Tu san leivum pi heh ruatban nung ngawl in khangso lam thei si sing. Tsimi khangsonak a theng tseihtseih leivum pi ah om deve te si sing. Midang te kangsonak heh keimah thaw heimah seng ngawl titheih nung ngawl si. Heitasim kei ti phang leivum pi ah kei om deve ta si. Midang te bang rori in san theng nak hemah theng in khangso deve tu tinak si ngawl si. Amahni bang si tu khenheh har ngaingai si. Amahni bang kei si thei lawt tu ngawl poh ti’n thinnau in om tuh khen silawt ngawl si. Kei mahni tawkzawn in khangso thei deve sising ti thinlung nei kul si sing. Tsimi khangsonak kei ngah thei tuh ngawl in a kamtu natse te paan dang a sing.
1.Kihnak le launak
Kei khaw pin mundang ah ka leng phang ka theisuaknak pakhat heh mah le mah muangtsawmnak nei ngawl, midang kei kihnak thinlung ka nei kuhzian lam theitsawm sing. Santehnak in kut sungah tangka kei nei reng sipelh dawr lianpi ah lut in thil lei tu sipelh lut ngam ngawl in lehlawi veng si sing. Kei lut ngam spelt si khen mah le mah niamngai in ruat kha veng si sing. Dawr sunga thil zuartu ten thudong khatu lau in amahni thaw khawlapi ah pial veng in kei om heh kei thinlung sungah kihnak le launak kei nei ta si. Mi upa awnpi tu vang rel tuh si ngawl kei lau dan heh mak lawlaw si. A ngaingai in kei ruat sile khaw a thupno kei nei nak kih le launak in keimahni tampi kei si tuh nak ah si thei tuh ngawl in tampi kei kham veng si.
Kawnai pin ha kihnak le launak kei nei? Me thudongnak heh keimahni le keimahni thu dongnak nei veng si sing maw? Khaw pin Kalay Myo bazar, lampi kiang laidawr le dawr lian doh sungah lut ngam ngawlin kei om veng heh a heita si ol ha? A si thei pakhat heh kei tsarah ta si maw a si ngawl lekhaw tsimnak kei nei ngawlta mah le mah niam ngai ah kei ruat tawm ta khen si bel tu si. A heizongza ah kih le launak kei nei heh kei mawh himhim in ruat ngawl sing. A si khen a si tuh nak himhim sing.
Mi khangso ot kei si lekhaw me kihnak le launak heh vor singawl lekhaw zam kul si sing. Keimahni kei leng tuhzah ah leng tuh ngawlin keimahni kham veng sing. Thil pakhat khat kei puah tu phang ka tithei ol ngawl, ka tisual kha asin ti thinlung kei nei lekhaw kawntik ni khen kei khangso thei nak tuh lampi om ngawl si. Milian le khawpi sungah a om hem heh heizong tithei te si lawt ngawl si. Na tithei nak tithei ngawl khen si men tu si. Keimahni tah a ti thei sawn lekhaw AW timi maw ti’n zir salawn tuhnak sawn kheh si sing. Kei mit kei thinlung kei luak te rii thaw henpek ngawl in hei zongza zir otnak thinlung nei kul si sing.
A ngaingai ah si lekhaw tumah in nangmah a nautat le muniam ma keimahni le keimahni nautat, muniam masa tawm veng si sing. Dawr kawtizah lian ah na lut sikhen dawr sunga minung ten nangmah tahin na neinak na tangka khen paan sawn si. Timita nangma kheh phatak no in paan akhaw thil na lei belbel tuh tianin thintsual no in nangmah awnpi tu si. Na deihbang a si ngawl lekhaw lei ngawl in na suak leh sikhen nangma thu, poi ngawl si. A mahni maisong in deih lem ngawl sikhen kei leisak tuh khen si ngawl si. Dawr ah thil leitu te etphet no awnpi tu heh amahni naper si deve si. Ka rel ot nak sawn heh thil a si dan theikul ka tinak si. Tangka ngahnak tuh tiah sun le zan naper te kei sita tulai thil si daan thei man ngawl in om si sing.
Tulai kei khangno te laibu bu khat poh khen siar tselhnak nei ongla sing maw? Mah rori naper in kei ngahnak tangka thaw laibu bu khat poh khen lei ongla sing maw? Lai kei siar ngawl lekhaw kawnai pin sim thei nak le tsimnak kei ngah tuh. Tlawng kei kai heh tawk ongla ti tuh si ngawl si. Tlawng lai in nangmah tsimnak le theinak tamipi pe lai ngawl si. Tsimnak le theinak na zei bet thei nak tuhah laisiar daan le lai ngan bek si nangmah a zirh. Degrees buaih kawzah na ngah a si khen a ther zirpeh nak na nei ngawl si lekhaw kei Degrees buaih kei ngahnak heh a thi si ongla si. Lai kei siar ngawlin kawtin sim theinak le tsimnak kei ngah theu tuh. Kei nu le pa, kei naute khawtin sim a mit kei vaar tiar thei tuh.
A tawpnak ah kei paan leh a si lekhaw kei neinak natse a si Kihnak le Launak in keimahni mi kei bang tuh ngawl in le kei khangso tuh ngawl in kei kham veng si. Tsimi kei neh thei nak tuh lampi a om heh kei mit kei thinlung kei ruatnak vaar tiar kul si sing. Khawvar kei mu thei nak tuh a om heh mitsim le mi thu thei te laingannak laibu siar heh si. Lai kei siar tam lekhaw theinak le tsimnak nei tu atsia thil a si dan te thei in kiangkap om te nenah vaarnak pe salawn in khangso thei tu si sing. Kihnak le Launak kei vor/zam thei a si lekhaw lawhdingnak kalbo pakhat kai ongla tiheh theitawm dang reng a sing.
No comments:
Post a Comment