Thiangrimnak

“Keimah  ka thiangrim ta nangmahni khen thiangrim deve un”
Ipeter 1:16

1. Thianrim heh khumnung muhnak (Joshua 3:5)

    Joshua alian pa 3 sung kei pan si lekhaw Moses thih zawh Joshua le Israel te Pathian pe nak Canaan ram lam a hawh teih laitum thu si atsia a tsamba nak Shittim pin Jordan ruun ah hawh dang si.  Laikhawl hun a si bangpahin Jordan ruun heh tilian ngai si. Atsom zawng rel asing khaw Joshua in a mi Israel te nenah," Thiangrim in om un, Heita tiphang thaisun in nang nenah Bawipa in khumnung puah tu si" ti si. Aheita Pathian thil khumnung a puah tu phang Israel te thiangrim tiar si ol ha? Levi mi puithiam te thukam kuang thaw lamhuai reng tsi Israel te thiangrim kul ol lai maw? Si si! Pathian in a mite vumah khumnungnak a puah tu phang thiangrim masa tiar veng si. Sinai mual in Moses in Thukam 10 a le tu phang khen a mipi te thiangrim tu in Pathian in rel si. Thukam lun mun tampi ah me thu heh mu tuh tampi om si. Tua ka nun sungah khen kei vumah Pathian thil titheinak le khumnung a puah nak kei tawk, kei ngah ngawl heh Pathian maiah kei thiangrim ngawl ta situ si. Ka it nak nu le pa, u le nau te kei harsa phang a kutkolnak thaw, kei lungse hun ah nemtu phaber, kei teersuk phang tholeh tiartu a silam le kei vumah thil khumnung a puahnak te mu deve tu in kei deih si. Umtu kei si bangpah in heizongza tah kei nun thiangrim masaber tiar kul si sing. Tsimi phangbek in Pathian in kei vumah thil khumnung tampi puaksak tu kei si.

2. Mi borhlawh te pawl siatsuahnak tuar (Joshua 7:5 )

    Joshua 7 sungah Israel ten Jerikho khawpi neh in Ai khaw kohno a sunglam mu thei si sing. Ai khaw do nak tuh ralkap veksen hawh kul tu ngawl si thawng 2, thawng 3 in neh tu a um nak sipelh Ai khaw ten sawn Shebarim tinak lungto tian hil in Israel ralkap 66 rek ngah si. Israel mipi ten me thu a za phang lau ngaigai in thanau nak tawk si. Tsimiphang Joshua in a angki bal in Thukam Kuang mai leilung ah bok si. Josuah 7:6 pin a nuailam phatak no kei siar a si lekhaw Joshua thinpit in Pathian nenah thudongnak tampi a puah lam mu thei si sing. Heita Ai khaw a sung ti le Pathian thupenak, ralneh phang ral te nenpin heimah le tu ngawl a si nak Akhan in a ralte nenpin Babylon puan mawi ngai pakhat, Pawng 5 arit Ngun tum le pawng 1 lai arit sui tum a le ta si. Pathian in Israel mi te thiangrim ngawl in a bal ta ral nehnak pe leh ngawlla si. Pathian in Joshua nenah, ' le tu ngawl ka ti nak a letu inn sungsang le a nei nak hem thaw meihal tu in tiar si. Akhan a thih Pathian in Ai khaw do tu in tiar leh atsia beihno in neh leh si. Thiangrimnak ti nak heh heiha? taksa bek singawl in keithinlung, kei ruatnak, kei ruangpi thiang tiar kul si sing. Nun thiangrim no kei om phang Pathian in keimahni muitsu pe veng atsia a penak muitsu vumah ngalnak, puarthaunak, midang heimah heisiar ngawl in hun kei mang phang a dawltaber ah tarah vansang laam in om leh thei si. Thiangrimnak na nenah a om leh ngawlla lekhaw dumsuknak, Pathian siatsuah nak tawk thei si.

3. Thiangrim tawm un (Semtirnak 35:2, Joshua 24:23)

    Jakob in a innsungsang le a nenah a um tu te nenah,"Ramdang khawvang biaknak nang nei nak heem vor barh un, thiangrim tawm ula van ther sil un" ti si. Joshua in khen ramdang pathian milim vor in Pathian nenah thinlung tak be tiar si. Ipet 1:16 sungah,"Keimah ka tiamgrim bangin nangmahni khen thiangrim deve un" ti si. A numg Pathian be tu in le A nenah hawh tu kei si lekhaw kei awnkam, kei nundan, kei naper nak ah le heizongza ah thiangrim kul si sing. Job le Joshua bangin kei innsungsang, kei u le kei nau, khawsung ah le kei kiangkap a om te nenah Pathian deihzawng nun thiangrim nei teen theinak tuh sodun dang a sing.

Asiartu na vaseng vumah Pathian in nun thiangrim nei theinak tuh a raula thiangrim thaw kei om min teen ah kei bawm tasen. Amen