Leivumah a om itnak te hem sungpin a lianber le a rei awh ber itnak heh “Nu in tsate a it nak” heh lianber si in, thil dang thaw heimah santeh theihnung ngawl Nu it nak heh tsa nak te hem in kei thei dangten nak situ heh um sing. Levum khaw var kei mu thei deve nak tuh ti’n a pailai in nase ngai in rim le harsanak te khen kih nom ngawl in a nunnak te tsian pe in tsate tsa nase ngai in zuam si. Timi heh keimah ni a tsate a it leita nak man sawn si.
Leivumah khaw var kei mu thei deve zawh a si si khen kei taksa vumah natnak in sisen, heihei no kei vumah keimah ni a siatsuah thei thilte a leng kha tu ti’n zan khen eihmu ngam ngawl in kei kiang pin ling leleu veng si. Tsimi bek zo ngawl a kang nemno sungah khawsik kha thei ti’n keimah ni tsawi veng si. Kei rikaam phang in si khen a ei ot pittseih nak thilte khen ei ngam nom ngawl in tsate’n ei sawn sawh aw ti’n tsate peveng si. Ni tin, sun tin, zan tin tawl ngawl in thu le la thaw a kelen bek zo ngawl sawngen nak thaw in kei dom so reng veng si. Milak ah kei leida thei deve nak tuh in kei kulnak te khen heimah a kut sungpin pe vut tuh a om ngawl pelh a si sikhen a tawk sak malan lo zei in tsate ta ti’n pe veng si. Kawzah in sim a thuk le a sang Nu ten tsate a it nak heh, tsanak te hen kawtin sim kei rul thei tuh? Leivum hen ah Nu it nak heh tsa nak te hen kei rul thei ni om tu ngawl si. Nu it nak heh awnkam in khen rel tselhnung ngawl bek zo ngawl lai in ngan a sisikhen leivum a om lainah in khen tham tu ngawl si.
Hunpha a nei nak hem le a mawi nak hem bo tsian in a it nak thaw tsate tuamlawm veng si. Nu it nak heh tipi thuanthum thaw santeh in rel bang tuk asin, timi tipi thuanthum kheh ti terkhat thaw bang veng lunbuk situ in um sing. Nu it nak heh sang in a thuk lei ta a si man in kawnai pin pan atsia kawtin tawp tu ti’n kei ruat le kam in kei rel pelh ta a sisikhen hei mah thei zonung ngawl si. Nu it nak hen kaw nai khaw zongah kei leng a si sikhen kei kelen reng veng si. Keimah ni hingtu Nu, tsate tsa in na sunglawi lei tsa lei vumah mi ming thang le mi hem a upat penakte tah in tuang tung sawn lai si ti. Tsa nak te hen kei thing lung vaseng thaw upat nak na pe si ung.
A Ngantu;
Dvl. Thian Za Uk (Bangalore)
le
Khng. Ang Za Mawi (Singapore)
No comments:
Post a Comment