Inn sungsang pakhat si ongla nungsang zii le pasel laklawh ah theithiamdunnak, ngaihsakdunnak le ngaithiamdunnak heh nei kul ngaingai si. Pasel ten ziite deihnak le kulnak theisak ngawl, zii ten khen pasel te deihnak le kulnak theisakdun thiam ngawl si lekhaw nupa laklawh thubuai suak thei si. Heimah rel taak ngawl kei tinak te heh a thupiber khen si thei si. Pasel te'n zii te kawtin kilkhawi tu ti "Pasel te nenpin zii te ngetnak" ti ngan nak om ongla si. Tuni heh Zii ten pasel te thinlung ang tuh khawtin puah asin phaber tu ti paan dang a sing. Tuabka ngannak heh a phaber tinak si ngawl si. A phaber sungah a peh deve sawn te si.
1. Ngaihharnak thaw (Please)
Nu ten thil pakhat khat puah thei ngawl a om phang pasel te tiar veng si. Tsimi na puah thei ngawl nak na puahsak tu na ngen phang awnkam ngai nuam ngai in na puah/per tiar a si lekhaw puah otnak thinlung 35% lun bek nei si. Midang nenah zong awnkam nem thei patawp mang in naper kun bangin midang nen bekah si ngawl mah pasel vumah khen mang theitu thupi si. Inn sungsang paber naper poh kundun tseih kul ngawl ti khamah nen. Pa te'n khen a naper a si lam thei reng deve si. Pa Muang pa thing ka tseksak aw tile Pa Muang pa ngiahharnak thaw thing ka tseksak sawh la e ti pa 2 sung pin a heisawn ha pa te deihnak si tu? Kawtizah a tawl pelhta a si khen na kun thiam a si lekhaw pasel te naper thatho tu atsia a tiar ngawl nak tian na puah/per sak tu si.
2. Awnkam nemno awnpi in
Pasel te sun nilawh zii le tsate tsa ti'n nisa le ruahsar sikhen naper tawl ngawl in per atsia inn leng phang zii te awnkam liah zekzek thaw awnpi nak ngai heh naper tah tawl theisawn si ti si. Nute khen sun nilawh inn sungsang na ka per deve nangmah bek tawl si ngawl keimah khen nangma bangpah tawl deve sing titu beihno si. Inn tinak heh sun nilawh napertu kei taksa, kei thari le kei luak te tawlom nak tuh mun si. Mi rekkhat pasel te a heita inn hong tu thanop ngawlin naplah veng sim? Pasel te tsimi bang a si phang pasel vaak tam, ar ten ring inn hong hun thei mamg, ah ngeltel zong inn hong hun thei ngawl ti awnkam vei tampi za veng sing. Pasel te mawh si maw? si ngawl lekhaw Zii te mawh ha? Naper tawl ngai in inn a hong na pasel kheh kawtin ha na muak? A leng muak malam sang ah inn sung a leng lam thei ngawl nu khen om tu lawi tu ngawl si. Pasel te inn leng phang, Muang pa leng ongla tsi maw? Inn sungsang tsa tawl ngawlin na na per na tawl ngai veng tu ti awnkam nemno thaw muak la a Bag sawng in tii tsop in tuh na pe veng a si lekhaw naper min pin mun dang ah bak thah om tu ngawl atsia inn ah hong tu thanap veng tu si. Ziite awnkam nem, awnkam lum in pasel te tawl banak te pai tiar si. Tsimi a sita inn sungsang ah awnkam nemno na mang thei a si lekhaw pasel te ang tu si.
3. Paak thiam in
Inn sungsang tsa a puahsaknak vumah ziap in. A puahnak reltaak ngawl poh ti'n ngaihsak ngawlin om popo mah nen. Upa naupang ti om ngawl tutu si khen ziap nak deih teen ruakruak sising. Puan zar nak tuh a puahsak sikhen na thiam dan ti ziap le tikhaw a dang khen na puah sak bet tu si. Ni tin inn sungsang tsa a lian a koh ti om ngawlin a puahnak vumah ziap thiam tu heh a thupi ngaingai pakhat si deve si.
4. Tha pe thiam in
Mipa te thinlung le ruatnak heh nupang te thaw danglam dun lam thei teen tu um sing. Exm: nupang te harsanak tawk phang awnkam, mitmai le puahnak in beihno ah lang veng si. Mipa te si lekhaw khawtizah harsa sikhen pulam ah lang tiar ngam ngawl si. Pulam ah a lang ngawl tavang poh ah thanau thei tu ngawl ruat mahnen. Harsa ngai ah a puah khokho nak te a lawhding ngawl phang a kiangno pin tha petu kin ngai deve veng si.
5. Koh no thil kheh lianpi tiar mah
Pasel te sualnak kohno a puah kha phangin sualnak lianpi bangin thinlung sungah koih tahin sualzah thei zuam sawntuh si. Pasel puaknak heem sungpin reltaak ngawl sualnak tian na theidik sak a si lekhaw inn sungsang buainak tepan nak si. Nupang rek khat ten mi lakah pasel te zuar mang thei lai si. A vuma ngansaak bangin inn sungsang bekah zo ngawl pulam tian suah vengtu khen lawi ngawl si.... Pehleh tulai...
No comments:
Post a Comment