Kum tin,bNi tina na naper vumah ning (boring) in om tsi maw? Na ning lekhaw a nuailama bangin puah tehtuuk in.…
1. Na ruatnak theng in
Naper dan phun tampi om sungpin naper dan hin 3 ngan ot sing.
1) Mi rekkhat ten thinlung tak thaw per
2) Mi rekkhat ten tu le tu ekinn hawh
3) Mi rekkhat ten Boss te om ngawl phang thazawng atsia naper phatak per nap ngawl sipelh Boss te om lekhaw Ma mitmai phang ngah nak tuhah midang tah rang sawn in pertu om si. A dawtaber 3 nak bangin nitin Boss te mitmai pha ngah otnak manin napteeng ngawl pi'n naper heh a harber naper ti asin sual tu ngawl si. Tsimita kei ruatnak a pha ngawl tebtheng in mi dang thaw mun khat ah naper dang thei nak tuh zuam sawn tuh si.
2. Theitsiang tu zuam in
Na naper phang na pernak ah a pehdun thil heem theitsiang tu rori in per in. Per tiphang per pum bek si ngawlin nangmah rori in a sung thu na theitsiag ngah a si lekhaw naper a remtsang ngawl phang na theinak te suah in mang theihnung leh tu si. Nitin na per veng nak kel na per lekhaw a reima ning tu si tsi. Saantehnak in mi pakhat in voksa ka suangsak aw a ti asin suang dan veng kel Vaksa, Sathau,Tsii le Aire bek in na suang a si lekhaw meh lamdang nak om tu ngawl si. Suang dan veng kel thaw dangdun theinak tuh Thing le Lasuun ka rawi asin ur sawn ken tu ti ruat kul si. Tsimita Naper kei per phang thinlung tak per atsia a sung thu phasawn theitsiang nak tuh zuam a sing khaw naper hem ah ning ti om tu ngawl si.
3. Saantehnak le thiam in
Mi tamsawn in Motor, Inn pha, tangka tampi nei te mu phang eng ten si sing. Khat lam in kei rel a si lekhaw a zuamnak le a napernak te paan ngawlin a nei nak bek kei paan kha veng sawn kheh si si. Thutsangsim pakhat heh "Tutu sikhen a nu pum sungpin a suak phang heimah keng nak nei ngawl taklawng in suak si" ti si. Midang tah sangsawn ah om thei tu heh mahni rori zuam kul si tinak si. Milian pa na eng phang heiha a per ti tsul masa in. Na mu rori tuh thil pakhat heh tsarah tetah milian ten tawl ngawl in helawheh ti'n a naper lam mu tu si tsi. Me milian pa heh keimah ka si asin ti saantehnak na le thiam lekhaw naper thazawng/ning tu ngawl si tsi.
4. Na thiamnak mang thei zuam in
Naper phang mah naper timen ah tselh thei nak tuh bek ah per/puah tuh si ngawl si. Tawng saya pakhat in lai a zirh phang Lesson bo tu ngaklah men ah a laibu sunga bang rori a zirh lekhaw a thiamnak/a theinak mang zuam ngawl si tu si. Laibu sunga lai heh kawtin naupang ten a theithiam dan tuh ti'n a thiamnak thaw phundang in zirh tu si. Tsimi bangpah in naper dang kei per phang per/puah dan bang kel si ngawl in a kulnak ah ma thiamnak mang thei tuh heh zuam kul si sing. Tsimi phang bek huaitu le naperpi te pawl hiip thei tu sising.
5. Naper harsa phang per tu naplah mah
Naper harsa pakhat khat per tu phang naplah heh naper ning tiartu ber pakhat nak ti asin sual tu ngawl si. Boss ten naper har doh a pe phang phuntiar mahnen. Na ot sikhen ot ngawl sikhen, na nap sikhen nap ngawl sikhen a kulnak naper heibang vumah nangmah per tiar thei nak thu nei si. Tsimi bang a sita a tiarnak naper tu kheh naplah sawn ngawl in kawtin ha ka persuak thei tuh ti in zuam sawn tuh si si. Naplah thah in na naper lekhaw hun rei ngai in thei tu atsia naper khen a sinak tah har sawn in theitu si tsi. Thanop ngai in per la thinnuam nak thaw tselhsuak tu si tsi.
6. Mitmai dangda in om in
Naperpi te le Boss te thaw laklawh ah a kul deve pakhat heh mitmai dangda in awnpi kheh si si. Na mitmai na dangda a si lekhaw nangmah bawmtu tuh rualpi khen tampi nei tu si tsi. Mitmai thim in na om a si lekhaw rualpi nei tu ngawl atsia mahni ruak omhar in om thei si. Naper min ah na omhar lekhaw naper kheh ning tu si tsi.
7. Puah sual khatu lau mah nen
Heihei kei per/puah ah puah sual heh om dan kel si. Tsimi puah sual khatu lau in puah ngawl om popo mahnen. Na puah sual a si khen tsimi na puah sual nak pin zir in.
8. Tawlom in
Ni khat sungah nazi 8 le OT (over time) nazi 4 tian per bang a si asin ni khat ah eihmu thaw tawlom hun dawm ngaingai si. Naper min le Inn tibek ah hun bo veng phang kei taksa, kei thinlung le kei luak te tawl pha ngah awngkel ngawl si. Tsimi a si ta Holiday phang mun dang ah hawh in thazang ther le kul si.
A vum lama bang lun heh a phaber tinak si ngawl si. Naper ning tu ngawl ah a kulnak lakah a peh deve te si sawn si. Kei thi ma heem naper tu te kei ti asin sual lem tu ngawl si. Na kei per thei phangbek ei tuh in tuh nei tu si sing. Tsimi a si ta naper ning po ngawlin per thei tu heh leivum kei nun sung kei taksa tsa a kulber nak pakhat kheh si si.
No comments:
Post a Comment