Umtu te kei dumsuk le dumsuk ngawl ti kei theitsawm heh kei khawnu thei ngai veng. Piter nun kei pan phangin amah heh haunak tuar tam tsuang si. Heitasim tilekhaw Jesuh kiangah a om tu ber le a deih tu ber sita si. Tsimi zahin midang tetsah Jesuh a deih tsuang sipelh midang tetsah dumsuk masa tu pa sileh si. Umtu minung tamngai in khen nitin Jesuh thaw nung dang in aman lam kei huai si ti kei tipelh kei taksa daan ah kei deihnak thil te kei vumah a kim ngawl phangin mah minung pi te muang menin heizozang a ti theitu Jesuh sawn ahkheh khawla tsiar kha veng sising. Me heh kei dumsuk naktuh ham pan nak si. Sipelhatsia Piter in Satan pa kut sunngah dumsuk ti a thei/tawk phangin Jesuh thaw khawnendun lelei si. Tsimita Khristian umtu kei nun ah, ninglam ah hei kei puah titahin tu rori ti heh thupi sawn si.Umtu mi tampi ten kei mahni le mahni muang tsawm nak manin Jesuh ningluntu kei sinak pin lampial veng sising. Israel minung te kheh Ai khaw a do phang mah le mah muangtsawm in le ralkap tampi kul tungawl ti in Ai khaw kheh do atsia rel tuh om ngawl in Ai khaw kohno kheh sungburh nak thaw tawk si. Umtu te Pathian maiah amah Pathian muang tuh ngawl tianin sonnak, zolnak le sualroihnak kei tawk phang amah Pathian thaw khawla dun tuheh a beih ngai thil pakhat si. Sipelhatsia Israel minung te kheh Josua in Bawipa maiah sualsirnak nei vut lehin Pathian thaw a khawnen phang Pathian in nehnak pe leh si.
Umtu te heh Piter bangin ni tin kei nunnak ah umngawltu te tsah sonnak, zolnak le sualroihnak tawk tsuang tu te kei si bangpahin sonnak, zolnak le sualroinak in keimahni a neh zo tuhngawl in sawngen tu thazawng po ngawl in zuam kul ngaingai sising. Tsimi sonnak, zolnak le sualroihnak kei tawk phangin kei nunnak ah Pathian thaw a khawnendun daan lang tsiartu sawn si tu si.Umtu sing titsawm pelh Satan pa sonnak, zolnak le sualroihnak tawk ngawl kei si kha lekhaw Pathian thaw kei khawnendun ngawl, Jesuh sungah kei om ngawl, nitin Jesuh thaw kei nung ngawl tinak si. Tsimi manin kei vumah kei du/dumsuk nak tuh sonnak, zolnak le sualroihnak a leng heh Pathian tsungnungnak lang tsiarnak sawn si ti ruat in Pathian pe nak tuar theinak, amah muang in do dan thiam kul sising.
Amah Pathian a umtu te nenah harsanak khen leng tsiar, tuar tsiar in me harsanak ning ah tsungnungnak thaw Pathian in keimahni muak tu in ralring rengreng veng sawn kheh si si.
Nawn Thang
No comments:
Post a Comment