BAWIPA Pathian in Ezipt mi te a reem/erhnak a masaber heh ti pin thisen ah tang tear si. Ezipt ram sungah tiluang lianber a si Nile tiluang pi heh mipi te mang nak ber le rampi nunnak ti'n a ruat tsa Nile tiluang pi kheh pathian (god) ti'n be si. Ko daan dang in Hapi (spirit of the Nile ) ti'n khen ko si. A be daang nak a pathian Nile tiluang pi kheh mualpho nak tuhin Pathian in thisen ah tang tear si. Nitin pumtawm zei nak le a meh urber a si nga te khen a thi tei ta ti uih in mang theihnung ngawl in le mannei ngawl in tang si. A pathian (Nile) mualpho atsia a be nak khawvang dang ten khen san thei ngawl si. Be taak ngawl a silam lang si. Khat lamah a deng nak a tsa Israel te tsa Pathian thil tithei daan le huhham a lian daan musuak si.Simphurh/Dawkeng (Suah. 8:1-15)
Ezipt te khawvang bawinu a si Heqt/Heka tinak heh Simphurh/Dawkeng si. Tsimi heqt heh tsanu tsapa lam muitsu petu le nupang naunei te bawmtu si. Ezipt ten Simphurh/Dawkeng a ur le upatnak a pe laitak ah Pathian in a rampi Simphurh/Dawkeng in dim tear si. Ti sung, inn sung, zaunak, bel sung le a taksa vum tianah Simphurh/Dawkeng in dim si. Abe teih nak khawng pathian in amah ni harsanak le nokkhah nung ah a tang ta a pathian haw nak thinlung te suak in om si. Me thil kumnung manin Ezipt te pathian tah Hebru te Pathian thil a tithei sawn dan lang tear si.
Kangkawl (Suah. 8:16-19)
Pathian in Kangkawl mangin a vei 3 nak Ezipt te reem/erh si. Ezipt ram leivul hem kangkawl ah tang berh si ti akoh 17 ah mu theihnung si. Ezipt ram dawithiam ten ti pin thinsen, dawkeng ( simphurh ) khen suak tear thei pelh napikhaw leivul pin kangkawl ah suak tear thei ngawl si. Timita dawithiam ten Faro nenah,'Meheh vang Pathian thil tinak si' ti si ( 8:18-19 ). Heitasim tiphang nunnak nei ngawl leivul pin nunnak nei kangkawl a puah theitu heh nunnak petu Pathian bek om lam langtear nak si.
Thode (Suah. 8:20-32)
Thode heh Ezipt mi ten tsileh (tsanei) lamah muitsu petu pathian ti a ruat tsa thode rek awngkel ngawl si. Kanaan khawvang mingthang ngai Beelzebub khen heh " thode-pathian " tinak si. Tsimibang rori in a koih nak thode kheh ningtir nung ngai in tampi suak atsia Ezipt ram siatsuah si. Pathian in a be nak pathian kheh be taak ngawl a silam muh si. Muitsu petu tiah ruat nak a pathian in rampi thinpit mangbang vansang nak suak teartu ah tang tear si. A tsa Israel te tsa a be nak Pathian tungnungnak lang si.
Sumnam te thi (Suah. 9:1-7)
Ezipt ramah sumnam Sipuh, Kalauk, Laak, Kawlpaw, tuu le keel te pawl pulnat in thi si. Ezipt mite uar ngai nak a pathian kawlpawl laa pakhat si atsia a ko daan heh Apis ti'n ko si. Ezipt ram sungah sumnam te thi phang a be nak Apis in theisak kha ngawl bek si ngawl amah khen thi deve nom si. Meheh Pathian thukhennak si ti kei rel theinak pakhat heh Ezipt mite sumnam pul in thi pelh napikhaw Pathian tsa Israel te sumnam pakhat khen thi ngawl si.
Uilut meima (Suah. 9:8-12)
Ezipt mi te vumah uilut meima heh a leng taawm men si ngawl si. Pathian thupenak bangin Moses vuttsam le in van a theh phang Ezipt mi te vumah uilut nat tuarnak leng si. Thihnak tian leng ngawl pelh napikhaw mi pakhat no khen luat ngawl in tuar veng si. Natnak lakpin kan theitu ti a be teihteih veng nak Serpis te, Imhote te le Sunu ten san thei ngawl ti lang atsia a muniam ngai nak Israel te Pathian maiah mualpho im om si.
Rial (Suah. 9:13-35)
Rial heh harsanak le dodun phang Pathian mang nak thil kohno pakhat si ( Job 38:22-23 ). Joshua le a ralkap ten Kanaan ram a le phangin a ralte vumah Pathiam in Kek da le khawri, Bokbawn tian rial te tseer tear nak manin vang thaw rek nak tah rial daak in a thi tamsawn si ( Josua 10:11 ). Ezipt te be nak pathian Shu, van pathian Nut, hangnah hangrah muitsu petu pathian Isis, Seth le Osiris ten kham thei ngawl lam lang tear si.... " Leivum ah keimah bang tumah om ngawl ti nang thei theinak tuh'n nang reem tu sing. Tsimi phang leilung heh Bawipa a ma a silam theitu si u tsi " ti'n Bawipa Pathian in Faro neah rel si. ( akoh 14,29 )
Khau (Suah. 10:1-20)
Ezipt ram sung khau tam dan heh Bible in " a ram pumpuluk dim si. Me tibang Khau tam daan heh mu awng ngawl nak si. Mailam ah khen tibang khau tam daan mu awng leh tu ngawlla si" ti si. Ezipt ten rampi kiltu pathian ti a be nak Serajia in me thil tang sungpin kan thei himhim ngawl si. A be nak pathian tah a nung Pathian biak taak sawm lam langte si.
Thimnak(Suah. 10:21-29)
Ezipt mi te pathian Re heh khawvar petu ti'n ruatnak si. Horus le Thebes khawpi ah a ni pathian sangber Amun-Re le a dang varnak a petu pathian dang tampi neibet lai si. Sipelhatsia a be nak pathian ten Pathia erhnak khawthimpi a leng phang varnak pe theitu tumah om ngawl si. A tsa Israel te maiah mualpho im om si.
Tsa upaber thinak (Suah. 11:1-10; 12:29-33)
Tsa upaber thi heh Pathian erhnak 10 singpin a dawltaber si. Singphrang tsi lehtu tuh a tsapa khen luat lawt ngawl si. Pathian heh hei zongza puahtu, nunnak le thihnak neitu, a puahnak thil hem vumah thuneitu sangber a om sun Pathian si. Bawipa Pathian bang Pathian om ngawl lam theithei nak tuh si.
No comments:
Post a Comment