MUITSU DONG MIPHUN TE

MUITSU DONG MIPHUN TE

Rev.San Cung Nung

“Bawipa kheh a Pathian in a nei miphun te kheh mi muitsu phun te si.
Bawipa’n a rothil in a dengnnak te kheh mi muitsu si” Saam 33:12.

                Israel miphun ten muitsu a tsonak heh Abraham thawm manin si. Tsimita a heita Abraham in muitsu tso lawt sim ti heh zir dang tu si sing.

Abraham in Pathian um si
                “Abraham in Pathian um atsia tsimi a umnak kheh diktsangnak in saang sak si” (Siam. 15:6; Rom. 4:3, 20-24; Gala. 3:6; Jeim 2:23). Pathian minung kei si theinak tuhin “umnak” kul si. Laithiangrim in “Umnak ngawl thaw himhim in Pathian ang tiar thei ngawl si’” (Heb.11:6) ti si. Abraham in tsapa Isaak nei atsia, Isaak in Jakob ah nei in, Jakob in tsapa leinih a neinak te Israel ti in mingsa si. Abraham in a um ongla manin a tenawn tsanawn ten Pathian um leh kul ngawlla si, ti’n rel awng kel ngawl si. Amahni lakah Pathian umngawl tampi a om manin Pathian in nase ngaiin thurel veng si. Jesuh in Farasi le Sadusi te a haunak ah “Abraham heh kei pa si ti’n ruat tsawm mah na un. Nang rel sing. Pathian in me lungto te heh Abraham tsa te si tu in puah thei si (Mah.3:9; Luk.3:8) ti si. Keimahni khen Pa Tsong Kham le Pa Mang En tsa te si ung, ti’n awn ang tseih men tuh si ngawl si. Mahni bulpak rori in Pathian um in kei saang phang bekin Pathian tsa te si thei tu si sing.

Abraham in Pathian thu lun si
                  Abraham in a hawh min tuh rama lamzin khen thei ham ngawl pelh atsia umnak thaw Pathian thu lun si (Heb. 11:8). Israel te’n Pathian thei ngai pelh atsia a thu lun nuam ngawl si. Tsimi manin Izip te kut ah kum 400 val sel taang si. Pathian thu heh thei tuh bek si ngawl in kei lun tuh si. Santehnak in “Sawngen un” a ti lekhaw ngen tuh si. Kei ngen ngawl lekhaw muitsu ngah tu ngawl si sing. Seh sawm seh khat pe tu in a tiarnak kei pe lekhaw muitsu ngah tu si sing. Kei pe ngawl lekhaw muitsu ngah tu ngawl si sing. Thiangrim noin om tu in rel si. Sipelh atsia zu le a rithei sii thaw tsehpawh neuno in kei om lekhaw muitsu ngah tu ngawl si sing. Pathian thu lun heh mitsim si atsia thu lun ngawl heh mitaw si tin Laithiangrim in ti si (Mahte 7:24-26).

Abraham in Pathian heh a pakhatnak in koih si.
                 Pathian in Abraham ah kheh tsapa pakhat bek a neinak Isaak ah mihal bawlnak in pe tiar si. Pathian tiarnak bangin Moriah mual vumah Abraham in a tsapa kheh meihal bawlnak in pe si. Sipelh atsia Pathian in a tsapa meihal bawlnak in thitiar ngawlin tutsang pakhat pe leh si (Siam. 22). Abraham in Pathian thu a lun bek zo ngawlin Pathian pakhatnak in a koih manin amah le a tenawn tsanawn te’n muitsu dong si. Jesuh in
“Pathian uknak le a diktsangnak kheh zei masa ula me thil (adangte) hem heh nang pe beet leh tu si, ti’n thutiam si (Mah. 6:33). Tuhen leivum ah Pathian tahin sahnungnak deng sawn tampi si. Tsamkhat no sahnung in nuam ngai pelh napikhaw a tawpsannak in lungse
mitti luangnak si thei si. Pathian pakhatnak in koih heh a panlai in sahnung ngawl pelh atsia a tawpnak lamah sahnung in tawp si. Kei mai ah a om thil te deng thiam kul si. Paul in mit a mu theihnung thil te heh tsillem sung bek awk in, mu theihnung ngawl thil te heh kumkhaw in kho si, tin ti si (2 Kor.4:18).

Abraham heh Pathian thaw pawl tsiat veng si.
                 Abraham ah heh Pathian thaw pawlkawm veng a si manin Pathian rualpi tinak ngah si (Jeim 2:23). Theidun le pawlkawm ngawl in rualpi nei theih ngawl si. Pathian rualpi a si manin Pathian nenah ralpha ngai in awn ngam si. A tupa Lot omnak Sodom le Gomorrah khawpi luat theinak tsa tuhin Pathian nenah maisong ngawlin a otnak rel ngam si. Minung heh rualpi pawlnak sesuak lekhaw sesuak nom a tsia rualpi pha pawl ngah manin khangso khen om deve si. Pathian pawlkom reng le singkhaw aman kontik khen senak lamah huai awng tu ngawl kei si. Nangmahni phatnak tuh bek tuumnak nei sing ti’n ti kei si (Jere. 29:11-14). Na pawlpi tuh rualpi deng thiam in. Labu sungah “Jesuh kheh kei rualpha ber si” “Keiman rualrempha tawk si lang” “Ka deihnak hem a petu Rualpha ngaingai tawk si lang” ti’n la sa veng si sing. Jesuh heh rualpi phaber in nei la na mailam lawhding in muitsu dong tu si tsi. Pathian heh mi deihdannak nei ngawl in Abraham ah muitsu a burh bangin nangmah khen muitsu na burh deve tu si. Nangmah pin pan Muitsu Dong Miphun si tuin tuum deve in