Lanlai nu le pa te ruat dan le pom dan heh tsanu tsapa ten nu le pa thurel nak heem a veksen ngaitu/luntu tiheh si. Nu le pa heh inn sungsang ah thuneitu ber, luu ber ti'n koihtsawm kha awng si. Lanlai nu le pa te pom dan mangtu heh a om lawi lai ngawli. Tsimi pom dan heh tusan tian ah kei hawhpi a si lekhaw tsate vumah sualnak lianpi puah te situ sising. Heitasim tiphang naupang te a sahnung nak tuh a zalen nak tuh kei khamsak thaw a bangdun si. Ram khangso US te si lekhaw nu le pa ten tsate tsovo a ngah zah nu le pa ten kham a si lekhaw tsa ten khen nu le pa te thukhennak ah len theihnung si. Tulai kei dimmun si lekhaw tsate heh a heizongza ah uk ot lai sising. Tsa ten khen nu le pa si ngawl leita uknak deih ngawlin nu le pa vumah tihsan ot nak thinlung nei deve si. Tsimi heh tsa ten nu le pa a do si ngawl si. Nu le pa nenpin amahni tsovo ngah rori tuhah a puah nak sawn kheh si si. Tu san heh tsim san a si ongla bangpah in minung pakhat ah tsovo lam thu zirhnak te za ngah ongla sising. Thuzirhnak ngai man ngawl le thei ngah lai ngawl khen om pahpah tulai si.
Naupang te heh Daan a nei theinak tuhin zirh kul sising. Naupang lai pinpan ah nu le pa ten Daan kei zirh a si lekhaw khawnai nai a hawh sikhen mitmai pha ngah tu si. Mi rekkhat te ruat dan si lekhaw Daan thaw nung heh thintsawl, lungmu rit, zalen ngawl ngai ta Daan lun kherkher kul ngawl, kei thei ah tawk ongla ti veng si. A ngaingai si lekhaw Daan in thintsawlnak, lungmu rit nak le zalen ngawl nak te puahtu si ngawl si. Keimahni kaisang tu le kei nundan mawi tiar tu sawn si. Tsate dan kei zirh phang ah a kulnak a thupiber pakhat ah a peh deve heh heh nu le pa te thinlung kheh si si. Zirh phang khen a lun zo tuh tian Daan koihsak masa kul si. Satehnak ah lampi laiah ah dingpi la ralring penak mei a sen a si lekhaw lam ten theinung ngawl, motor in taih atsia thi thei. Mei green lekhaw motor te tawl sak tu atsia minung te lamten hun si. Tselhphang lamvak thah lam in lampi vumah borh (mahni ei nak) leh, vor dan ngawl si. Tsimi bang te pinpan naupang te zirh theihnung ongla si.
Nau pang kum 2 kum 3 a kim te heh nu le pa te thaw tu le tu haudun tam thei leitak si. Meheh ka puah lekhaw hei ka tang tu ruatnak nei ngawl in a deihnak vum bekah ngah tu thinlung nei si. Tsimi ta kum 2-5 tian naupang te thu a nei heh mawhnak nei lai ngawl si. Kum upa pi kil bangin Daan thaw kil theih silai ngawl si.
Kum 5 a kim ongla lekhaw nu le pa te ralring kul ongla sising. Heitasim tiphang nitin a mu tamber nak nu le pa awn, puahnak te a thup no in a thinlung, a thinsen sungah lut pan ongla si. A rei ngawl pahin nu le pa phatnak le senak hem puah lun deve tula a si ta nitin awn, puahnak ah ralring kul ngaingai si. Tsa ten nu le pa te sinak hem heh a pha berh in ruat a sita a heizongza ah kei ning lun tu si si. Ka naupang lai ka mit rori in ka mu veng nak pakhat heh Pa si ngawl lekhaw Nu ten tsate zazial pe in kaam sunga meiling thaw zalap tiar veng kheh si si. Tsimi tsa za kei lap tiar kheh vei khat ah sual pa 2 kei puah thaw bangrep nom si. Amahni mai ah za na hawp bek zo ngawl za na lap tiar a si lekhaw na tsa ten za a hawp deve nak tuh heh 90% kim ongla ti thei dang reng a sing. A si thei lekhaw tsate maitang rori ah tsate vumah puah deve tu kei deih ngawl nak sualnak himhim puah tuh ngawl in zuam kul sising.
Tsin inn Zaniat ram sung ka rualpa thaw Gospel kei hawh laiah ka mit a var tiartu pakhat tawk sing. Tsimi heh kei leng nak tuh Chairman pa inn ah leng kawm si ung. Kei mai pin naupang pakhat in a nu awnsol in a hau deve tseih kheh paan kawm reng si ing. A nu khen a zak leita in a tsapa kheh vat atsia kawnai pin ha tibang awn na thiam? ti'n dong si. A tsapa in e pa nenpin si ti si. Tsimi ka za phang ka thinglumg danglam ngai in theitsawm sing. Naupang pa sual maw? Apa sual si ol ha? Daan nei ngawl, awn sup ngawl in tsate maiah midang kei tinak heem heh a mutu le a zatu tsate thisen sungah luang atsia tuung deve leh veng si. Nu le pa ten tsate maiah awn phang awnkam mawi le Daan nei ngai in awn kul sising.
