Abraham Lincoln Thuanthu tsom

                 Abraham Lincoln heh a vei 16 nak United States President rampi ah mihang te le sel hem zalennak/luatnak apetu pa si. Amah heh Thomas Lincoln le Nancy Hanks Lincoln te tsapa si atsia Hodgenville, Kentucy ah February 12,1809 kum ah suak si. A suahpi unau te heh a unu Sarah le a naupa Thomas te nei pelh atsia kum rei ngawl ah a unau ten zam si. Unua nei ngawl amah no ruak harsa ngai in khanglian tu pa khen si si. A ram thubuai nak manin om ot leh ngawlla si ngawl in om ot pitteih sipelh Kentucky pin Perry ram, Indiana ah 1817 ah thawn si. Tsimi bek zo ngawl kum 9 a kim phangin a it pitteih nak a nu in zam lehlau lai si. Kei theisaak bangin Abrahm Lincoln heh lai zuam ngaitu sipelh harsa tsarahnak manin laingan nak tuh talung nei zo ngawl ta meihol thaw laingan daan zir si. Tselhphang zan laipan nak tuh meivar a nei ngawl ta lampi meivar nak nuai pin laipan veng si ti thei sising. Tsibek singawl a omnak pin peng khawla ngai ah laisiar tuh laibu zawng veng in, laibu phunphum le Bible siar nap taktu pa si. Abraham Lincoln heh a kum 33 a kim phang Pathian muitsu pe nak kum 23 asi Marry Todd thaw neidun si.

Mi tampi in Lincoln heh tihen ko veng si: Abraham Lincoln, Honest Abe, The Great Emanciptor ti'n ko si. Abraham Lincoln heh kum 56 a si phangin Washington D.C ah a it nak a rampi le a mipi te  April 15, 1865 in zam si. Mihang te sel pin luatnak a petu Abraham Lincoln hawh nak lampi pan dang rih asing. A tsom tsiang in :

1816 a om nak min pin ram thubuai ta not nak tawk si. A naupang laipah a inn sungsang pan in nase ngai in naper si

1818 A it pitteih nak a zii Nancy in zam si.

1831 Pumtsawm zeinak ah nase ngai bawngsenak tawk si.

1832 State sunga Upadi lam pawlkom (Legislature) ah lut tu zuam deve pelh naper ngah lawt ngawl si. Daan tawng ah kai tuum pelh kai zo ngawl.

1833 Pumtawmnak sipuazi puahleh nak tuh a rualpi nenah tangka pu si. A sipuazi lawhding ngawl tsa a leiba rul thei ngawl phang leiba rul thei ngawl pa ti'n thukhennak Tazazung ah leng si. A leiba hem rul leh nak tuh kum 17 sung a hun mang/bo si.

1834 State sung Upadi thuneitu pawlkom ah zuam lehpo atsia a vei 2 ah ngah si.

1835 Neidun tu in a khaam saak (engaged) a it nak a khangai nu in zam si. Ti le lai ngawl thaw a thinlung naa in tuar.

1836 Thinlung damngawlnak, nuamngawlnak manin la 6 sung thi dawnzek in damngawl in naa.

1838 State sung Upadi thuneitu pawlkom ah daan te reltu tuh in zuam atsia lawhdingnak ngah si.

1840 Me petheitu le deng theitu situ zuam atsi lawhding.

1843 Upadi hampi puahtu (Congress) ah zuam deve pelh atsia lawhding ngawl.

1846 Upadi hampi puahtu (Congress) ah zuam lehleu atsia a vei 2 ak in  ngah si. Washington D.C ah naper pha tak per ngah.

1848 Upadi hampi puahtu  (Congress) dengdunnak ah zuam lehleu atsia neh ngawl in sung.

1849 A om ak State ah leiram/loram zuar laikhumnak (Land Officer) naper ngen pelh ngah ngawl

1854 United State a Senate pakhat situ in zuam pelh tangsuak zo ngawl.

1856 A napernak (National Convention party) ah vice-Presidential nomination si atsi votes 100 sungpin100 ngah.

1858 Unite State ah Senate pakhat situ in zuam lehleu atsi a vei 2 nak khen sung thotho si.

1860 United State ah President situ zuamdunnak ah zuam deve tsia President ngah.