'n kuttung in sisen awnkam in sisen kuan ngen tu atsia Chairman pan khuan pe zawh phangbek thu reel tu.
 
9. Tsom tsiang in reel tu
           Meeting ah thu  reel phang sermon bang, thusonak reel bangin hun sangpi reel tu ngawl. Reel ot nak tsom tsiang ngai in rel thei zuam tu.
 
10. Thu pakhat ah vei kawzah reel thei?
           Mi pakhat in vei 2 tianbek awn thei si. A thusuah pi nak midang in a theitsiang ngawl OR el rimrim nak tawk a si lekhaw vei 1 relleh nak nei thei. Mi pakhat in thu pakhat vumah awng nomnom tiheh " meeting daan " in kham si.

5. Meeting a phunphun
 
A. Regular meeting
              La khat vei 1 department meeting le general meeting ( tsek nak nei meeting ) te si.
 
B. Adjoumed Meeting
              Meeting tu mi tsek nak mipum kim ngawl tsa a ni thawn nak meeting si. A vei 2 nak meeting ko leh phang mipum kim ngawl sikhen a leng hem in meeting puah theihnung si. Amasa meeting program bang rori in puah leh tuh si. Meeting program theng theihnung ngawl.
 
C. Emergency Meeting
             Meeting puah veng hun tian ngah theihnung ngawl thu om phang Emergency Meeting daan bangin puah theih nung. Meeting ah mipum tsek nak a kim ngawl a si lekhaw a ni thawn in meeting puahleh tu ti ngah ngawl si. A thupi taktak bek ruat in reel tuh si.
 
D. Extra-Ordinary Meeting
            Meeting thupi bangin puah veng hun ngak thei ngawl a si lekhaw meeting thupi tin ko theihnung si.
 
E. Co-Ordination Heads Meeting 1
           A thupno in meeting puah nak si. Tawhkuan, nundaan pha ngawl le Pawlkom siatsuah thei hampi thaw pehpar thu te reel tu phang ko nak meeting si.

6. Me pe daan pa 6 

A. Kut tung ( show of hands )
B. Ding in lungkim lang tsiarnak ( rising vote )
C. Awn in me pe ( voice vote )
D. Khan dang in khen ( division of assembly )
E. Thup no in me pe ( secret ballot )
F. Mipi lungkimnak in reel ( general confent )

Rev.Dr. Sang Awi,"Meeting tuahdan"Vankau Arsi.vol.10.No.1 may,2007.

Umtu Christian te Kawtin Nung Tu

1. Jesuh Khrih  na umnak manin kumkhaw nungnak na ngah ongla lam um tsiang in (John 5:10-13)

2. Pathian le midang te it in (Mark 12:30,1 Thessalon 3:12)

3. Bible siar, ruat, in theidik zuam in (Saam 119:105;1 Peter 2:2; Ephesa 6:17)

4. Jesuh Ming sirhsan in Pa Pathian nenah nitin sawngen reng veng in

(Ephesa 5:20; 1 John 1:9)

5. Midang lakah Bawi Jesuh thu rel la phuang reng veng in

(Dung 8:36-38; Matthai10:32; Acts 1:8; Rome 10:13-14)

6. Sualroihnak lamzin pin pial in (Saam 1:1; 1Kor. 10:13; Matt. 6:13)

7. Angngai in Pathian na per in (Saam 100:2; Hebru 10:25; Kolosa 3:1-3)

8. Pathian Awnkam Bible ah khongai in ding in

 (2 Peter 2:1-3; Isaiah 8:20;1 Kor. 15:58)

9. Raula Thiangrim thaw tsetngawl om in

(2 Kor. 13:14; Kalati 3:3; 2 Kor. 3:18)

10. Umngawltu te nuntsan tsung mah nen

 (2 Kor. 6:14-18; 1 Timote 5:22; John 17:15-16 )

11. Midang te sualzah in (2 Kor. 6:14-18;1 Timote 5:22; John 17:15-16)

Uk Mang

Pathian Deih Nak Umtu Nuntsan

Pathian Deih Nak Umtu Nuntsan
          
Khrih sannak tsoin mither sinak nei tuheh umtu taktak si theinak tuhin a masaberk kul nak
si. Tsimibang, umte teheh mungnungtak in Pathian ram tsa le A pawlpi (church) tsa naper
tu kul meek si. Umtu te nunah Pathian in a tuurnak thu dawmlai ruat dang a sing.

