Amasaber in tibang hen hun tsungnung a petu Anung Pa Pathian thangphat dang si sing. Kum reipi kei ngakrengnak Baibal Thiangrim Thukam Ther heh tuni hen Pathian ngeihharnak, Bibles International (BI) te le Bibles International Myanmar Society (BIMS) te bawmnak, Baibal lettu tehem le sumsaw le sawngennak thaw bawmdun dang tennak thawm manin Baibal kei kut sungah leng ong si lei. Tuni heh keimahni tsa in theihdiktaak taangthu le phawkrengnak lung kei phun ni si. Tsimi Baibal kei kut sungah a leng theinak tangthu tsomno relnak nei tu sing.1. Baibal let tepannak
Kum 1986 kum in Balai ah om Bualkhaw te’n Baibal let tuin thurel dang
si. A lettu in Rev. David Kam Thang ah deng dang si. Tsimi hun laiin
Baibal heh Lai Thiangrim (Phadei Awn) tiin mingsa tuin reldang si.
Bualkhaw, Phaizawl le Farkhawm pin pawlpi upate Balai ah leng dang
atsia Baibal lettu in lungkimpinak nei dang si. A lettuh heh Today
English Version (TEV) si tuin lungkim dang si. Amasaber in Thuthangpha
Mark let masaber si. A letsak te kawmiti ten tsek nomper si. Gospel
pali a let tselh phangin thunok a om manin tsawl leh lawk si. Tsimi
hun lai Baibal kawmiti te heh, Pa Tson Sum, Pa Kap Lian, Pa Khaw Lian
Pum, Pa Khuang Lam, Pa Bawi Tsung Nung, Pa Khuang Ling te si dang si.
Kum 2000 kum in Bualkhaw, Phaizawl, Farkhawm, Khuangmual, Nanchaung le
Tayakung khaw pin pawlpi upate Bualkhaw ah khawmdang atsia Baibal
letnak thurel dang lehleu si. A reldangnak heh Rev. N. Tsong Sum in
Phadei awn in a letnak Falam Baibal (Rev. Dr. S. Hre Kio letnak TEV)
kheh remkulnak te remdang tuin lungkim dang si. Baibal remtu tuhin
dengnak kawmiti te heh Rev. D. Kam Thang, Rev. Thian Za Ling, Rev. San
Tsung Nung, Pa Bawi Lian le Pa Thian Khaw Thang te si dang si.
Amasaber in Baibal remtu kawmiti ten Tayakung Zion Baptist biakinn pin
Baibal remdangnak nei si. A veinihnak in Nanchaung Steven Baptist
biakinn pin remdang si. A veithumnak in Bualkhaw Baptist biakinn pin
remdang si.
2. Bibles International (BI) te thaw napernak
Baibal letnak ah tangka kulnak tampi a om manin rualpi zeisak tuin
Rev. G. Van Lian Muang ah kun dang atsia Bibles International (BI) te
awnpi sak si. Sipelh atsia BI te hen King James Version (KJV) bek let
asita, Rev. N. Tsong Sum Baibal (TEV) letnak la mang leh theihnung
tungawl in om lehleu si. A therpo in let leh akul manin Rev. Thian Za
Ling, Rev. Thian Khaw Tiam, Rev. D. Kam Thang le Rev. G. Van Lian
Muang te heh BI te’n Yangon pin Baibal letdan zirh leh leu si. Rev. G.
Van Lian Muang huainak in Baibal ming heh “Bualkhaw Baibal” tiin BI te
nenah len dang si.
BI te tiarnak bangin Baibal let tepan lehleu atsia Pa Kap Lian in Mark
Laibu alian 4 tian let si. Rev. D. Kam Thang in adang hem lathum sung
letleh si. Tsimi pin pan Rev. D. Kam Thang a heh Baibal lettu luber
(chief translation) in per si. Baibal a let laitum in Rev. Kam Thang
napernak la phiangphualtu a nei lehleu manin Baibal a let tselh tuzep
la tsawl lawk lehleu si. Baibal kawmiti te heh Lairam le Kalaymo
kawnvel ah om dang in Baibal letnak naper min ber Yangon ah Baibal
kawmiti a om ngawl manin Yangon pin thurelpi tuh tumah omngawl si.
Tsimiphangin BI pin Rev. Paul Van Hre in Yangon ah om Bualkhaw upa te
le Balai ah om Pa Kap Tial ah le upa dangte tawkin Bualkhaw Baibal
lamlen in tselh theinak tuh relpi in tha pe si. A thupiber hen Baibal
lettu le consultant te thaw tawkdun beih min Yangon ah kawmiti pakhat
nei thei tuin relpi si.
Bualkhaw Baibal letnak tsa tuhin BI te thaw thukho tiarnak nei atsia
kum 2006 June ni 23 in BI (USA) te, Bibles International Myanmar
Society (BIMS) te thaw Bualkhaw Baibal lettu kawmiti ten lungkim
dangnak ming sen thu dang si.
3. Yangon ah Kawmiti neinak
Yangon pin naper bawmtu tuhin kum 2005 July ni 28 ni Baibal kawmiti
deng dang atsia anuaia te heh sidang si:
Rev. San Cung Nung Chairman Rev. Paul Thang Member
Rev. Biak Za Muang Secretary Rev. Khin Lay Maw Member
Pa Bawi Do Treasurer Saya Seng Thang Member
Dr. Ram Khaw Lian Member Pa Kiim Bawi Member
Dr. Kyaw Myo Oo Member Pa Khaw Lian Muang Member
Dr. Thian Nun Piang Member Pa Van Muang Member
Rev. Nun Uk Member Pastor Thian Za Mung Member
Me a vuma kawmiti te heh Lairam ah tima neisak kawmiti te thaw
pehdunnak omngawl si. Lairam a khen amahni pahin omreng si.
