1. Nupang dang te thaw Saanteh mahnen
" Ama zii menah a inn naper kawtizah a neh, A pasel kawtizah paan thiam " ti'n na zii kheh midang te zii thaw saanteh himhim mahnen. Nupang te theiot ber nak heh a it nak a pasel kam pin ziapnak awnkam si. Na ziap thiam malamsangah a dasam nak te pawl midang zii thaw na saanteh a si lekhaw kontik ni khen hei theitu ngawl si. Midang te na zii a fel dan ti reelnak a za tahin na kam pin a suak awnkam heh mannei ber in ruat veng si.
2. Theingawl khel mahnen
Nupang te heh mipa te bang thinlung kho thei ngawlin thinlung neem te si. Mah itnak thaw pehpardun nung sang a phangawl lamin khen ruat kha veng si. Nupang te reel veng nak pakhat,"Pasel deu ompi ngah te zii heh thinlung tawl thei" ti si. Pasel te thintawlnak nei phang zii reel in, aman na tuarpi deve tu si. Na rel ngawl a si khen na thinhar a theipah ta im ngawl in rel veng in. A mitmai pha ngawl, a thintawl lekhaw a kut dampi len la na kaang lum ah pom in thapenak nei in. Naper na hawh tu phang na zii thuut (kiss) in sunpha ti veng in. Inn na leng phang khen pom la "sun nilawh nangmah ka ngai dan, Nangmah ka mu lekhaw ka tawl dam suarsuar si" ti in. Me pa 2 heh puah har si ngawl si, na puahnak vumah na zii ang akhaw na thu a ruat natsang thinnuam tu si.
3. Mitmai pha ngawl lam muh mahnen
Zii vumah ang ngawl manin mitmai se muh tah haw nung om ngawl si ti si. Pasel te pulam ah helawheh ti'n tangka a zei bangpahin inn sung naper le nau kalen thaw ah nangma bangin buai ngaingai deve lam theisak deve in. Ninglam pin na kul le sam nak te bawm in nangmah a dom tu na nei ngawl asin pulam ah thinlung dongda ngai in naper theitu ngawl si tsi. Naper minpin inn na leng phang,"ka zii mawi no tawl ngai ti maw" tila aman khen "tawl ngawl sing....nangmah sawn kei inn sungsang tsa heilawheh naper tu na si ta na tawl ngai tu" ti'n na dongnak man'n na zii khen thinnuam akhaw nangmah khen thinnuam tu si tsi.
4. Khaisang thiam in
Mipi maiah na hawh phang na zii zahpi mahnen. Na zahpi a si khen kumkhaw na ompi tuh na zii thotho situ si. Mi lakah hawh phang awn ringpi in auh mah, hau mah, amah na it lam midang te theituh sawn in puah in. Nupang dang te lakah amah le amah Sui khangai bang a ruat tawm tuh tian na ziap a si lekhaw nudang dang ten na zii eng tu si. Na zii a tsim a si lekhaw nangmah khen na rualpi te lakah na om phang na mitmai phanak tuh puah deve leh tu si.
5. Paan thiam in
Khangai bek si ngawl nupang ruangrai mawi, mel mawi te mitkhep ngawl mipa ten a paan veng bangin mipa mawi a om phang nupang ten paan deve si. Na zii in mipa a mawi a paan phang ling in hau kha mahnen. Mipa mawi a paan heh mipa te khangai paan bang si ngawl paan thiangrim si. Papar mawi, zuk suainak mawi bang paan vut men bang si. A paan nak dangval pa thu ruat leh ngawlla si. Mipa te zawng mit in paan atsia thinlung in Sik-ku-zin lehtseih thei..hehehehhe
6. Kut mang mahnen
Inn sungsang ah muang ngai nak Pa pakhat in zii te vat, beng, thong, kut mang tahkaan mu niam tuh om leh ngawlla si. Neidun ma zong a thinna khatu lau, taksa dawno maliam men khen phatak no in tuamlawm, a taksa na khatu siang ngawl atsia neidun tselh zawh ah bawhlung bangin sirh, thong, vat heh na zii in na ningtsir tu si. Na it leh ngawlla a si lekhaw na thinlung thudongnak nei in.
7. Inn sungsang pakhatnak ah koih in
Innsang pa heh inn sungsang tsa napertu ber si atsia a hun tamsawn heh na napernak in hun bo veng si. Santehnak in keimah ka si lekhaw inn le Company a khaw ladun ta nazi 8 sung bek per sipelh zing nazi 7:30 in company ah hawh atsia simlam inn ka leng heh zan nazi 8:30 si veng si. Tibual, sim laiei thaw a si phang inn zii le tsa thaw nazi pa 3 lun bek zii thaw awntawp, nau selpi hun ngah si. Zarh khat sungah Nipi ni off pelh atsia Biakinn ah khawm, sunday school zirh lehleu ka si phang zarh khat ah inn sungsang tsa hun ka pe nak a dawm ngaingai. Hun ka nei ngawl ta Online laisiar le laingen heh Company break time le Bus, Yatha sungpin Online veng sing. Tsimi bang ka si ta inn sungsang tsa la khat ah ni 1 off ngen in hun pe veng sing. A vum lama heh keima bulpak hun ka mang daan si atsia Pakhat le pakhat bangdun teen tu ngawl si. A thupiber kei thei tuh heh zii le tsa ten Pa thaw mun khat no ah om dang, awntawp dang, sel dang theinak tuh Pa nenpin limdiknak lianpi thaw nitin in om veng si.
8. Nupi Papi te it in
Na zii na it taktak a si lekhaw amah a hingtu a nu le pa khen it in. A nu le pa te kheh nangmah a hingtu na nu le pa bangpah in it la amahnin khen a tsapa bangpah nangmah it deve tu si. Nu le pa te kum uhaam in naupang thinlung a nei phang naupang bangin phatak no tuamlawm in, ang tiar in. Nangmah khen amahni bang na si phang na tsa ten na puah awng nak man'n na vumah puah deve lehtu si.
No comments:
Post a Comment