I. Bible siar nun
Bible siar heh Pathian deihnak kei thei theinak tuhle sualnak kei pial, neh zo nak si
Acts 17:11; Psa. 1:2; 2 Tim. 2:15; 3:16,17.
-- Bible siar in nun pi tuin tumtah tsim maw?

II. Sawngen nun
Sawngen tinak heh ngen bekbek singawl in, thangphat, angnak thu rel, Pathian awnpi,
Pathian  thu rel tuh ngai le kun le ngen si sawn si....
Phil. 4:6; 1 Pet. 5:7; Matt. 6:9-13; 1 Thess. 5:17.
--Ngen bekbek ngen in paak phawk ngawl si kha sing maw?

III. Umtu te Pawldangnak nun
Umtu masa te nun heh pawldang in remdang in, Pawlpi khansonak tsa naper dang si.
 See Acts 9:26-28; 11:26; Heb. 13:17; 1 Cor. 1:2; Eph. 4:16 (cf. next point).
--Kei unaupi umtu tethaw le Pawlpi thaw remin na per dang sing maw?

IV. Pumkhawm thanuam nun
-- Acts 20:7; 1 Cor. 16:1,2.
Pumkhawm heh kei naper siin Pathian deihnak khen si si.
 Heb. 3:12,13; 10:24,25; John 4:24; Eph. 4:16; 1 Thess. 5:11; Acts 11:26; 2:42; 1 Cor. 14.
--Pumkhawm hawh ngawl in inn ah to men kha bang?

V. Remnak
* Innsang ah-- Eph. 5:22-6:4; Col. 3:18-21; Tit. 2:4,5.
* Mi harsa, dasam, nauta te thaw-- Luke 10:25-37; Acts 20:35; Jas. 1:27; Matt. 25:34-40.
* Uktu bawi le uk nak te remnak -- Rom. 13:1-5; 1 Pet. 2:13,14; Matt. 22:17-21.
* Naper pi te thaw remnak -- Eph. 6:5-9; Tit. 2:9,10; Col. 3:22-4:1; Psa. 37:21.
--Ziangtin mi thawn pawlkomnak kan that ter ding tin na zuam dah maw?

VI. Midang kha Jesuh Hnehah Rak Hruai Aw
Jesuh Khrih thu sim in zirhawk ding cu zumtu hmuahhmuah in tuanvo a si.
 Acts 8:4; Prov. 11:30; 2 Tim. 2:2,24-26; John 4:28-30,39; 1:40-46; Heb. 5:12.
--Jesuh' rundamnak thu na phuang theilo hman ah na tuan theimi tuan aw

VII. Nun thiangrimnak
Umtu teheh nun thiangrimnak nei kul si.
Mark 7:20-23; Rom. 1:26-32; 1 Cor. 6:9-11; Gal. 5:19-21; etc.
Kei sual kha, khelh kha phang sualsir in Pathian nen hong leh a sing?

VIII. Pawlpi thungai nun
Pawlpi thaw rem in a thungai in khansonak tsa naper kul sising.
1 Cor. 5; Matt. 18:15-17; 2 Thess. 3:6,14,15; Rom. 16:17,18; Tit. 3:10,11.
--Pawlpi sungah remngawl a suahpitu si kha awl a sing?

VIII. Pathian deihnak nun
Leivum sualnak sungah sahnung in hun bo tiar tseih mentuh si ngwl si.
Luke 14:26-33; Matt. 28:18-20; 16:24-27; 6:19-33; Rom. 12:1,2; 6:1-18.
--Pathian deihnak zei in a ram tsa na per a sing.

Uk Mang
KL