Thing vungtu pa le Milian pa

Vei khat lai in thing vungtu pa pakhat in a khaw sunga
peisa zei thei milian pa nenah hawh in a nenah naper
ngen si. A ngennak bang in milian pa in a lo sunga
thing vung saktu tuh in naper pe si. Thing vung pa
naper man khen milian pa in a tamngai a pe tsa ang
ngai in inn ah hong si. Zan a ruatnak ah milian pa thing
hem heh a tha nei hem thaw vung tu'n zuam tu sing ti
khentsetnak nei si.


A thai zing naper tu in milian pa nenah a hawh phang
milian pa in heipi pakhat pe si. A heipi le in lo lamah
thing vung pantu in hawh si. Ni khat nak a thing vung
nak heh thingbul 15 heh beihno in vung thei si. Milian pa
in a naper zuamnak vumah paknak nei in mailam ah zuam
lelei rih tu in thape si.


Milian pa paknak le thapenak a thei phang a ni 2 nak ah
a masa tsah zuam sawn si. Sipelhatsia ni 1 nak a tselh nak
tsah dawmsawn thingbul 10 bek vung thei si. A ni 3 nak ah
si theihnung ngawl ti'n nase ngai in thingbul vung pelh thingbul
7 bek vung thei lehleu si. Ni khat nu nikhat dawm perper in
thingbul khen vung si.

Thing vungtu pa in a mah le amah, " ka tha bo si ol la " ti'n ruat si.
Tselhphang thing vungpa in aitsan in milian pa nenah hawh in
zuam ngai in thing vung nak sipelh dawm perper a tselh lam
rel si.

Milian pa in a penak a kut sunga heipi pan atsia," Na heipi vei
kazah na tsat ongla " ti'n thudong si. Thing vungtu pa in milian pa
nenah," Thingbul vung tuh a tam manin heipi tsat hun ngah ngawl
sing " ti'n rel si. Milian pa thudongnak a ruat poh lehphang a samnak
tsiang ngai in thei leh si ti si.

====================
Minung tamsawn heh mahni thiam nak vumah a ther thiam ( Update )
tuh in puah ngawl si sing. Mah thiamnak in nun sungah mang theih
nung ongla ti'n thinnuam ngai in ruat kha veng si. A pha ( GOOD) tibek
in lungkim rih ngawl in phasawn ( BETTER )> phaber ( BEST ) tian
leng tuh in zuam kul sising. Tu san heh IT san sibang pahin tuni nikhat
lai kei siar ngawl lekhaw mi kei bang ngawl pannak si ongla si. Kei neisak
kei tsimnak, kei thiamnak te nitin a ther a ther theih tuh in heibang naper
a si khen zuam kul si.