Pathian mang nak thil kohno te pawl

Pathian mang nak thil kohno te pawl
Bible siar tuh: I Kor 1:26-29

       Leivum thil om hem heh amah kawti bang ti tah in a mangtu tu ha? ti heh thupi sawn si. Thil kohno a si sikhen Pathian in a mang lekhaw thil heizongza heh mang theih nung si.

A. Naupang Nu ( 2 Siang 5:2 )
    Me naupang nu heh Siria ralkap ten Israek a do ( tawng ) phang a len nak nu si.Siria ralkap Bawi Naaman in naupang nu heh a zi omlawh tuh in mang si. Ral Bawi Naaman in tumah dam tsiar thei ngawl nak phaarnat nei si. A natnak heh tu nenah hawh a sin pha ol ha? khawtin puah asin pha ol ha? ti ruat thei ngawl si. Tsimiphang in naupang nu in," Ka bawipa heh Samaria ah om Profet nenah hawh asin deih ngai sing e, A phaarnat heh
dam tsiar rori tu "  ti si. Naupang nu relnak pin limdiknak nei atsia Profet Elisha nenah hawh si. A relnak bang in ralbawi Naaman in puah atsia damnak ngah si. Reltsak ngawl me naupang nu heh Pathian in a mang phang mi ropi ralbawi Naaman damnak tsa muhtu ah tsang si ( 2 siang 5:1-14 ). Tutu si khen Pathian in a mang lekhaw nempi pittseih pakhat si thei si,

B. Meiro kohno ( 1 siang 18:44 )
     Ahab in Israel Siangpharang aper lai in  a pa Omri thaw a patsa Khawvang biaknak Baal a be manin Pathian in kum 3 sung ruah sar tsiar ngawl, Dai khen a sar ngawl tsaktawh rampi paam nase nase ngai in leng si. Tsimi phang in Pathian naper profet Elizah in van pin ruahsar leh tu in sawngen nak nei sak si. Sawngen vei 7 a kim zawh in tipi thuanthum vum ah meiro kohno lang si. mero kohno sipelh atsia Pathian mang phang ramro, ramtsar min leilung kheh ruahti khampek in ngah leh thei si. Midang tsa na pe nak a dawm, a koh reltsak ngawl pelh napikhaw Pathian in a mang lekhaw kei rampi, kei phunpi tsa damnak le tsungnung nak in tsang tu si.

C. Olif siiti dawmno ( 1 Siang 17:12 )
     Israel ram paam a leng man in Zarefath khaw om numei nu in sangvut dawmno le Olif siiti dawmno vei 1 ei bek nei si. Numei nu in a neih lam tang no Pathian nenah pe manin Pathian khen ang in a mang nak pa khen ang si. A nei nak dawmno Pathian a pe manin a penak vumah Pathian in mutsu pe atsia Paam a om sung le kum 3 sung ah sangvut bo thei ngawl, Olif siiti khen bo awngngawl si. Numei nu in a nei lamtsang Pathian a pe man in Pathian intampi in zai tsiar si. Kei milian phang, kei remtsang phang Pathian tsa le Phunpi tsa per tu lai sing na ti nak Pathian in ngak ngawl si. Tua na nei nak dawmno vumah muitsu pe tu na ngak reng si.

D. Naupang ( Matt 18:2 )
     Piangthernak zawh rei ongla pelh mang theih nung ngawl le kum upa ongla pelh midang tsa nempi ngawl minung tampi um si sing. Ninglun ten Jesuh nenah, " Vanvum uk nak ah tuha a lian ber?" ti'n dong si. Jesuh in naupang pakhat ko atsia amah ni maiah ding tsiar si. " Tutu sikhen me naupang bang niamkhiat nak a neite Vanvum uk nak ah a lianber te si " ti si. Upa/uhaam te thurel, nundaan zirh phang in Bawipa in naupangte mang si. Bawipa a thu sungah kihzah/ niamkhiat in kei nung a si lekhaw Mi upa maiah Pathian na khaisang akhaw midang tsa pantsak tian na mang tu si.

E. Nga dawmno ( Matt 15:34 )
     Jesuh in mipi thawngli thu a zirh lai in mipi te rikaam pelh ei tuh nei ngawl si. Tsimi lai in sangtun pa 7 le ngan dawmno pa 2 khen Jesuh nenah keng si. Me nga dawmno sipelh napikhaw Pathian in muitsu a pe phang ming 4,000 te pumpur pek bekzongawl mipi ei tselh zawh a khawm leh phang bawm 7 val si tiheh Bible sungah mu thei si sing. Pathian tsa kei puah thei nak dawmno, kohno pelh napikhaw Pathian in a kul dandan in zai tsiar thei si.

     A thupiber heh Pathian tsa, ram le miphun tsa kei pe tu le Pathian mang nak kei si tu heh si. Bawipa Pathian in kei ti thei tawk tian Amah kul ti dandan in man nei ngai in mang nak situ heh thupi si. Midang mitmuh ah Pathian na kei pernak te reltsak ngawl pelh Pathian in a mang lekhaw manneiber in kei tsan sak tu si.


Nawn Thang