Mi zahlam nu le pa ten molhkang thaw tsate uk phang bek kih/lau atsia thil pha ngawl himhim puah ngam tu ngawl ti in ruat sual beng sising. Vaat tu a lau ta nu le pa maiah kun pelh napikhaw nu le pa mu thei ngawl ah a bangpah sileh veng si. Kei nei nak kawlpaw, vok, keel te vaat tuuk pol a rei awh ngawl si, tillem no ta bek si. Mi zahlam nu le pa heh tsate sualnak puah ngah phang molhkang pa 2 pa 3 lai thaw nase tak vaat in tsate thurel veng si. Tsimi heh pha maw? Kei ti phang pha himhim ngawl sing. A pha lam tah a senak tamsawn si. Inn pin pa te vaat tarang nak le nu ah hau tarang nak naupang heh rualpi lak leida phang le mipi mai hawh phang theitheih nung si. Heitasim tiphang a thinlung ah thinphunak thaw dim in a thuruatnak Luak khen khawla pi leng leh thei ngawl lata si. A nunnak ah angnak om tu ngawl atsia hei zongza vumah lungkim ngawl nak thinlung nei tu si. Nu le pa, u le nau vumah itdun nak pai tu si. Sualnak a nei phang na vaat tseih tahsawn in awnkam neem no thaw a sualnak puah lekhaw senak, dumsuknak le thihnak a leng thei lam te a theitsiang tuh'n rel sawn in. Tsate vumah molhkang mang tu ngawl ka tinak si ngawl si. Molhkang mangnkul min le awnkam mang kul min om si.
Sualnak a puah phang hun reipi ngak ngawl in vaat, hau, rel vut nom in. Zan na pa leng lekhaw na puahsual nak te ka rel tulai, tsimi phang na pa'n nanngmag vaat leh lai sawh aw..... ti veng sising. A phatnak khen a om bangpah in a pha ngawl nak khen om si. Zing ah a puahnak sual man heh zan apa leng tian na ngak phang ni khat sung tsate thinphu tiar thaw bangdun si. Pa te khen thula thei masa ngawl in zii te relnak menah tsate vumah thu lairelnak puah vut nom tu ngawl khen thupi ngaingai si.
Tsate vumah na awn nak hem pelh ngawl in puah in. Sualnak na puah lekhaw na vaat tu sing tinak sipelh a puah ngaingai phang ngaihhar in vaat leh ngawl tibang nei himhim mahnen. Vat/hau tu na tisaak heh kawti zah na ngaihhar a si khen na awn nak bangin puah in. Sualnak ah a rah a kha dan lam theithiam tiar tu si. Sualnak ka puah a si khen heimah poi nak ka nei ngawl ti thinlung a nei ngah lekhaw Daan nei ngawlin sualnak puah leh tu khen lau leh tu ngawlla si. Tsate sualnak nei ngawl kei vaat/hau ngah si lekhaw sualzah ngen leh tu heh nu le pa ten zak tu ngawl heh a thupi ngai si.
Tsate a sual phang pa ber thei tuh ngawl in nu'n sualnak thupsak, thuson relsak tibang nei mahnen. Pa ten tsate a hau phang tsate maiah amahni lam tang in bawm tu ngawl khen thupi ngai si. Nu in tsate a dawidarh luan doh, Pa in tsate a heet doh phang tsate maiah reel ngawlin tsate om ngawl min ah reelkawm pha si. Tsimita Daan zirhtu le Daan zirh nak tsate laklawh ah pawlkom nak a pha tu thupi si.
Daan tinak heh kawpi kulh nak Ving thaw bangdun si. Ving sungah a om thiam te tsa heh ral hinkim le vuih lakpin khamsak atsia a om thiam ngawl ten Ving pulam ah suak atsia ral ten rek, vuih in nuai, hawrkuam sungah teer si. Daan sung pin kei suak a si lekhaw miluat bang pelh na khaw thihnak thaw khum leh veng si.
♥Daan in na puah ot pittseih nak na puah tiar tu ngawl si. Na puah ot ngawl nak te khen na puah tiar tu na si.
♥Daan in a pha le a se khen sak si,.
♥Daan heh harsanak le lawhdingnak laklawh lei dawh tu si.
♥Tumah rel ngawl in na puah ot nak le a puahnak vum ah Daan in na kil tu si.
Note: Me Daan thu ka ngannak heh Bible sunga sualnak daan si ngawl in nitin kei nunnak kei nei kulnak daan si.
Ngantu: Nawn Thang
No comments:
Post a Comment