NA KHAWMUNAK KAU TIAR IN

       NA KHAWMUNAK KAU TIAR IN
Na Limdiiknak Khang Tiar In
        Lawhdingnak lam thu na ruat tuheh thupi pittseih si. Na kawnvel-a midang ten nangma tsa thilpha puahtu limdiik la na neinak hun heh nangma tsa hunpha a silam hai khamah nen. Pathian in kei limdiik nak vumah keimahni tsa na perveng si. Mailam na tumtah nak lamzin ah thilpha le thupha na limdiik lekhaw na limdiik nak bangin kim tu si. Thu le la a pha ngawl lamin ruattuh singawl atsia a pha ruatnak thaw limdiiknak, phatnak, thiangrimnak, lawhdingnak, hausanak, thiamnak te a sitheihnung lam in ruatnak nei tuhnak si. Kei thinlung le ruatnak ah theinak kei nei nak bangbangin mainawt dang sising, tiheh theinak lamle thinlung lam thumaan thu si. Na theitsiang ngawl nak thu heh puahsuak thei tungawl sitsi.
  
Pathian in Thipha Tamsawn Nei Si
            Na nunnak ah Pathian in thil khumnung le thilmak puahtu na tuur lekhaw Amah na um tuheh a masaber na kul nak si. Na per nak, na naper heh nangma tsa thil phaber si ngawl si. A bo thei ngawl le a khumnung Pathian thil puah thei nak tesawn kheh na muang tuhnak nangma tsa thuhampi si. Na theinak le thei ngawlnak, na neinak le dasamnak ten Pathian kolnak le thil puah thei nak te khak thei ngawl si. Na um lekhaw nangma tsa Pathian in heizongza puah thei si. San khat zawh san khat kei khangso tuheh Pathian deih nak si. Pathian deihnak tampi puah tuin na thinlung ah thu ruat in. Nangmah le nangmah man nei tiartsawm la, ninglam lai na lawhdingnak le mingthangnak manin lungkim in thinpha men nangmah, tsimitah thiamsawn tuin le khangso atsia mingthangsawn tuin zuamnak thaw mainawt leilei rih in.

Ninglam Lai Kham Nak te Honglehnak
            Na nunnak ah thil pha le pha ngawl a leng tuheh na ruatnak vumah bulpuh si. Thil pha a leng thei tuh ngawl-a khaktu thil heh heidang si ngawlin na ruatnak si. Na thuruat dan na theng lekhaw Pathian in na nundan  theng deve tu si. Lawhding thei tuh ngawlin ruatnak pha ngawl na nei nak te na tsanawn te nenah ro zam khamah nen. Na awnkam ah a khumnung thu pha muitsu om a si manin na thil titheinak te tuangkhawng mah, Pathian puahtheinak sawn reel la phuang sawn in. Nangmah heh nehtu, mi thupi le mi thiamber si tuin hingnak si tsi. Na nilun ah a khangso tulai te tsain nehnak le lawhdingnak ro zamtu situ’n zuam in.

 Ruatnak Pha Sungah Khangso In
            Zingtin naper tuin inn pin na pusuak maain “Bawipa Pathian, na phanak manin angpittseih sie. Na phanak in keimahni tsa hun pha hun ther leng tiar atisa, mi tampi te tsa phanak le lawhdingnak  pe si tsi,” tin Pathian paak masa in. Na tumtah nak te a kim sikhen a kim ngawl tasikhen Pathian na umnak kho tiar reng in. Nitin in a pha ruatnak thaw nung in. Zing na tho natsang le zan na zau tu nasiarin “Pathian phanak a tsotu sing,” tin nangmah le nangmah reltsawm in. Na puah tuh thil te puahla nangma tsa Pathian in a per tuh te per deve tu si.

Ruatnak Pha thaw Nung In
            Pathian phanak in hun pha le mun phaah huai tu na si. Phawkreng in, Pathian deih nak thu tampi na ruat lekhaw Pathian phanak tam leilei tso tu si tsi. Pathian phanak in minung ruatnak te pha tiar thei atsia a om ongngawl thil dangsa tampi puahtheinak te pe si. Pathian phanak in na harsanak le na bawngsenak tampi te a pha lamin thengsak tu si. Pathian na umkho asilekhaw na nunnak ah thupha pe tuin van lampin Pathian in thu kam na si. Tsimibang Pathian phanak kheh nangma tsa a si deve lam na theitsiang asilekhaw na nunnak ah lungkim tsawmin nung thei tu si tsi.

 A Dam Mel Nei Tuin Zuam In
            Mi dam mel na nei theinak tuhin Pathian mu dan in pantsawm kul tu si tsi. Na thinlungah na mutsawm nak tah sisawn in na mel heh lang thei ong tu ngawl si. Tutu khen, mi dam mel a nei phang bekin khansonak le lawhdingnak lamah angngai noin khang thei tu si. Nangmah le nangmah mi bang ngawl, mi thupi ngawl, titheinak nei ngawl, mi hei ngawl, mi thiam ngawl bangin na mutsawm lekhaw na ruatnak bangpahin tsang nomtu si tsi. Khatlamah, Pathian in nangmah a mu bangin na mutsawm thei lekhaw mi ang si thei tu si tsi. Pathian in mi dam, a pha ruatnak nei si tuin deih kei si. Nangmah a itnak heh na per, na puah nak man si ngawlin minung pakhat na sinak man si sawn si. Tsimita, na thiam ngawl thahlam asikhen Pathian muang reng in. Nangmah na pan phang Pathian mu danin nangmah le nangmah mutsawm thiam deve in. Pathian in nehtu le mi lawhding si tuin deih na si.

 Na Nung Man Thei Tsiang In
            Kawtibang in na ang thei tu, tiheh zir in. Heimansim tiphang Pathian in na sinak vumah ang theitu si tuin a puah nak si tsi. Nangmah puahtu Pathian in mi manhar na silam thei reng na si. Pathian in mi mannei in a ruat nak na si ta nangmah le nangmah heh Pathian man tek nak bangin na mannei lam thei tsiang tsawm reng in.

 Na Um Nak Bangin Kim Tu Si
            Na kei per phangin kei um nak bangin ngah sising. Midang ten kawzah nangma tsa umnak a nei ti tahin nangman kawzah umnak na nei tiheh thupisawn si. Heita tiphang, na umnak in na nunnak ah thukhen tu si. Tsimita, thil phasawn, liansawn le hansawn na tso thei nak tuh ralkolnak thaw um ngamnak nei rori in.
  
Lawhding Ruatnak Nei In
            Pathian in nangmah heh mi zaran, mi menmen si tuin a puah nak si ngawl si tsi. Heimansim tiphang, nangma lamah phatnak na nei ngawlkhen Pathian phatnak kheh hai mahnen. Pathian na umnak thawmin Ama phatnak in mipha tsangsuak tiartu na si. Mipha na si thei nak tuhin na phanak tah Pathain phanak thupisawn si. Na limdiik nak a bo lekhaw limdiiknak dang nei leh in, sunmang na nei nak pakhat a pai phang a dang sunmang man leh tun zuam in. 

Na Sinak Ah Ang In
            Thil bangve ngawl tampi tele na theithiam ngawl nak tampi te heisiar ngawl men mahnen. Hei zongza heh amahni sinak bang ten in man nei ten asita theithiamnak neitu in zir in. Phatnak na puah thei nak zah puahla mi ang na sinak kheh thei tsiang tsawm tu si tsi.

Ka thiam ngawlnak tele khelh nak te sualzah sawh un ti nang kuun sing.

Ngantu : Uk Mang ( KL, Malaysia )