Siamnak 1:1-2 ah Pathian in Varnak om sen a tiphang varnak om si. Siamnak 1:3 ah sikhen Pathian in varnak heh sun ti'n ko in thimnak heh zan ti'n ko si. Timi zawh in Pathian in leilung sisen van sisen leivum ah a om thil hem le van ah a om thil hem Pathian in puah veng si. Ni 6 sung Pathian a naper tselh in a ni 7 nak ah a napernak pin tsawl si. A naper a tselh phang a ni 7 nak ah a tsawl ta Pathian in me ni kheh muitsu pe in a tsungnung ni thiangrim in tsang tsiar si. Lei le Van a puahnak thu heh a tsom zawng in timi zah heh si si. Siamnak 1:6-31.2:1-4 lam kei pan a si lekhaw Pathian in lei le van a puah tselh phangin leivum ah thing le rampa om ngawl, laitsi keuh tuhkhen heimah om lai ngawl si. Heita tiphang Pathian in ruah a sar tsiar lai ngawl ta si. Leilung ( Lo ) puahtu tuh minung khen om lai ngawl si. Ruah sar lei ngawl pelh napikhaw Pathian in leilung sungpin ti suak tsiar atsia leilung kheh num/kawt tsiar si ( Siamnak 2:5-6 )
Siamnak 2:7 - Pathian in tsiardak/buan kheh le atsia minung puah si. A nar sungpin nunnak haihawh thun atsia minung ah tsang si. Kei bible kei pan phang Pathian in Lei le Van a puahnak ah sisen minung puahnak ah sisen a mah thu bangin a hun man no in a puah lam tsiang ngai in mu theih nung si. Kei ben nak kei Pathian heh a hun kim no in napertu a silam Bible lum sungah le Bible ther sungah mu theih nung si. Umank ah Pa ti'n ko nak Abraham nenah khen Pathian ama thukam nak te a hum kim phangbek in tsapa Isaac ah pe silai si. Sipelhatsia Abraham in Pathian thukamnak tepawl ngah tu in Pathian naper ngak zo ngawl si. A zii Sarah thu ngai in thupi sawn in a koih ta a sal nu Hagar thaw Pathian thukamnak tsapa si ngawl Ishmael suak si ( Siamnak 16:1-4;15 ). Tsimita keimahni tsatuh a phanber a puah tuh hun tsam kheh thintsual no in ngak thei tu si heh kul sising.
Thukam ther John sungah khen kei be nak Pathian heh Ama hun thu bangin a hun kim phang naper veng lam mu thei lai sising. Jesuh leivum a om lai mangbangnak tampi puahnak sungpin a masaber a puah nak ti pin tsabit tsang tsiar ( John 2:1-11 ) thu pan dang asing. Canaan khaw ah mopuai a sawmnak bangin Jesuh le a nu Mary, a ninglun te thaw hawh dang si. Tsimi phangin mopuai nak ah mipi a pe nak tsabit ti bo lam a nu Mary in a thei phang Jessuh nenah inntsek te tsabit nei leh ngawl la si ti rel si. Jesuh in Minu, heita ka seng tseih si tsim? ka hun kim lai ngawl si ( John 2:4 ) ti si. A nu Mary in nenom te nenah, a relnak hem puah un ti si. Me munah Judah daan bangin mikhual te kutsom nak tuh koih nak tibeel 6 om si. Jesuh in nenom te nenah " Me beel hemah ti dim in thun un" ti si. a thun tselh zawh phang nenom te nenah Beel sunga ti suak ula puai puahtu pa nenah pe un ti si. Puai puahtu thu neithu pa nenah ti a pe phang Tsabit in tsang si.
Kei be nak kei Pathian heh a hunkim no in naper veng tu a sita umtu kei nitin nunnak ah Bawipa Pathian deih daan lun in kei vumah a phaber a puahsak tuh hun thintsual no in ngak thei tu kei si theinak tuh Pathian in kei veksen vumah muitsu kei pe sak tasen..................
Nawn Thang
No comments:
Post a Comment