(a) Siar in pantsiangtu te:
Rev. San Cung Nung Pa Khaw Lian Muang
Pa Kiim Bawi Pa Thian Nun Thang
Pa Van Muang Pa Thang Khaw Zam
Saya Seng Thang Sayama Helen
(b) Baibal lettu te:
Rev. D. Kam Thang Chief Translator
Rev. Dr. Ram Khaw Ling Back Translator
Dr. Thian Nun Piang Ass. Translator
Pastor Thian Za Mung Ass. Translator
Pa Kap Tial Ass. Translator
Kum 2005 July nipi veithum le veilinak in a vuma Baibal lettu hem heh
BI ten Yangon pin Baibal letdan zirh leh atsia let theinak certificate
a ngahte ruak sidang si. Baibal a vaseng Rev. D. Kam Thang in a
lettselh berh zawh kum 2007 September ni 25 ni in amah heh phe
theingawl nat vei si. Tsimi pinpan a naper hem heh Rev. Dr. Ram Khaw
Ling in sawng leh si.
4. Lairam te thaw napernak
Lairama kawmiti le upa te thaw munkhat no ah to in naper dang tu heh
baih ngawl si. Tsimita Yangon pin let tselh saak te la pawlpi pakhat
ah a veksen singawl in a khen sesep in tsek tuhin kuat si. Phatak noin
tseksek teen atsia remleh tuhin kuatnak ngahnak tehem khen Yangon pin
asi theitawp in pan leh berh in consultant te thaw theng otnak te rel
leh atsia amahni lungkimpinak a si lekhaw theng atsia a sullelam a
khawla thah lekhaw theng ngawl si.
5. Laibu suahnak
Amasaber in Rom le Johan laibu siar teen thei tuhin suah si. Bu khat
ah Ks. 200 in zuar si. Tsin, Baibal Tangthu laibu le Awn Zirnak
laibu khen suah si.
6. Zirnak te:
Baibal taangthu laibu le Awn zirnak laibu thu zir tuin pawlpi pin
lehnak te BI napertu ten Yangon pin kum 2008 November la sung zirhnak
nei si. Tsin, Taungphila ah khen kum 2010 February 3-5 tian veikhat
zirhnak nei meek si.
7. Editor thu
Bualkhaw Baibal heh tsianneih tula kei sita a nepnawi no te pawl heh
nupang ten edit puah thiamber si ti’n BI ten a tita Sayama Mang Nun
Ang ah edit puah theinak tuhin BI ten zirhnak nei lehleu si.
8. Thilri neinak
Baibal letnak tuhin Computer desktop mangsaak pakhat lei si sing. BI
ten laptop computer pakhat pe si. Kum 2008 in Nargis huihse tawk manin
computer te apanih in sekop nom si. Editor in laitseknak akul manin
laptop computer mangsak pakhat leisak lehleu si sing.
9. Bawmnak tangka ngahnak
Baibal letnak tuhin Yangon ah kawmiti ding pan phangin tangka heimah
nei laingawl si. Yangon ah om ulenau te nenah bawmnak ngen si. Lairam
le Kawl zawllai a pawlpi te nenpin, bulpak nen pin, ramdang om ulenau
te nen pin, mahni siangnak tangka te khon dang si. Yangon ah om ten
kum 2006 pin pan kumtin umnak thukam nei dang in khon dang veng si.
Tangka tsazin heh March la in pawlpi hemah zem ongla si.
10. Angnak thu
1. Baibal letnak napernak minber MEGST tawng le President Dr. Aung Mang
vumah angnak reltselh nungngawl nei si sing.
2. Damngawl lawh tianin Baibal lettu Rev. D. Kam Thang le a innkawmpi
te nenah angnak reltselh nungngawl nei si sing.
3. Back translator, chief translator naper le kulnak hemah computer
le a mawtaw man ngen ngawl in amang siang vengtu Dr. Ram Khaw Ling te
innkaw vumah angnak reltselh nungngawl nei dang si sing.
4. Baibal let bawmtu (Assistant translator) pa thum: Dr. Thian Nun
Piang, Pastor Thian Za Mung, Pa Kap Tial ah le laitsektu Sayama Mang
Nun Ang te nenah angnnak reltselh nungngawl nei dang si sing.
5. Thanau po ngawl in tangka bawm veng tu ramdang le Kawlram sunga
pawlpi te le bulpak te nenah ang pittseih si sing.
6. Baibal man suahsak hamtu te vumah ang ngai in paak dun dang si sing.
11. Mailam tuumnak
1. Bualkhaw awn mang hem in man beih noin Baibal Thiangrim (Thukam Lun
le Thukam Ther) nei theinak tuh.
2. Laithiangrim Thukam Lun letnak tuh in a kulnak sum le saw te pawlpi
in sisen, bulpak in sisen peh ten theinak tuh le sawngennak nei thei
tennak tuh.
3. Awn le lai kei neisak kelen thiam theinak tuh le mangdang reng theinak tuh.
12. Thukhomnak
Bualkhaw Baibal kei nei theinak tuh tsa in tsimnak, thiamnak, neinak
sum le saw le hunpha tampi te siangnak lianpi thaw suah tenin naper
dang kei silam heh Bualkhaw Baibal Thukam Ther hen tapidaw kei sizawh
kum 100 phangin langtiar si lei. Anung Pa Pathian heh a kumkhaw in
thangphatnak si reng ta sen.
Bualkhaw Baibal kawmiti
July ni 29, 2012
No comments:
Post a Comment