Tungtaak/Paantaak le Tungtaak/Paantaak ngawl Inntek Pa

1. Tungtaak/Paantaak ngawl Adam ( Gen 1:26-3:10 )

          Amasaber Pathian ompi nak inn sungsang heh Eden dum sung om Adam te si. Muitsu tampi a pe bek zo ngawl nitin Pathian thaw pehzomdun reng ta a nun ah heimah dasamnak nei ngawl si. Pathian thaw pehzom dun reng sipelh ma otnak le deihnak manin Pathian thu ngai ngawl in a daan bal si. Nitin Pathian thaw a pehzomdun leh ngawlla ta a nunnak ah kul le sam nak tampi nei si. Amahni a ittu Pathian tawk tu khen ngam leh ngawlla in relh si. Pathian in "Adam Adam kawnai ah na om?" ti'n ko kul inn sungsang ah dinmun ah leng si. Keimah ni ee Pathian in Adam bang 'kawnai ah nang om?' ti'n ko nak sikha deve sising maw? Kei sikha a si lekhaw inn sungsang kilkawitu "Pa" tsa lungse nung ngai tu si.

 2. Tungtaak/Paantaak ngawl Eli ( Isamu 2:22-4:22 ) 

           Pathian in Kumkhaw suangbawi napertu tuh a thukam nak suangbawi innkaw te si. Sipelhatsia Eli in Pathian tah a tsapa te ultung sawn in thil phangawl puah ti thei reng pelh kham ngawl si. Tsimita Pathian maiah Suangbawi innkaw pin tam nak innkaw ah suak si. ' Pathian in keimah ultung sawntu te ultung nak situ atsia keimah zohsuamtu te zohsuam nak si deve tu si tsi si ' Isamu 2:30. Eli bang Pathian tah tsate ultung/lau sawn tu Pa sikha sising maw? Pathian muitsu pe nak khamtu le Pathian mingse tiartu Pa kei si khatu launung ngai si.

3. Tungtaak/Paantaak Noah (Gen 6:6) 

              Noah san laiah leilung pi heh sualnak thaw a dim tsa minung a puahtu Pathian sir in  om si ti Bible sungah mu thei sising. Sipelhatsia  Noah vumah Pathian ang si. Noah in Pathian thupenak bangin Tangphawlawng puah si. Lawng sungah Noah in ramsa bek lut tiar ngawl in a tsapa zii te tian a lut tiar ta Tilau thihnak pin luatnak pe si. Noah bangin ma tsate bek tian si ngawl tsate zii le tsate pasel tian vanvum kaipi theitu Pa si theitu heh kei kul nak si. Pa heh inn sungsang lam muhtu/huaitu Pa a sita tsate tsa thupi ngaingai si. 

4. Pantsaak/Tungtaak Abraham ( Gen 18:22 ) 

              Umnak ah Pa a si Abraham te inn sungsang heh Bible mun tampi ah mu thei sising. A thei awngkel ngawl nak le a mu awngkel ngawl nak ram ah umnak thaw hawhtu pa si. A nei talam tsapa khen Pathian nenah hibawl nak tuh it ngawl in pe ngam tu si. Pathian muitsu pe nak innsang te si si. Abraham in Bawipa bek a pan ta Bawipa in a nen lamah tang si. Pathian bek pan in amah ompi nak innsang, Pathian mai le minung maiah ding ngam tu le tsate tungtaak umnak lam Pa situ heh kei kul ngaingai nak pakhat si.