Ee pa

Ee pa 

Ka it ber nak
me leivum ah keimah hing tu
ee pa

Tsaate tsa in
rilkam harsa thazang neihhem thaw na a per tu
ee pa

Rimsu ngai in
Saup lei phiat in keimah a tsawm tu
ee pa

Na it nak heh
rulzo ni le hei ni omtu ngawl si ung
ee pa

Kei na tsa in
me lai thaw in upat nak na pe sing
keimah a it tu
ee pa

Ngantu: Nei Tsiik

E Nu

''E Nu''

-A lungmu nuamnak tuh le a thin nuamnak tuh in na puah theingawl pelh na si khen a lungmu rim in puah mah nen

-A rong (dang) nel tuh in na koih theingawl pe khen rong kiing tiar mah nen

-A thurelnak te na ngaingawl pelh ta khen phu teihteih veng mah nen

-A vumah thilpha na puah theingawl pelh khen om men la halta ( puarthau ) in leida mah nen

-Thu pha takno in a relnak te na ngaingawl pelh khen sol teih in om mah nen

-Tsim le thiamnak heimah a neingawl pelh a khen nautat in zohsuam mah nen

-Mi bang in lei na da theingawl pelh na si khe Nu mawhsiat teih mah nen 

Ngantu : Thian Za Muang

Ka hai thei ngawl tawngkai laihun

Rualpi tenzong, Ei Pa, Ei Nu, Ka U, Ka Nau te me no tsawh mang dang vua, me no tsawh ei dang vua tiin peisa lawhnak te a kuat tseih tseih phang in, keini tawngta tenzong, Ei Pa, Ei Nu, Ka U, Ka Nau te peisa tsimizah tsawh ka kuat sawh vua, ka sawm sawh vua, ti in maisong pittseih thah lam in awkaa nem no thaw kutdawh a ngen tseih tu tawngta……..

Rualpi tampi tenzong, Ipod, Ipad, Vanlam style thei thei, pha pha le suah thar thar model thar thar lei tu in, dawr pha pha, dawr han han ah dan in a hawh phang in, keini tawngta tenzong, phone dawr, van dawr secondhand dawr ah kawbangheh man baih in rei khan nantin ti in a zei tseih tu tawngta…….

Rualpi tampitenzong, laptop pha pha, man har har, model suak thar thar, sang sang lei in a mang phang in, keini tawngta tenzong, Internet café (dawr) man dawm dawm nak mun ah dan lo lo in online tu thanop leita tu tawngta………

Rualpi tenzong, Inn le lo te ka nai min ah pha, nuam, sahnung in om nuam tu ti in leituh in a zei tseih phang in, keini tawngta tenzong kei tawngtselh phang hei per in Ka Pa, Ka NU le Ka U, Ka Nau te kawti bang in ka pan leh thei tu ti a beidong tseih tu tawngta……..

Rualpi tampi tenzong, mailam ah Zii/Pasel neiphang ka mang tuh tiin Bank ah peisa tampi pi a khawl ham tseih tseih phang in, keini tawngta tenzong, rualpi tenen ah ball-pen, tsauk te lei nak tuh in peisa a pu dong tseih tu tawngta……….

Rualpi tampi tenzong, la-thar lah-kha (lawhman) dongtu ngahtu, heisiam ka leituh, hei thilthar suak om na? tiin peisa mangdan tuh te ruatham in la-thar tu thanop ngaklah tak in a om phangin, keini tawngta tenzong, ai zaw labo lehleu tula, tawngkai man (school-fee) te, sapia, sapia vul, hasi te, ungsi te bo in, leikul tu pekul lehleu tula, ka naipin peisa ngah in ka pe theih tuh, ka lei theih tuh ti in ruat harsa pittseih in a buai tseih vengtu tawngta………..

Rualpi tampi tenzong, lai eih dawr pha pha, ei ot nak kim kim minmun ka nai ah om nantin maw tiin lai eihdawr te zei in a buai tseih lai tum in, kei ni tawngta tenzong, me laibu heh ka leizong ngawl pelh ta a si khen, Xerox copy no poh khen puah ang khaw, mailam ah ka tsa, tsa-sa-lawn le ka khawpi, ka phunpi te tsa in nempi tu ti ruat in, ka naimin ah Xerox dawr man baih nan tin maw ti in a zei buai tseih tseih tu tawngta………

Rualpi tampi tenzong, mahni rualpi awnpi ot ot nak te awnpi in, awn tuh om leh ngawl la tian in awnpi a zo phang in, keini tawnta tenzong, rualpi te ngai pittseih mitti tian ah a luang pelh ta a si khen awnpi nak tuh a nei zo nom ngawl tu tawngta……….

