Inn sungsang pakhat ah a thupiber heh heisim ti phang in hei heem ah ka puahnak tahin a thupi sawn pakhat heh mun khat no in Pathian nenah innkaw sawngen dang thei heh si, ti asin sual tu um ngawl sing. Tsimita mun khat no ah innkaw sawngen kei puah phang thei kulnak pa 5 heh paan dang asing.
1. Innkaw sawngen hun puah in (zing lam le zan lam)
Kawtin ha innkaw sawngen a phaber hun kei deng thei tuh? Sawngen hun deng thiam ngawl si lekhaw innkhaw kim tu heh a har ngai si. Nu le Pa te hun neinak le tsate hun neinak te thaw rem in innkaw kim thei hun ber kheh deng tuh si. Santehnak ah ni khat ah a dawmber vei 2 sawngen dang tu si asin zing lam tsate tawngkai a hawh ma hun deng kul atsia zan lam ah khen tsate eihmu zau ma puah kul si sing. Zing lam nazi 7:00, zan lam nazi 8:30 na ti a si lekhaw na tinak bangin a hun rori ah puah thei rori tuhin zuam in. Zing lam ah sawngen tuh heh ni khat sung naper nak, vak sukso nak, tsate tawngkai nak, tsate tsimnak, rualpi tetsa...., zan lamah lekhaw nikhat sung pathian kalen nak vumah angnak rel, Pathian deih ngawl zawng puahkha nak te sualzah ngen,...... ti'n sawngen ma sawngen tuh te pawl rel thei lekhaw pha ngai si. Innkaw sawngen hun ah pakhat a kim phang a tangthei a si lekhaw phone thaw ko in phone sungpin sawngen thei ak tuh puah kul si. Tsimi bang mun khat no ah khuklepbawk in innkaw sawngen nak kei puah thei a si lekhaw pakhat le pakhat thinlung khawnendun (itdun) thiam tu atsia Pathian thaw khen khawnendun tu si si.
2. A kawnpum (circle) khuklepbawk sawngen
Innkaw sawngen phang khuklepbawk kherkher kul ngawl, mahni le Pathian laklawh thupi sawn titu khen om si. A sual tinak si ngawl si. A kawnpum in khuklepbaknak thaw saw kei ngen heh Pathian kihzahnak, niamkhiatnak muh nak bek si ngawl in innkhaw kawtizah harsanak thaw na tawk pelhta a si khen a kawnpum thaw sawngen nak manin nangmah thazang nei tiar tu si. A si thei a si lekhaw pakhat le pakhat kutlendun thah sawngen nak manin thinnuamnak khen ngah thei si.
3. Midang tsa sawngen
Inn sungsang pakhat in mahni tsabek sawngen tuh si ngawlin midang tsa khen ngensak kul si. Taffany Fletcher in, 'ka tsate ten midang tsa sawngensak nak aw ka za phang timi aw tah awn lumsawn thei awng ngawl sing, Tsate nenah midang tsa sawngen kei zirh phang le midang tsa kei sawngen nak tsa ten a za phang inn sungsang ah itdunnak lianlian lelei si' ti si. Midang tetsa saw kei ngensak reng veng si lekhaw kei kiangah itnak thaw kei kulh akhaw nitin kei nunnak ah thinnuamnak le angnak thaw dim tu si sing.
4. Sawngen zem in
Mi rekkhat nu le pa ten zing laiei, sim laiei phang mahni rori in sawngen in tsate sawngen zem thiam nwl khen om si sing. Tsate mi lakah sawngen thiam, ngam theinak tuh zir nak min heh inn sungsang laiei sawngen tiar kheh si si. Nu le pa te sawngen zirh nak le inn ah sawngen veng naupang te heh sunday school ah sisen mipi lakah kjen sawngen ngam si. Sawngen kei zirh ngawl a si lekhaw Pathian thaw a awnpidun kham thaw bangdun si. Tsimita imn sungsang pin naupang te Pathian thaw awnpidun thiam theinak tuh zirh kul si.
5. Inn sungsang sawngen ah ninglam
Nu le pa ten tsate heh kumkhaw in a kiangah, a mit nuaiah om tu deih pelh napikhaw eih in zeinak manin mun khat ah om thei ngawl in kheksep veng si sing. Tsimi hun a leng ma nu le pa ten tsate a thupiber a zirh tuh pakhat heh Pathian nenah tselh ngawlin sawngen tu kheh si si. Inn sungsang mun khat no ah sawngen veng tsate heh kawnai kawnai a leng sikhen Pathian thaw a hum maan no in awnpi dun veng si. Sawngen ah huhham le kolnak te a theitsiang ongla ta sawngen ngawl om men tu hang ngawl si. Sualnak khawthim pi sungah a hawh ta sikhen Pathian thaw a kang ngawm manin sualnak khawthim pi in neh tu ngawl si. Inn sungsang sawngen thupi dan a theitu ten a inn sungsang ah remnak, angnak, lawhdingnak a tep bek zo ngawl Pathian in a ompi lam theitsiang in a nenah angnak rel thiam tu atsia a muitsu ngahnak te siar thiam tu si.
No comments:
Post a Comment