Tuma lai'n patsa te pa 2 kheh Sipuh thaw
Khualvak kawm si. A keng nak Sipuh kheh to
ngawl in rii thaw kai kawm in vak si. Tsimi
kheh midang ten a mu phang .. Aw!!!!!!!!!!! Me
Patsa te heh Sipuh keng timi a heita to ngawl,
kawng thaw rori a vak kawm? A hawh ot min ah
kawtin ha a leng thei tuh. Me patsa te kheh luak
heimah nei ngawl ti'n sualnak zei si.
Tsimi phangin a pa kheh Sipuh vumah kai
in to atsia a tsapa in rii thaw a mai pin kai si.
Tsimi a pa sawn Sipuh vumah to in khual avak
kawm patsa te mutu te'n.... Ai ai ai!! Zawnruat
nak thinlung kohno khen a nei ngawl si ol. Amah
zong Sipuh vumah nuam ngai in to atsia a tsapa
sawn a mai pin rii thaw kai tiar. Tsapa vum ah
ngaihharnak thinlung kohno khen nei ngawl PA ti'n
sual zei si.
Midang ten tsimi bangin a ti pang Sipuh
vum pin tolh atsia a tsapa kheh Sipuh vumah
to tiar si. A pa in a mai pin rii thaw kai si. A
khualvak kawm a mutu te'n...... alaaa!!! Tsapa
sual, mah tsawmtu a Pa zong kawng thaw
vak tiar atsia amah pi zong Sipuh vumah nuam
ngai in to. A zak ngawl dan heh ti'n sual zei
lehleu si.
Tsimi phangin patsa ten Sipuh vumah to
kawm tu in thu laireelnak puah si. A puah nak
bangin Siuh pakhat vumah a patsa to khawm in
a khualvak peh si. Sipuh vumah minung pa 2 to
lam midang ten a mu phang..... thinlung sual dan....
Sipuh pa 1 vumah a pa 2 rori to. Ramsa ngaihhar
nei ngawl patsa te ti'n sual nase tak in zei si.
A dawltaber ah patsa te kheh thurat kawm
si. Kawtin kawtin kei om a si khen kei sualnak
a zei ta tu hen vang keimahni sawn in Sipuh phur
kawm sawn a sing ti'n lungkim kawm si. A keng nak
Sipuh kheh phur kawm thah lamin a khualvak nak
pehzom atsia a rei ngawlin a mahni mutu mipi ten
nihsan si. Luak hor patsa te, Sipuh sawn to
ngawl atsia a Sipuh sawn a phur kawm heh luak
nei ngawl tinak si ti nihtip dang si. Midang te sual
zei nak a rim ongla ta a khualvak tuh lai khen vak
peh ngawl la in a phur nak Sipuh kheh lakulh atsia
me mun khen ah om nom si ti si.
Leivum ah kei nung sung hei na puah/dek, hei
na ei/in, kawnai na hawh, kawtin na om le na sinak
paan in sualnak zeitu, nihsan tu nei reng tu si sing.
Tsimi ta a pha na ti nak vumah thil na puah phang
kiangkap te awn nak menin tsawl ngawl in mailam
ah kalsuan thei tu heh kei mailam tsa thupi ngaingai
si. Kiangkap huihra men ah kei du a si lekhaw Lawhding
nak thaw khawla tu si sing.
No comments:
Post a Comment