Pathian Thu heh Damnak si

Pathian Thu heh Damnak si ( IISiang 5:10-15) 

A. Naaman Pharnat Dam

              Ralbawi Naaman thu heh kei theisaak bangin Ralbawi maktara mingthang pakhat si. Pathian a kihzah bek si ngawl muang ngamtu a sita a raldo nak ah Pathian in bawm atsia nehnak ngah rengreng veng si. A Kumpibawi pa in khen a muang ngaingai tiheh mu thei sising. Me tibang rori ralbawi mingthang , Kumpibawi pa muang ngai nak a sita tangka lamah dasam tu ngawl tiheh um ten nak si. Sipelhatsia thinhar thinphu nak, thinnuam ngawl nak a thup no in nei kuhzeen si. Timi heh tumah theingawl nak a taksa vumah Pharnat manin kheh si si. Me Pharnat pin a dam thei nak tuh kawtizah thuruat in a thintsawl ol ha? Naaman san laiah Pharnat dam tear theitu sii om ngawl situ si. Pharnak a nei lam midang in a thei asin khaw pulam ah not/hawl nak/koih nak ngah tu si. Ralbawi a si tsa le Kumpi bawipa muang ngai nak pa a si tsa khaw sungah om tu tiheh a si theingawl lam amah rori in theitsiang si. Midang te thei khatu lau in a thup tseih kheh a omlawh nu in a thei phang Pathian sel Profet Elisha nenah hawh tu’n rel si. A omlawh nu rel nak bangin Ralbawi Naaman khen Profet Elisha nenah hawh atsia Jordan ruun ah vei 7 a niim phang a natnak pharnat dam si tiheh thei ten sising.
              Ralbawi Naaman bangin Pharnat tuar ngawl pelh na singkhaw kei nun khawsa nak ah tumah theingawl nak thinharnak nei ten tu um sing. Ramdang om te’n tumah theipi ngawl nak harsanak nei teen tu sising. Mi zahlam ten naper sinpi ngawl nak, om nak ram te awn thiam ngawl nak, damngawlnak ( nu le pa kiangah om ngawl ) le Palik kih nak ( Malaysia om te pawl ) manin thinpit vangsang ka om hun tampi om tu si. Khaw lama a om ten khen thilri man a kai nak man in le zing le zan ei tuh in tuh, tsate tawngkai nak tuh tangka thu kei ruat phang thinlung sungah a thup no in thinharnak nei teen bel tu um sing. Me kei thinhar nak pin kei thin a nuam tear theitu Sii heh Pathian thu bekbek si. Tangka/ inn le lo pha kei nei a si khen kei thinlung sung muril ngaingai nuamnak pe thei ngawl si. Naaman pharnat a dam nak thu panleh phang Jordan ruun ah vei 7 a niim tsa si ngawl si. A damnak ber heh Profet thu/Pathian thu a ngai ta damank a ngah sawn kheh si si. Tsimi man’n u le nau te mah le inn sungsang ten ah Pathian thu sungah niim tawm kul si sing. Innkhaw kim ngawl pelh a sikhen a om sun ten sawngen dang nak le thazang pedun nak nei thei tu tuum dang asing. Pathian thu man’n mah le sinak vumah thinnuam te heh mi engnung ber te si. 

B. Pathian thu in khawtibang minung khen mang ot si

                Ralbawi Naaman damnak a ngah thei nak tuh lam a muhtu heh a nen omlawh nu si. Me a nenomlawh nupang nu heh Pathian thu umtu le Pathian mang nak Profet thula thei ngai tu a si lam theitheih nung si. Ralbawi Naaman khen omlawh nu tear nak men nak poh ti ngawl si. A rel/tear nak bangin rawlbawi Naaman in a lun lam mu thei sising. Kei pawlpi, kei pawlkom ah mitsim, ruangrai han kihzah nung te pawl bek hun pe tuh si ti ruat kha veng sising. Pathian in minung pakhat nen teenah thiamnak Talent pe veng si. Tsimi tsa kei menah tsimnak thiamnak ka nei ngawl poh mi hmaiah Pathian thu rel tu ka ngam ngawl ti veng thu za veng tu sising. Pathian thu ah mi theihdan nak om ngawl si. 

              Dawltaber ah thazang kei le dang tuh ah Ralbawi Naaman thinlung sungah a thup no in thinhar nak a petu Pharnak pin damnak a ngah theinak heh Profet thu/Pathian thu pe nak a lun/ngai ta si. Mi tampi ten keini menah Biakinn kei leng awng ngawl, Pathian thu kawtinsim kei theithei tuh ti kha hun nei tu sising. Biakinn hawh in thurelnak ngai bek heh Pathian thu theingah si ngawl si. Pathian awntsang Bible sungah Pathian thu ruakruak in dim si. Kei sungah Pathian thu a dim theinak tuh in Bible siar kul si sing. Biakinn khawm theitu ten khen Pathian thu za bek si ngawl in nun pitih kul si. Tselhphang mi zahlam ten a thureltu pa pan in thurel nak ngai kha veng si sing. Thurel thiam mingthang singawl lekhaw Doctor te thurel nak bek thupi tsan in mi zaraan te thurel nak zong heimah si ngawl bang in om kha veng si sing. Pathian thu heh vangsang khaat lam khat hiam bang a si tsa Pathian thu thaw a nung a mi le tsa tutu in a rel khen Pathian in muitsu pe thotho si. Keimah ni khen Pathian thu kei thei nak topi men ngawl in midang te Pathian thu thaw tsawm dang thei zuam dang a si. Kei thin muril sung a thu no in thinhar mangbang vansang kei nei nak hem heh Pathian thu bek thaw thinnuamnak nak ngah thei tu si sing.