Angnak zeitu dangval pa

Patang pakhat pa in a tsapa ko atsia tihen thutah si,
" Ka tsapa.... leivum ah reipi ka om thei leh tu ngawlla ta ka om ngawl zawh in leivum na om sungah angnak thaw na om thei tu in limdik sing" ti si.
A tsapa in," Epa! kawtin ka nung lekhaw angnak tawk thei tu sim" ti'n thudog si.
A pa in, " mun tampi ah hawh la midang ten na rel tu si" ti in o si.

Apa a thi zawh in a tsapa kheh angnak zei tu in khualvak pan si. A khualvak a hawh tseih laitum vaar (river) kianga thingbul hingdum nuaiah Sipuh pakhat tawk si. Me Sipuh heh sipuh patang, taksa nei leh ngawlla ruh ruakruak sipuh si.

Sipuh in, "hi... dangval pa kawnai ah na hawh tuh" ti'n thudong si.

Dangval pa in,"angnak ka zei tuum si. Na thei lekhaw ka rel sawh la e" ti in ngen si.
Tsimiphang Sipuh patang pa in,"Dangval pa na rel tu sing. Ka kum no lai in innteek te pe nak hardawn, ti thiang in tubek thei sing, laikuang sungah ka lu ka koih nungsang ka maiah ei tuh lai om lep si nom si. Ei tu, in tu ti ngawl a dang heimah ruat nap ngawl sing. Me hun lai in keimah le keimah heh leivum ah a sahnung ber angnak thaw a dim tu pa ring kha awng sing. Sipelhatsia ka kum a teer phang minung ten keimah deih ngawl in vor thong men nak si leh sing. Tsimita thu ka tah ot ber nak pakhat heh na kum no lai in nangmah le nangmah thupi tsan in. Keima bangin kum no lai hun te a thawnthong si tiar mah nen. Midang ah puahsaak koihlep nak mang tu bek tuum, midang nei nak vumah thinnuam hulhul men kha popo letikhaw keimah bang sir leh tu si tsi. Na tha na nei lai na kolnak, na ruatnak thaw nangmah rori in puah per in. Tsimi letikhaw na nun sungah angnak tawk tu si tsi" ti si.

Sipuh thutah nak a ngai tselh phang a khualvak pehzom in mai lamah hawh si. lampi kiangah Rul pakhat tawk lehleu si.

Rul in, "Dangval pa kawnai ah na hawh tuh" ti in dong si.
Dangval pa in, "angnak ka zei tuum si. Na thei lekhaw ka rel sawh la e" ti in ngen si.
Rul in,' na rel tu sing. kei heh ka kam sunga a om ka ru man'n ngaltu pa si awng sing. Ramsa dang ten ka ru kih in keimah a lau phang keimah le keimah leivum ah mi siber pa ring tawm sing. Sipelhatsia keimah le keimah siber ka ring tawm nak heh ka ruat sual gaingai kheh si si. Minung ten keimah haw in rek tu tian a zei veng ta minung te lau in relh tseihtseih veng sing. Minung tawk khatu lau ngaingai veng sing. Tsimita Dangval pa... na kam sungah a ru om si. Awnkam thaw midang thinna tuh in awn khatuh ngawl in ralring in. tsimi phang bek in leivum ah nangmah raltu om ngawl in thinnuamnak le angnak thaw om tu si tsi" ti'n thutah si.

Rul pa thutah nak a tselh phang dangval pa heh a diriam tuang ngawl ta a khualvak nak pehzom lehleu si. A hawh tseih lai lai tum Thingbuk vumah vano zawng (colour) mawi ngai thaw tawkdun si.

Vano in,'dangval pa kawnai ah na hawh tuh' ti in dong si.
Dangval pa in,' angnak ka zei tuum si. Na thei lekhaw ka rel sawh la e' ti'n amasa lama bangin ngen si.

Vano in,'Dangval pa na khualvak nak na tsawl ngai ongla bang, na mai khen leikhu thaw, na angki khen baaltuak ongla si khaw. Tsibang hen na si lekhaw lam lakah minung na tawk nak ten nangmah kih in na pial tu si. Tsimi phang angnak na zei nak kontik ni khen tawk tu ngawl si tsi. Na rel tu sing phatak no ngai in ..... Amasaber in na thinlung, na ruatnak le na taksa baal te thiang tiar nak nei in. Me ka rel nak heem na thiang tiar asi lekhaw na kiangkap thil te heem thiangrim sekno in mu tu si tsi. Tsimiphang na zei nak angnak na nenah leng tu si' ti si.

Vano ah thurel nak dangval pan a theitsiang ta inn ah hong nawmnawm si. Angnak ti nak heh khawla pi ah zei kul ngawl si. A khawnenber a si kei ruangpi ah om lam theitsiang leh si. Angnak ngah thei nak tuh ma thinlung, ruatnak le taksa, vansil nak pin zei kul si.

Reff: China Story