Rualpi tampi tenzong, me peisaheh ka lawhnak, ka zeinak, ka deknak pin ka ngahnak ti in ruat in mahni thu thu le deih bang bang in a mang tseih lai tum in, keini tawngta tenzong, me peisa heh Ei Pa, Ei Nu, Ka U le Ka Nau te sa-up hawrkai in le thari kaihduan duan in naper te per in, ei ot nak le in ot nak te ei, in ngam ngawl in keimah a kuatnak ti ruat in a mang ngam ngawl tu le a tenren tseih tseih tu tawngta………..

Rualpi tampi tenzong, maila le khaw tsimi khen lei ang, tsimi khen nei ang, tsin maikum in tsimi khen lei in tsimi khen nei ang tiin tumtahnak le muangtsawmnak tampi a nei phang in, keini tawngta tenzong, me ka kai nak tawng heh Ka Pa/Nu le U le Nau ten tselhpi zo nantin maw, keimah tawngfee man te peizo rih nantin maw, tsawmnap lai nan tinmaw ti in thinphu limdik thah reng in mai a nawt tu tawngta……………

Hai a har lei ta tawngkai lai hun
Mitti le Harsanak thaw a dim reng tawngkai laihun
Sahnungnak le Nuamnak te thaw a khawla leita tawngkai laihun
Tuarnak phunphun, harsanak a phun phun kei tuarnak te heh keimah ni a piding tiartu, a upa tiartu, a zirtu le a huai tu, keimahni thazang le nuamnak, sahnungnak le angnak diktak te kei tawk le kei mu, kei ngah sawn nak tuh ruak ruak sawn poh si…………..

Kontikni si khen thanau ngawl in tuar in mai a nawt kho kho tu tawngta te
Tsa le Tuu tetsa, Khaw le Ram, Phunpi te tsa thuruat in khangsonak tuh ah zuam kho kho in a kalsuan tu, tuutahnak lianpi le ruatnak saangpi nei in mitti le harsanak phunphun te tuar kho kho in na mainawt nak aa rah heh lumleita le ur leita lehtu lai poh si khaw…..

Nangmah ruat in tep, tsang le ei si ngawl in na kiangkap hem le na phunpi, na rampi ten a urnak, alumnak te a tep bawm le a ei bawm leh tu lai ti ruat in mai a nawr tu tawngta si ten tu in……

 Ngantu : Bawi Uk Thang ( India )

Lamzin Ther

Sualroihnak hintsang tam lakah
Zohsuamnak nautatnak huihsepi bang
Tsur hun tipi bang tho do ral lian
Mahruak mualrel rothing bang har
Limdiiknak lamzin ther ah....
Ling le so zumhiam kihnung lakah
Ru nei ruul le theltsang pil zah ruah zah
Thimzan lakah ladum zan bang vai in pai
Neih hem kut sungah thingkhawh bek thaw
Limdiiknak lamzin ther ah......

Nikonghong si-ar suak tu mutsuuk sing
Harnak meiro  te a liam berh zawh
Angnak khawvar ther leng pal bel tu
Haatsangrial, mitniraw om leh tu ngawlla
Limdiik nak me khaw ther sung ah....

------Amos-----

Zam sawn in

Tsimthiamnak mitmai degree
Ngalnak suah pitu neih le siah
Tuangkhawngnak sui le ngun
Puarthaunak inn pha lo pha
Sidat namaw tiartu mawinak
Deihdannak hampi phun le nam
Bawi Jesuh mel a lim kha lekhaw
Zam berh zawh a ning lun a sing

A thiang ngawl mun nawngkaai
Misual te leidaa nak kawnvel
Phangawl phunphun zuar nak
Lai le ti thiang ngawl ei in min
Thisen nawngkaai luangnak leilung
Nun thiangrim na nei ot lekhaw
Zam sawn in nunnuam tu in

Kei it nak nu le pa, u le nau
Kei muangnak sungkhat rualpi
Kei thupi tiar nak mi nu, pa
Kei pum telam pasel le zii
Kei sungsuak tsanu, tsapa
Pathian thu ah kal khat kal tu
Jesuh mel lim lam khak tut e
Zam berh sawn in kal nih tsa

Sualnak heh tawng tseih ngawlin
Zam nom heh sual ngawl nak si...

