" Tsanu... na zaunak pin tho law,
tawngkai hawh hun kim tula si.
tho law tho law"
Enu phong nak manin zaunak pin tho ot lai ngawl sipelh mit hak khokho in tho sing. Nitin ka puah veng nak bangin lungmu tsiang leem ngawl tahlam ah bang vum aa nazi lemlang keh kheh paan sing. Nazi ka mu tangah .. khawnu ongla tih heita tubek ah keimah na phong... thintsom thei dan ti'n Enu hau sing. Inn kongkhaam te ring pipi khaam atsia tawngkai nak tuh a kulnak te nawhnah ngai in puah sing. (Korea hight school ah tawngkai hawh khawnu lekhaw nase ngai tawh veng si). Tawngkai hawh tu ka thawi phang ka ning pin Enu awnkam za sing. " Tsanu sual ka zah sawh in, ka dam leemngawl ta si." Tsimi awnkam ka za ka thintsom thaw,"tua khen tsoplut leleu maw, tsoplut khen na ngah thei dan, nangma bulpak nat bang" ti sing.
Tsimi phang Enu kheh keimah a maisong thah lamin," kawnu ka phong ngah ta ka thin nuam tei deve ngawl sing, na laikeng tuh na puahsak ongla sing khen thah in maw…" ti atsia a penak lai khuang khen suat vumah deng in .. tawk ongla lai khen eitu ngawl sing tawngkai hawh sawn tu sing ti'n Enu kheh hau sing. Enu heisiar ngawl in tawngkai ka hawh nak tuh lampi bek paan in ka hawh thahlam ah ning lam ka paan leh phang suat vumah lai ka deng nak laikuang le lai a tuan te a khul tumtseih kheh mu sing. Enu mai khen thisen om ngawl bang ngo dekdek a si lam khen mu sing. Tsimi bang sipelhatsia Enu heh tu le tu a dam ngawl rengreng veng ta keimah khen thinphu ngawlin tawnginn lam hoi leh in tawngkai hawh sing. Tawngkai pan ah thu pakhat thei sing tsimi heh tu zarh Tani ni lekhaw Picnic suak tu ti kheh si si. Keimah khen hawh ot deve ngai sing. Rualpi te thaw mun khat ah vaak dang ot bangin tsarahnak khen tillem no poh khen hei ot sing. Tselh phang zau min ah dam ngawlin zau reng vengtu Enu khen tillem no ruat ngawlin rualpi te thaw sah/ang ngai in sel ot sing.
Siim lam tawngkai tselh inn ka leng phang a kel bangin zau min vumah Enu a zau kheh tawk sing. Zaumin vuma Enu ka mu phang a vumah lungkim ngawl nak suak nom si. Enu in lekhaw tawnginn pin a leng keimah kheh, "tsanu inn leng ongla tsi maw?" ti si. Enu thudong nak o ngawlin,"Enu tu zarh Tani ni (satday) lekhaw tawnginn a ka rawlpi te thaw picnic hawh lun ot sing, ka lun tiar deve in maw" ti sing, Enu in," Picnic hawh tu maw... tsanu kawzah ha a bo tuh" ti'n a bo tuh tangka thu dong masa si. Keimah khen Inn sungsang harsa dinmun thaw a sita hawh asin pha maw/pha ngawl reipi ruat pelh atsia thu ka khen vut thei ngawl ta Enu nenah 80,000 kul tu si ti sing.(Korea heh tangka man nei ngawl si). Ka relnak Enu a thei phang a thinphu thah lamah 80,000 rori maw kul tuh? ti keimah dong si. Enu kheh awn ringpi in, Hei a.. 80,000 nei ngawl tsi maw? Tsibang tsarah inn sungsang ah ka suak heh keimah le keimah haw tsawm sing, Midang te bang in ka leida deve thei ngawl ka ruat phang thanau sing, Enu khen haw sing, Innkhaw pakhat sipelh Enu pakhat bek ka nei khen haw sing.
Enu kheh haihawh pi vei khat haihawh atsia Bank laibu pakhat keimah pe si. Me sungah tang 1,tang 2 ti'n ka khawl nak tangka te pawl si…tsimi sungpin na kul nak tangka 80,000 suah aw ti si. Ka suak pinpan ka mu awngngawl nak le a vei khat nak Bank laibu ka mu nak a si ta ka diriam ngai in ni sing. Tselh phang Enu nenah angnak awnkam khat khen rel man ngawlin khaw sung om Bank ah rang ngai in dan sing.
Bank laibu ka muh phang a sungah tangka ting khat (100,000) a om lam thei sing. Keima ta a si lekhaw tizah tangka heh tam ti leita sing. Tangka tizah nei reng tih a heita a mang ngawl ti'n Enu kheh mawhsiat tumtsih sing. Picnic hawh nak tuh ah tangka thawng riat (80,000) suah nom sing. A suah tselh zawh ah bank laibu sungah ting riat le thawng kul (920,000) om lai kheh a thei phang tulai style ti'n ka nei ot pittseih nak handphone ting li (400,000) man lei sing. Khaw sungah phone thaw ka vak thahtseih lam ah lampi kiang angki zuarnak dawr mu sing. A sungah lut in ka deih nak te ting nih (200,000) man lei sing. Enu meetsak tarang veng nak ka sam khen 50,000 bo in dawr ah meet sing. Thillei nak thaw a kulnak ah mang nak thaw a si phang a bank laibu sungah thawng sawmkua (90,000) bek taang si. Ka deih nak te ka lei tselh phang inn ah hong atsia Enu thei bebel tuh in thawmvang ringpi in inn sungah lut sing. Enu a eihmu sipelh ka thawmvang manin tho atsia leng ongla tsi maw ti keimah dong si. Enu kut ah bank laibu ap leh sing. Enu khen bank laibu paan taitai leh ngawlla in khom si.
