PHADEI KHANGNOTE LE LEIVUMPI KHAW PAKHAT SINAK

PHADEI KHANGNOTE LE LEIVUMPI KHAW PAKHAT SINAK 
(PHADEI YOUTH & GLOBLIZATION)                                      Ngantu : Thang Thang
     Kei Phadei khangnote heh Leivum munhem ah om ongla sising. Tampi heh kei suakmin khaw le ram ah omin tsimnak maw zei in, singawllekhaw khawsa in om dang ten pah lai sising. Tsimi lakpin tampi heh(Tam sawnpi khan si men thei aheh) ramsung le ram pulam ah hawh in tsimnak le rilpum khapkhat tsa in naper in khawsa dang sising.
     
Kei suakmin le kei khangmin kei khaw kei ramte heh ram pulamah khangno tampi a suak ongla ta khing rerep in om si. Ninglamthu kei pan leh phangin kei papi le kei nupite sanlai hen kantaleih naper si. Tsimilai hen kantaleih naper heh a pertakber si. Tsimizawh in Kawlzawl ah vaihun leng in, kei pate san lai in a lengtawpnak le tangka a zeitawpmin heh Mizoram le Tamu si. A per dangnak heh Saklam ah thingat le Tamu ah chithuk (tsimilai siipuaziinak pha ngangai si) phur si. Tsimitselhzawh in Phakat le Maishu ah hawh in suilainak min ah limdiknak reltselhnungngawl thaw omin, harasa tuarin rilpum khapkhat tsa in tangka lawh in om lehleu si.
  
      Tsimizawh keimahni san tuni tuhun ah lengin khaw le ram ah naper tuh a harsa manin ramdangpi ah hawh in naper dang hun leng si. Leivumpi heh khaw kohno pakhat si ongla tinak san ah kei tawk tsetseihnak san heh si ongla si. Globalization in keimahni heh neh in kei ruatdaan le kei mu daan khan dang tiar zo si. Tsimizawh in kei tumtah khan dang reih tiar si. Tumah in el theih si ngawl si. Tsimi sung pin Phadei Khangno ten ee kawtinsim keimahni le mahni kelen in khangso in kei omthei deve daan tuh tiheh ruatkul si.
Leivumpi heh kei pan leh asilekhaw khangsonak heh a rang leita si. Kei san heh a man theihnung ngawl pepet in tsak si. Ruat tehtsuk po asing. Sanman tuin kei zuam sung hen tsimi san in keimahni heh a zam si ongla si. Ram khangso minah sesem sanman heh a har leita ongla si. Kei ommin khaw le ram pin kei pusuak phang in kei ruat masabernak heh keimahni heh sanman nom lai ngawl si men na-ung khaw maw tiheh si. Tsimiphang in san kei man otnak man in kei tithei sung hem zuam ot nak thinlung suak si. Tsimi heh a pha si.
 
       Zuam khawkho, sanman tuh in hil khawkho in sanman tuh in hil sising.
Tibangin kei zuam kei ti phang hen keimahni dinmun le omminte thaw kaihdun in kei ruatnak theng si. Santehnak in, mualvum kei khaw le kei ram pin sanman tuh kei zuam daan heh Falam bang khawpi ah kei leng phang in kei zuam daan heh dang leh si. Tsimibek zo ngawl in mualvum pin kawlzawl lama Kalaymyo banglun ah kei leng phang in dang lehleu ongla si. Tsibek zo ngawl in, Yangon bang khawpi ah kei leng phang in san kei man otdaan heh dang reih lehleu ongla si. Tsimipin ramdang, Malaysia lun ah kei leng ongla phang in men san kei man ot daan heh dang lawlaw ongla si. Kei zuam daan khan dnag ongla si.Tsibek zo ngawl in UStibanglun ram khangso ongla ram ahen kei leng lekhaw san kei man ot daan le kei zuam daan heh dangver ongla si.
 
      Kei ommin ah khangso daan-a zirin kei khawsa daan le kei omdaan te dang in om si. Kei ruatdaan khan dang in om si. Rang khangso minah kei leng phang in mi tampi tsa hen khangsonak in lun si. Mibangnak in a mahni ningah lun si. Tsimiheh a zuamnak  vumah lun in si. Tsimibang in khatlam ah lekhaw nundaan phangawlnak lamah tampi in theng si. Mi tampi heh khangso ongla ramah om atsia khangsonak tuh ruat ngawl in khangsonak ah ang le lungkim in tampi om si. Reltsiang asilekhaw khangso deve tum ngawl in khangso ongla te bang in om nom thei si. Tsimibek zo laingawl in sanman tinak ah adikbe tatak khan thei ngawl in om kha thei si. Ruatpo lekhaw sanman kei tinak heh kei thei tsiang ngawl ta si tiin um sing.   Mi tampi in Bible sung a Paul ah relnak kei san heh sanse si tiin minung kei sual sikhan kei mawh ngawl tiin ruatin om si. Tsimibang in vang keini Phadei khangnoten raut awl asing. Kei mu daan heh phatakno in tsek rereng dang asing. Tsimi heh kei nuntsan a se tiarvengtu ruatnak pha ngawl si. Sanman kei tumlai hen senak heh kei vumah ama thu in leng veng si. Tsimiheh kei theithiam ngawl lekhaw keimahni tsa in setawpsen ah a len vengtu kheh si zen si. Tsimiheh kei san ah zirin kei vumah a leng thei senak si. Tsimipin a khangso leita le kei ommin ram a khangso leita ta thinlung tsawl le thanaunak kei vumah leng thei si. Mi tampi nen ah a leng ongla si. Thanaunak heh a launung ngangai si.
        
        Tsimi thanaunak kei nen ah a leng ongla lekhaw kei thinlung in a masa-a sanman tuh in kei zuamotnak le kei thathonak tela kawnai ah sa-am tituh rori in paitei thei si. Tsimi heh kei tsarah le harsanak man in khan veitampi suak si. Kei thinlung in mibangtu kei tumnak te hem la tum in zuam zo leh ngawlla si. Mawh ngawl si. Tsimi hun a leng lekhaw kei thinlung ahhen keimahni le mahni heh thiltithei in mu leh ngawlla a tsia, sanman theitu in khan ruattsawm zo leh ngawlla si. Keimah ni tah milian sawn le tangka mang thei sawn le silh le tsen ah mawi in styletyle sawn rual nei in a om kheh thanaunak in mang si.