Suakni Puai

Suakni Puai

Mark 6:21-25

     Minung ten Ni thupi ngai pa 3 nei sising.

1. Suakni

2. Zi nei,pasel nei ni

3. Thih ni

                        Milian/tsarah, Mitsim/mitaw, Melmawi/melse, Misang/mitsom,... tutu in sikhen a vuma Ni thupi pa 3 heh nei ten si sing. Pakhat le pkhat a mang dan a bangdun ngawl bek kheh si sawn si. Kei hun mang dan in kei sinak lang tiar veng kei si. Kei sinak lang tiartu le kei ruatnak a lang tiartu veng pakhat heh kei awnkam si. Mitsim ten,"Thinlung sungah a dim ta awnkam in suak" ti si.

                        Minung ten kei haw bernak le kei kiangah om kei rem ngawl bernak heh kei thula tsiangsek in a theitu le tumah thei ngawl nak kei nundan mawi ngawl nak te mipi te nenah a phuangtu te vumah semsem rekdun tu khen napmawh dun ngawl tian suak thei si. Thuson vei khat kei rel a si lekhaw khup leh nak tuh thuson vei 100 lai rel leh kul si ti si. 

                       Keimahni e kei haw nak te vumah kawtibang thinlung kei nei? Kei relse ot leita ta mi nenah zuar thei dan ruat in relse veng te si sing maw? A tsuangtung ah kei sinak, kei nundan mawi ngawl le kei sung thuthup a theitu ten midang nenah a rel khatu lau in amahni sualnak a phunphun zei in relse masa veng si ngawl si sing maw?

                      Bible sunga kei mu bangpah in Herod in a nau Filip zii a longsak thu kheh Tinim petu John in Herod ah a rel ta thawnginn sungah khum si. Heita Herod in thawninn sungah a khum ti heh Bible sungah tsiangno in muh theih nung si. Tumah thei ngawl nak Herod in a nau zii a longsak thu a thei man'n John vumah a ang ngawl leita ta thawnginn sungah a koih nak si. A ngaingai ti lekhaw Herod in John a heh Pathian minung midik a si lam thei reng sipelh a hei ta thawnginn ah a koih tiheh Mark 6:20 (he was a righteous and holy man) ah mu thei si sing.

                      Kumpibawi Herod in a suakni angnak puaipi puah atsia ram sunga milian, uktu te le ralbawi te sawm si. Herodias tsanu in laamnak nei atsia a laam a mawi ngaingai ta Herod le a sawmnak mipi te ang tiar si.Tsimi kheh Herod in a thei phang a ang leita ta na deih pohpoh ka ngen la na pe tu sing, Ka uknak ka ram zahlam tian na pe siang tu sing a ti thu mu thei si sing. Tsanu in a nu Herodias thuron phang tinim petu John lu ngen tiar si.

Keimahni santu Jesuh suahni hun leng lehleu tula ta amah muak tu'n kei thinlung rem ongla si sing maw? Tu kum Christmas e kawtin ha ka/na mang tuum? Tute pawl sawm in mun khat ah nuam tak mang tu in ruat si tsim? Pathian deih nak kei thinlung, taksa le raula nuam ngai ah kei mang theinak tuh in a masaber ah kei innsang, kei pawlpi le kei kiangkap te rem masa kul si sing. Pathian thuron ngawlin mahni deihnak rualpi te nenah thu kei ron a si lekhaw Jesuh suakni muaktu lakpin a muak sual te situ si sing. Christmas angnak nang vumah om tasen...