f Pum sung nauseen awnkam | Varnak Thuthang Blogger Widgets

Varnak Thuthang Blog pin ang no in na muak si ung..... Pathian in Damnak, Tsimnak, Lawhdingnak, Thinnuamnak na pe tasen....
 

Friday, 26 July 2013

Pum sung nauseen awnkam

0 Midang Ruat Daan

" Enu.... nang nenah om deve tu sing "
      Enu heh sang le sang ruangrai mawi ngai si. Keimah khen Enu bang mawi ngai tu um in ang ham sing. Enu tuhen na pum sungah leng ongla sing. Na pum sungah ka om lam Epa rel in. Epa khen ang ngaingai deve tu um sing. Enu heiphang ha Epa na rel tuh. A rang theiber in rel nawnom len. Epa ang ka mu ot leita ongla si.
       Sipelhatsia Epa vumah ka ruat dan le ka limdik bang Enu'n Epa a rel phang ang ngawl si. Kutsih ma nau nei a deih ngawl lam Enu rel in a sunga nauno keimah rek tu tiar si. Epa..... na mi ngaihhar nei ngawl dan, na tsanu keimah khen Epa Enu te thaw mun khat ah om tu ka siang sawh la ee. Nang nenah ka om phang vuatsuak tu ngawl sing, Enu le Epa thurel nak ngai tu poh sing maw..maw Epa........
       Enu kap tseih mahnen..maw..maw...Enu kap nak mitti a luang mu ngam ngawl sing. Enu nim len, na kap phang om thei ngawl sing. Epa theithiam tuh in awnkam neemno thaw rel teh tuuk po leh in.  Enu relnak te Epa'n theithiam in aw ti leh tu si. Epa lungmu pha lam keimah a tsanu in thei sing.
       Enu in Epa kheh a thinglung veksen in a it leita ta keimah thaw khawla tu sawn deng tu'n a luu kun si. Enu... na deng sual, keimah ngaihhar ngawl, na sual dan na ti ngam ngawl sing. Epa kawtizah na it lam keiman thei sing. Sipelhatsia Enu..... Na tsanu keimah heh zamthong miomio ngam tu si tsi maw? Enu na thinlung kawtizah a na tulam thei sing. keimah khen tuar har ngai sing.
       Aa.. Aa.. Enu! Sii ei mahnen a na leita si. Ei zom leh awl len maw Enu. Ngaihhar na kuun sing ei leh awl len maw. Ka ruang pumpi te na ei nak sii in ti tiar ka si. Acide ti thaw burh nak bangin ka taksa te sa in kang tseih ongla si Enu. Na tsanu keimah na ngaihhar lekhaw na ei nak Sii ei leh awl len maw.

    "Nau teer ngawl si. A pheiten in a om ta tep in nuuk, suah kul tu si" nauphiattu nu'n awn si.
      Thil tepnak thaw ka kawng pin ka nuuk si Enu. Enu tuar har au aw ka za phang ka thin sa in alh si. Enu ka sual ka zah sawh in. Harsa ngai in tuar sen tinak thinlung nei ngawl sing. Keimah le keimah ka kalen tawm thei ngawl ta sawn si. Thi tula poh sing khaw Enu. A si thei asin Enu na le tuar kul ngawl in Enu tsa thi ot sing. Sipelhatsia Enu.... keimah le keimah ka puahtawm thei ngawlta si.
       Sayamah ( nauphiattu ).... Enu tuarnak te a lawm theinak tuh ka thi nawnom tsiar len. Ka kawng ngeuh lelh te a tawng sikhen, ka kut ngeuh lelh te a tawng a sikhen Enu pum sungpin a rangber in ka suah in. A rei nung leh tu ngawlla nausen no heh daidim ngawl in pulam ah nuuk setset len.
        Azaw... a na leita Enu. Pathian in minung si lai ngawl me ka ruangpum siatsuah leh tuh poh a puah. Kawtizah a na sikhen na tasen, Enu nunnak a peh tu ngawl na bawm reng sing khaw Enu. Ka nunnak bo nawnom len. Me harsanak pin ka luat tsiar len, tuar zo leh ngawlla sing. Thihnak pin Enu ka luat tiar saksawh in.

Aa aa.. A na leita aw... dawtaber phang vang Enu pum sungpin suak thei silang.
         Enu na mu ngah ongla sing. Deihnung no mawi ngai Enu mai khen thi nei ngawl bang ngo diakdiak. Khaan pulama thinphu in sawngen tseih tu Epa khen mu ongla sing. Epa.... Enu nunnak tsa lau leh awl len. Enu nunnak bo tuh ngawlin ka thi bek zo ngawl ka taksa mu ngam ngawl in suak ongla poh sing khaw. Enu heimah tsang lehtu ngawlla si.
        
" Sayamah nu'n Hei.. na tsa ruang na pan ot lekhaw ka lun in ti si"
        Sayamah ... Palastic sungah koih nak ka ruangpum a heita Epa muh si tsim. Ka thi ongla poh Epa na thinhar tuh na muh. Minung a tsang lai ngawl ka ruang tsun nak Palastic tawh Lampi kiang tikong sungah tumah thei ngawl in na vor len.

"Mu tsi maw... nau heh nupang sipeh si, a raap sang khen sang, hing asin a nu bang mawi tu sipelh"
      Nunnak om leh ngawlla a tsanu keimah ruang pan in Epa na thinlung a lamdang lam mu sing. Ka tsanu rektu Sayamah ka tsanu na rek bang nangmah khen na rek tu sing ti'n inn sung vangsang le si. Puah mahnen Epa.... keimah na it lam thei sing. Tibang thilpha ngawl te ngaihhar nak thaw puah sawhsawh mahnen ti na ngen sing. Mi tampi in Epa kheh nuuk in tikong kiangah amah tumruak kap tumtseih si. Epa nangmah ruak si ngawl si tsi, na kiangah keimah om deve si.
       Epa tuar har ngai tsi maw? Keimah kawtizah na it lam thei sing. Thinlung thiang na nei ta ang sing. Sipelhatsia Epa... Na thisen a si keimah heh tibang tian ka tawk tu na lam ruat kha ngawl sipelh maw Epa..
        Tuhen, zaumin vumah thi nei ngawl in ngo diakdiak a zau tu Enu khen kawtizah thinna tuarhar ol sim.. Epa na sual na ti ngam ngawl sing. Tibang situ na thei deve ngawl ta si.
         Minung pakhat situ heh a har ngaingai si Epa. Vei khat leh in minung si thei ol lai nang maw ti ka ruat phang ka khawngai ngai sing. Hawh tula si Epa. Enu le Epa nenah hawh nak hunpha ka ngah lekhaw hawh rori lehtu sing. Ka hawh thei leh ngawlla khapang lekhaw ka naunu, ka naupa hun a leng phang keima bang thinna tiar leh awlla un maw Epa....
        Epa tuhen vang ka nunnak pan in na theithiam tula um sing. Nangmah bek si ngawl leivum om nu le pa heem in thei teen theinak tuh rel salawn in maw.

# Saya Ce Sin ngannak pin let salawn leh nak si.

No comments:

Post a Comment