II Peter 2:7 " Tsin, ningtsirnung ngai in a nungtu mi hur te nuainennak mi diktsang Lot ah kheh san si."
Kei Bible in Abraham le Lot te kheh mi diktsang ti si. Tulai san umtu tehem khen Jesuh Khrih ah diktsang, mipha bangin Pathain in kei sang si. Sual lairelnak le sual man thinak sungpin kei luat tsiar si ( Rom 8:1-2 ). Sipelhatsia Khrih tsa ten Pathian ngaihharnak sungah kei nun daan heh Abraham le Lot nun daan thaw keimah ni zirh si. A panih heh Pathian itnak le ngaihharnak nuai ah nung atsia muitsu tampi pe si. A muitsu ngah daan kei pan a si lekhaw a vulnak ramsa te pung in khaal min tuh om ngawl tianin Pathian in mutsu pe si.Tsimita Abraham in omnak tuh leilung/mun kheh a tsupa Lot deng masa tsiar si. Lot in Tipi kiang le hampa hing min mun Jordan tipi kiang leirampha min deng atsia a deng nak mun ah thawn dang si. Me thu kei pan dang a sing lekhaw a panih heh diktsang te si veve pelh napikhaw Abraham in deihsaknak le ngaihharnak a nei daan lang si. Lot a si lekhaw ama tsa bek ruat in midang tsa a ruat ngawl lam mu thei si sing. Lot busa nak mun kiangah heh Sodom le Gomorrah khaw om si. Me khaw kiangah buk sa in um si. Sodom khaw ah a leng nomnom veng tsa dawtaber ah Sodom khaw sungah om nom si.
Me thu in a rel otnak a si lekhaw Sodom le Gomorrah tinak heh sualnak muh nak si in, Lot nun heh umtu te ka dunak a muh nuam nak si. Lot in Sodom khaw heh a mit in mu masa, tselhphang a kawng daang in hawh pan, a rei phang a sungah om nom. A om zawh in ral ten Sodom khawpi sim atsia Lot khehkhen a len nak lakah peh deve in sel ah koih tuh huai si. Pathian bawmnak thaw Abraham in san leh ngah si. Sipelhatsia Lot in a khawsa nak a si Sodom khaw ah lehlawi thotho si.
Aw... um tu nu le pa, u le nau, keimah ni khen Lot bang si veng ngawl ung khaw? Sodom le Gomorrah a pha ngawl, ningtsir nung a si lam khen Lot in a mit rori thaw tsiangkoh in mu pelh si. Umtu te kei nunnak ah keimah ni tawkzawn ten Pathian in muitsu kei pe si. Mi zahlam ten kawlpaw khul le khuaiti luang nak min ram tian leng si sing. Kei sangawl nak inn phapha, lo phapha ah om, kei naper e, ka motor e, ka manngawl leita ti in keimah ni muitsu a petu Pathian hei men veng si ngawl sising maw? Tsin a phunphun in pawhlem tuh zei in thuson rel khen sual ah ruat leh ngawl la sising. " Thuson, thumanngawl a pa heh Satan si", ( Johan 8:44 ) kei siar pelh Pathian amah deih tuh nung lawt ngawl te si sing. Khangso ngai in mahni le mahni ruat tsawm atsia kei dasamnak a pan lam thei tsawm ngawl sising. Kan nun lun ah lehlawi leh veng sising. Sodom le Gomorrah khaw sungah kei tang veng heh poi ngai si.
Sualnak in keimah ni nenah hawh tsawm ngawl si, keimah ni sawn in sual heh a zei in zei, zei bekzongawl a lei in lei veng sising. Kei taksa siatsuah tu thil phunkim le kei thinlung sungah mi kei iksiknak le sualnak a phunphun te khen kei mit in mu masa atsia a phangawl ti thei reng pelh sual ti in kei mu/ruat ngawl heh poi ngai si.
Pathian itnak le ngaihharnak thaw adim umtu nangmah le keimah Pathian in sualnak lakah nuam tseih men tu siang ngawl, deih ngawl sipelh, kei sungah om sualnak a si Sodom le Gomorrah pi heh khang tu'n Pathian in deih ti theireng pelh zam thei tsuang ngawl. Vanmi ten a ban pin nuk phangbek khaw pulam ah a suak thei silai si. A it pitseih nak a zii in ninglam pan pahpah lai si. Umtu unau te aw sualnak in keimah ni a rek ngah tu rori in si mi a zei.
Umtu unau te Pathian ngaihhar nak no in Pathian mang nak thureltu te nenpin khaw pulam suak ngah tangtang te sising maw. Sualnak sungpin suak ngah pelh ninglam lehlawi pantu Lot zii bang men sising maw? Kei Bawipa Jesuh Khrih sannak heh kimngai in muang tsak khen si si. Kei Pathian in Abraham bangin kum upa ter tian muitsu pe in aper apuah nak hemah lawhdingnak pe si. Lot bangin neisak bo leh thei, Inn sungsang tian paithong men tu kei siang ngawl si.keimah ni santu le muitsu petu Khrih sungah om a sing. Kei sualnak te zam a sing khaw sualnak sungah du leh ( lehlawi leh ) awl a sing.....
Nawn thang
No comments:
Post a Comment