KHRIH THOLEHNAK LE KEI NITIN NUN
Rev.San Cung Nung
Khrih Tholehnak heh Khristian umnak ah a ham, a bulpi si.Tholehnak a om ngawl tsuk a sin kei umnak le thuthang pha phuangnak heh a thawnthong si, tin rel si (1 Kor. 13-14). Khrih tholehnak heh tuni nangmah le keimah thaw hei sengdun sim, hei nempi atsia kawtin na per sim? ti heh dawmno rel ot sing.
Nun Thernak Nei
2 Kor.5:17 “Mi pakhat khat heh Khrih ah a om lekhaw siam leh thernak mi ther si. Ngai un, thil lun tehem pai berh atsia, thil hemmuah a ther in tsang berh ongla si,” ti si. Adam manin kei minung lun sinak hem Khrih thaw thinglamteh ah khehtsihnak a si zawhin Khrih thaw thaan sungah vi atsia, Khrih tholehnak ah tho langkhat deve si sing, tin rel si. Tsimi tholehnak heh minung lun bangin tho ngawlin Khrih ah mi ther, nun ther in tho si tin ti si (Rom. 6:4-11). Mi thisaak ten sual puah leh thei ngawlla si. Khrih ah na thi deve ngaingai ongla lekhaw sual le phatngawlnak te hen nangmah a deihbang in mang leh thei ngawlla si. Khrih tholehnak ah nunther thaw tho a sing.
Diktsangnak ngah
“Amah heh thilsual kei puahnak te manin aapnak si atsia, kei diktsang theinak tuhin tho tiarnak si” (Rom.4:25). Adam thawm in leivum minung tumah diktsang om ngawl in sual berh si (Rom. 5:12). Sual man heh thihnak si (Rom. 6:23). Sipelh atsia Jesuh Khrih thawm manin diktsangnak lehsawng tso ngah si sing (Rom. 5:17). Khrih ah mi diktsang kei si theinak tuhin sual nei nom ngawl Jesuh heh keimahni tsa in misual in tsang tiar si tin ti si (2Kor. 5:21). Jesuh a tholeh ngawl tsuk asin tutian hen sual sungah taang reng rih tulai si sing. Jesuh a tholeh phangin a ruangtsunnak puan kheh thaan sungah zam si. Pathian tsungnungnak huham puan sil si. Umtu diktak na si lekhaw na puan lun, ningtsirnung, le nawngkai te kheh zam in diktsangnak puan sil in nung tu si tsi. Hei puan sil reng lai si tsim?
Ruangpum tholeh theinak
“Sinapikhaw mithi te lak pin Jesuh ah a tho tiar tu Pathian Raula heh nang sungah a om lekhaw, Khrih ah mithi te lak pin a tho tiartu Pathian in nangmahni sungah a om ama Raula thawmin a thi thei nang ruangpum kheh nungnak pe deve tu si” (Rom. 8:11). Me Lai Thiangrim hen umtu te thi zawhin a ruangpum heh Pathian in tho tiar leh rori tu si ti lang tiar si. Pathian in Jesuh Khrih a umtu te sungah Khrih Raula (Rom.8:9) koih si. Khrih Raula a nei ngawltu mi heh Khrih thaw sengdun ngawl ti si. Nikhat ni in ruangpum heh thi tulai atsia Khrih a umtu te ruangpum heh a zaan thei ngawl, kolnak huham le tsungnungnak thaw dim in tholeh tu lai si (2Kor. 15:42-44). Heimansim tiphangin Khrih ah thaan sung pin a tho tiartu Pathian Raula le tuni umtu sungah a om Raula heh a bangve si. Me man
hen thih zawh limdiknak lianpi kei neinak heh si. Jesuh heh thi atsia tholeh si ti kei um a si lekhaw Jesuh ah a eihmu saak (Jesuh um in a thi te) te heh Pathian in Jesuh ah thaw huai tu si ti si (1 Thes. 4:14).
Vanvum ah omnak mun nei
“Khrih ah thaw tho langkhat tiar in Jesuh mingin vanvum ah to langkhat tiar kei si” (Efe. 2:6). Jesuh Khrih a umtu mi te heh Pathian tsate si (Johan 1:12-13; 1 Johan 3:1). Pathian in a tsa te mundang ah om tiar ngawl in ama omnak vanvum ah omnak mun pe si. Khrih thaw tho langkhat tu mi te heh vanvum ah omnak khaan nei ham ongla si. Jesuh in, “Ei Pa inn ah omnak mun tampi om si. A om ngawl a si asin nang rel tu la sing. Nangmahni tsa omnak mun rem ham tuin hawh tu sing. Ka remtselh phangin nang nenah hawh leh angkhaw ka om minah nang om deve theinak tuhin ka nenah nang huai tu sing,” ti si(Johan 14:2-3). Tsimi vanram heh Paradise (Luk.23:43; 2Kor. 12:2) tiin khen ko si. Hell heh vanmi sual diabol le a pawlte omnak tuhin Pathian puahnak si (Mat. 25:41). Jesuh umtu te omnak mun heh van ram si. Kawnai mun sawn deng tu si tsim? U le nau te, Pathian in minung hem sannak ngah tu le thutak thei tu heh deih si (1Tim.2:4). A vuma Jesuh tholehnak thu te heh thutak, thudik si si. Pathian hen hell leng tu in a deih sak ngawl manin misual sipelh atsia Jesuh Khrih umnak thawmin sannak ngah atsia, midiktsang in saang leh kei si. Tsimita Jesuh Khrih a um, a nei ngah tu tehem Khrih thaw thihnak neh in tho langkhat tu atsia Pathian omnak ah om deve tu si sing. “Ming ko phangin keimah om deve tu sing,” tinak la heh nangma la si deve himhim ta sen.
No comments:
Post a Comment