Ka rualpi te thaw ni 3 zan sung amahni bang in sah ngai sel thei sing. Inn lam harsanak le Enu natnawm khen ruat ngawlin ka om thei ta ka tep awngkel ngawl nak sahnung nak te thaw nuam ti leita sing. Sahnung hun ni 3 le zan 2 bo in inn lamah hong nap ngawl thahlam in hong si. Inn ka leng Enu inn leng ongla sing ti'n auh pur si. kei innpi khen lamdang ngai in dap serhserh in om si. Enu inn leng ongla sing ti vei khat auh lehleu sing. Hei aw poh khen ka za ngawl manin ka thinraw leita ta inn khaampi khen kawng thaw sirh lawk in lut sing.
Inn sung ka lut phang zaumin vumah a zau reng Enu kheh mu si. Inn ka leng phang keimah ni zumzum in a muak vengtu Enu in tua picnic vak min pin ka leng heh awn kamkhat no khen awn ngawl si. Tangka tampi ka mang ta Enu a thinraw situ um in Enu ruangpi thing in phong tu ka tuum phang Enu ruang heh tsop serh lam thei sing. Enu vumah ka mitti a ro ongla mitti te lamdang in a tser, a suak leh bekzo ngawl ka thinlung khen vang sun nak bang in na si.. Ka haw ngaingai nak Enu taksa ruang tsop ka mu phang thinna in lungse ngaingai sing. Ka um hang ngam ngawl ta Enu ruangpi thing in ka phong tseih pelh sikhen Enu tho thei leh ngawlla si. Puan sunga Bank laibu lei atsia Enu mit kiangah koih in Enu nidang phang puah leh tu ngawl la sing ti'n ringpi au in kap sing. Tsimi phang Bank laibu sungpin lainah pakhat a ter mu sing. tsimi heh Enu a dawltaber lai si. Siar tu ngam lem ngawl in siar sing.
To
Ka itber nak ka tsanu paan tuh
tsa na nu keimah heh haw ngaingai si ngawl si tsim, tsarahnak hawrkuam khen haw ngaingai si ngawl si tsim? tsanu ngaihhar na kun sing... ngaihhar na kun sing. Na nu heh tsimnak khen nei ngawl, tangka khen nei ngawl. Ka tsanu pe tuh itnak ngawl neinak nei ngawl tu pakhat sing tsanu. leivum ah nangmah pakhat no ruak ka zam nak vumah ka thin nuam thei ngawl si. nat ka nei ta tibang hen nangmah ka zam nak si. ka nat nak at asin dam thei tu tipelh si. sipelhatsia at man tuh tangka dawm ngawl si. thu tampi ruat sing. ka at ngawl lekhaw ka tsanu in midang bang ei/sil theitu ti ka ruat ta Oparation tu ngawl in ka deng nak si. Kum le ni te a rei dohdoh phang ka natnak khen zual dohdoh a si ta tuhen nangmah zam kul ngaingai sila sing. Tibang mang taak ngawl na nu keimah heh Enu ti'n na ko nak vumah angnak na rel sing. Lei vumah ka it ber nak heh nangmah na si lam na thei tu um sing. Tsanu ka puan sung phatak no in phet la zei in Bank laibu mu tu si si. A sungah a kum kum a la la ah ka tsum nak tangka thing zanih (2,000,000) om si. Ka tsanu tsaah harsa leh tu ngawl si tsi.
Kumkhaw nangmah it tu
Na nu
Enu lai ka siar tselh phang keimah le keimah haw tsawm sing. Enu ka haw tah a let tampi in haw tsawm sing. Enu ka mang nak tangka te na nat Oparation nak tuh na tsum lam khawma no in na rel ngawl. Enu na itnak le na deihsak nak te theithiam ngawl tu na tsanu keimah vumah a heita tizah na it . Nidang lekhaw tawngkai hawh hun zing phong tu le laikuang sunga lai ei tuh nei leh tu ngawl maw Enu. Zau min ah dam ngawl in a zau reng veng tu Enu mu ni om leh tu ngawlla ti ka thei phang ka thin a keh tu bangin na si. Enu nangmah thaw vei khat no poh khen tawhdun leh nuam sing. Enu nangmah ka pe nap ngawl nak ka itnak hem na pe ot sing ti'n kap sing. Ka kap nim phang Enu nenah ka rel awng ngawl nak awnkam ka nei lam thei ngah sing. Ka thei tangin Enu mai ah, "Enu… keimah in khen nangmah it pittseih deve sing" ti heh si sing.
Ref:FWD sunga a rem dandan ah ka let nak si.
No comments:
Post a Comment