Niteni popan nakLeivumpi huap Ni tsuangcung, Ni thupi lakah “Nuteni (Mothers’ Day)” heh mi tampi in ni thupi tsuang in a mangnak ni pakhat si deve si . Tsimi Nuteni heh kum tin May la nipiveihnih nak in mang veng si. Nuteni masaber in a mangpan tu heh, USA ram, Philladelpha tinak khaw aa sayamah Anna M. Jervis ah si. Amah heh kum 1864 in suak in 1948 kum in thi si. A pa heh mi lule deuh siin, zi le tsate pha tak in cawm nap ngawl pawl si. Tsita, innsungsang tsa eih le in zei tu le tsa te kul nak hem per sak tu heh a nu si. Tsita, Sayamah Jervis in a naupanglai pah in a nu rimsu dan te a muphangin ngaihhar ngun thei tepan ong la si.
Sayamah Jervis in a khangai phang in pasal neitu ngawl in le anu tsawm tu in thinlung khentsat nak nei si. A khentsat nak bang in kum 38 sung a nu tsawm in a kelen zawh 1905 May ni ( 9 ) ni in a nun zam si. A nun azam zawh kumkhat kim nak 1906 May ni ( 9 ) ni in a nu phawkreng nak in a rualpi honkhat te thaw puai kohno puah dang tepan si. Kum 1908 May ni ( 9 ) ni a nu phawkreng nak sawngen khawm puai heh a khawpi minung 400 val te thaw munkhat no ah puah dang lehleu si. Sayamah Jervis in tibang in sawngen veng si., “ Ei nu ah ka it bang in mi hem in amah ni hingtu nute ten a it deve thei nak tuh in, ei nu thihni heh leivum pungpuluk in Nuteni tin a mang thei nak tuh in ka bawm sawh in” tin Pathian nen ah sawngen si. Sawngen bek in lungkim zo lai ngawl in camping tian puah si. Sayamah Jervis in kum tin a pauhveng nak a nu phawkreng nak ah a hawh tu te hem heh a nudam lai in a deih ber nak Rose paper pakhat ten zem veng si. Nu dam lai nei te hem heh Rose paper sen le nu dam leh ngawl la te hem heh Rose paperngo zem veng si. Sayamah Jeris sawngen nak pathian in ngaisak in Kum 1914 in USA Tsuaizah pin May la nipi veihnihnak heh Nuteni in mangdang tu in lungkim pi nak nei si.
Tuhen leivumpi ah Nuteni mang heh ram 46 duk om si. Keimang dang heh bangve ten ngawl pelh na pikhaw tuumnak heh a khat si. Tsimi Nuteni ah tuumnak ber heh hingtu nute, ultung tu, angnak rel tu le upatnak pe tu heh si.
Nuteni ah pervo nei te:
1.Tsa ten nute vum ah pervo nei:Amasaberin tsa ten nute vum ah pervo lianpi nei si sing. Nute vum ah kei angnak heh kambek in si ngawl in pernak le thilri thaw lang tiar tuh si. Tsa ten Nuteni ah lehsawng heibang no poh khen kei angnak lang tiar nak in pe pha si. Mundang, khaw dang ah a om te khen phone set in nute nen ah angnak rel vo si. Tsa ten nu te heh Nuteni bek ah ultung tuh si ngawl in a dam sung upaknak thaw tuamlawm tuh pervo nei si sing. Kei bawipa jesuh in khen thinglamteh vum ah a nunnak a bo ma deuh in a it nak ninglungtupa John nen ah amah hingtu a nu phatak no in kelen sak tuh in thuzam si. ( Jn 19:26..27)
2.Pasel ten nute vum ah pervo nei:
Nuteni ah tsate ruak in nute nen ah angnak rel in ultung in lehsawng petuh si ngawl in pasel te khen pervo nei deve si sing. A tsuangcung in tsa nausen nei le tsate nute nen ah pakthiam lai ngawl nei Paten nute vum ah pervo lianpi nei dang si sing. Nute naper, nau kelen le tsa a hingsak nak te heh theipi in pak tuh si . Nu naper poh tin ti men tuh si ngawl si. Paten nuteni ah kei tsa te nute lehsawng pe tuh khen heh zirh in rel kul si . Nausen nei ten nuteni nikhat sung no poh khen nau len in innna per sak tuh si.Nu naper a pernak te vum ah pak khen pak in Ziap khen ziap tuh si.
3. Nute pervo:
Nute khen mah ni hing tu nute nen ten ah angnak rel tuh ni si. Na tsa le na pasel ten nangma nen ah phat nak a puahsak bang pah in Nuteni ah nang nu te ten nen ah phat nak puahsak deve tuh nak si.
Thukhom nak:
Nuteni bek ah nute ultung tuh si ngawl si. Nuteni in hingtu kei nute heh a damsung ultung upat in ang tiar kul dan te le a dam sung cawm tu in pervo kei nei nak te heh keimah ni pawkleh tiar nak ni si.Sayamah Jervis sawngen sak nak le deihsak nak bang in keimah ni khen hingtu keinu te itnak thei thiam in kei nu te upatdan, ultungdan, le ngaihhar nak thinlung kei nei thei deve ten nak tuh in Pathian in hmuitsu kei burh ta sen. AMEN!
By Thian Nun Piang
No comments:
Post a Comment