------- Amoschin -------

---- Khawsi Tiartu-------

Eer nak mun lamah kalsuan tseih sing
Limdiiknak bek lam-an keng in hawh sing
Thanopnak sunsiah ha in hawh sing
Tsimnak tawngphu no ha in hawh sing
Mualsang le lithuk khen naplah ngawl sing
Khawri le keekda khen lau hah ngawl sing
Ralhang le sahang khen kih hah ngawl sing
Sun ni nuai le thim zan lak ah
Limdiik ngawl in lo kha veng sing
Khawsi tiartu a tam man in......

Leivum pathian ka nu ka pa
Sulzawn laizawn ka u ka nau
Harnak tuar pitu, angnak ang bawmtu
Senkawn rualpi sungkhat u le nau
Ka nun piding pitu tsawmtu te
Paak otter in lehsawng zei sing
Sui le lungvar lehsawng pe ot sing
Ram khawla tipi ral tian zei tseih sing
Hawhlam honglam lo thah tseih sing
Khawsi tiartu a tam man in.......

Ka khangnak khaw ka leidaanak
Ka senak le phanak phurtu si tsi
Ka miphun pi, khaw pi, vang pi
Laikuang khat kil dang si sing
Lo kuam khat thok dang si sing
Ti naar khat in dang ong si sing
Khansonak mabang khat dang si sing
Khaw tsa ram tsa khualvak si sing
Lam laklawh ah lo kha thei si sing
Khawsi tiartu a tam man in......

Thisen luangnak Calvary lamzin
Bawipa Jesuh hawhnak lamzin
Umtu masa te lun nak lamzin ther
Zohsuamnak le nautatnak tuar min
Erhnak le veinak mitti rial bang saar
Umtu Christian te hawhnak lamzin si
A pannak kapnak, a tawpnak angnak
Bawipa tiar nak lamzin har ah
Sualnak lakah du kha veng sing
Khawsi tiartu a tam man in......

...... Amoschin..........
Uk Mang
KL

Zaknung ngawl le zaknung

>> Sung nak heh zaknung ngawl si,
     sungnak sungpin tho thei lehngawl heh zaknung si.

>> Mitti tsar heh zaknung ngawl si,
      Mang theihnung ngawl mitti tsar heh zaknung si.

>> Nu le Pa te taksa MILIAN in kei koih zo ngawl heh zaknung ngawl si,
     Nu le Pa te thinglung NUAM no in koih thei ngawl heh zaknung si.

>> Thil sual kei puah kha phang zaknung ngawl si,
      Thu dik ah kei remleh thei ngawl heh zaknung si

>> Tarah heh zaknung ngawl si,
      Thinlung pha ngawl, ruat nak sual nei heh zaknung sawn si

>> Om nak inn phartsuak heh zaknung ngawl si,
      Thinlung phartsuak heh zaknung sawn si.

>> Lawhding ngawl heh zaknung ngawl si,
     dumsuak nak pin suak thei ngawl heh zaknung si.

>> Peisa ( Tangka ) tampi kei khon thei ngawl heh zaknung ngawl si,
     Peisa khon ot nak thinlung ngei ngawl heh zaknung si.


author : thettantcho

"Limdiik tu kei"

 "Limdiik tu kei"

Na reel ngam ngawl nak
A thei ot tu keimah
Na suup khokho nak thu
a za ot tu keimah
Na thinlung sung ruat nak
Theipi tu asi ot tu keimah
Na aangnak/na lungse nak
A angpi/lungsepi tu asi ot tu keimah
Na aitsaan tseih nak keimah ah heh
Na theithiam ngawl nak
Na vumah itnak neitu ka sita tiheh
ni nikhat nivang na theisak tuin Liimdiik ngai lai sing

 Ngantu: Sung Sung